3 oktyabr Dövlətçiliyin xilası və sabitliyin bərpası günüdür

Bakı:

16°C

63%

5m/s

Əlaqə

AZ RU EN

Ana səhifə / YAP xəbərləri / 3 oktyabr Dövlətçiliyin xilası və sabitliyin bərpası günüdür

3 oktyabr Dövlətçiliyin xilası və sabitliyin bərpası günüdür

02.10.2025 [16:52]

1993-cü il oktyabrın 3-ü Azərbaycan xalqının tarixi taleyində dönüş nöqtəsi oldu. O gün keçirilmiş prezident seçkiləri müstəqil Azərbaycan dövlətçiliyinin yaşaması, dirçəlişi və inkişafı üçün həyati əhəmiyyət daşıyırdı. Xalq öz müdrik seçimində yanılmadı – Ulu Öndər Heydər Əliyevi Azərbaycan Respublikasının Prezidenti seçməklə dövlətin məhv olmaq təhlükəsini aradan qaldırdı, qüdrətli və əbədi müstəqil Azərbaycanın təməlini qoydu. Ulu Öndərin seçkidən sonra söylədiyi sözlər bu missiyanın mahiyyətini tam əks etdirirdi: “Azərbaycanın dövlət müstəqilliyi əbədidir, dönməzdir və bizim qarşımızda duran vəzifə dövlət müstəqilliyini qorumaqdan, əbədi etməkdən ibarətdir.” Bu, təkcə siyasi şüar deyildi – xalqla birlikdə gələcəyə ünvanlanmış tarixi bir and idi. Müstəqilliyin ilk illərində Azərbaycan ən ağır sınaqlardan keçirdi. 20 Yanvar, Xocalı kimi faciələr, Laçın və Şuşanın işğalı, ölkə ərazisinin 20 faizinin itirilməsi, siyasi xaos və vətəndaş müharibəsi təhlükəsi dövlətçiliyi məhv olmaq astanasına gətirmişdi. Hərc-mərclik, qeyri-peşəkar idarəetmə və şəxsi maraqlara qurban verilmiş siyasət xalqın ümidlərini puça çıxarmışdı. Belə bir zamanda xalqın xilası üçün yeganə ümid ünvanı Ulu Öndər Heydər Əliyev idi. 1993-cü ilin iyununda Bakıya dəvəti, Gəncəyə gedişi, qiyamın qarşısını alması, iyulda Ali Sovet Sədri seçilməsi və nəhayət, 3 oktyabrda xalqın iradəsi ilə Prezident kürsüsünə oturması müasir Azərbaycanın yeni tarixinin başlanğıcı oldu. Ulu Öndər Heydər Əliyev Prezident seçildikdən sonra ilk vəzifə kimi ictimai-siyasi sabitliyin bərpasını qarşıya qoydu. Qeyri-qanuni silahlı dəstələr zərərsizləşdirildi, dövlət çevrilişi cəhdlərinin qarşısı alındı, ölkə vətəndaş müharibəsi təhlükəsindən xilas edildi. Sabitliklə birlikdə iqtisadi islahatların əsası qoyuldu, ordu quruculuğuna başlanıldı, Azərbaycanın suveren mövcudluğu real məzmun qazandı. Ümummilli Liderin qətiyyətli addımları nəticəsində ölkə dünya birliyində tanındı, beynəlxalq təşkilatlarda nüfuz qazandı. Ən əsası isə, Azərbaycan xalqının itirilmiş inamı, sabaha ümidləri bərpa edildi.

Ulu Öndər Heydər Əliyev təkcə Azərbaycan üçün deyil, dünya siyasəti üçün də fövqəladə bir fenomen idi. Realist baxışları, praqmatik yanaşmaları, tarazlaşdırılmış siyasəti, müdrikliyi və natiqlik məharəti ona “siyasət qrosmeysteri”, “siyasət patriarxı” kimi adlar qazandırmışdı. Onun idarəetmə üslu peşəkarlıq, uzaqgörənlik və milli maraqlara sədaqət üzərində qurulmuşdu. Azərbaycançılıq ideologiyasının formalaşdırılması ilə xalqı bir amal ətrafında birləşdirdi, dövlətçiliyin mənəvi dayaqlarını möhkəmləndirdi. Ulu Öndər Heydər Əliyevin rəhbərliyi ilə demokratik hüquqi dövlət quruculuğunun əsası qoyuldu. 1995-ci ildə qəbul olunmuş Konstitusiya Azərbaycan tarixində ilk dəfə olaraq insan hüquqlarının prioritetliyini, hakimiyyət bölgüsünü və hüquqi dövlət prinsiplərini təsbit etdi. Eyni zamanda, “Əsrin müqaviləsi” ilə Azərbaycanın enerji siyasəti dünya iqtisadiyyatına inteqrasiya etdi, Bakı-Tbilisi-Ceyhan və Bakı-Tbilisi-Ərzurum kəmərləri kimi nəhəng layihələr reallaşdı. Bu, Azərbaycanın beynəlxalq nüfuzunu artırdı, regionun lider dövlətinə çevrilməsinə zəmin yaratdı.

Ulu Öndər Heydər Əliyev öz tarixi missiyasını andiçmə mərasimindəki sözlərlə ifadə etmişdi: “Həyatımın sonuna qədər xalqıma sədaqətlə xidmət edəcəyəm.” Bu xidmət ömrünün sonunadək davam etdi və nəticədə xalqının yaddaşında qurucu və xilaskar lider kimi əbədi yaşadı. Bu gün isə həmin siyasətin davamçısı cənab Prezident İlham Əliyev müstəqilliyin qorunub saxlanmasını, ərazi bütövlüyünün bərpasını təmin etdi. 2020-ci ilin Zəfəri Ulu Öndər Heydər Əliyev kursunun parlaq nəticəsi oldu. 3 oktyabr 1993-cü il sadəcə bir seçki günü deyildi – Azərbaycanın xilası, dövlətçiliyin yenidən doğuluşu idi. O gün verilən qərar bu günün qüdrətli, müstəqil, qürurlu Azərbaycanını yaratdı. Ulu Öndər Heydər Əliyevin dediyi kimi, Azərbaycanın müstəqilliyi əbədidir və dönməzdir. Bu müstəqilliyi qorumaq isə hər birimizin borcudur. Çünki o gün xalqın iradəsi ilə yazılan tarix artıq bütün bir millətin gələcəyinə çevrilmişdir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 42 dəfə