YAP – Dünənin, Bu Günün və Gələcəyin Partiyasıdır

Bakı:

14 °C

88 %

0 m/s

Əlaqə

AZ RU EN

Ana səhifə / YAP xəbərləri / YAP – Dünənin, Bu Günün və Gələcəyin Partiyasıdır

YAP – Dünənin, Bu Günün və Gələcəyin Partiyasıdır

21.11.2025 [14:54]

Mansur Quliyev

YAP Ağdam rayon təşkilatının sədri

21 noyabr 1992-ci il Azərbaycan xalqının taleyində yeni mərhələnin başlanğıcı oldu. Həmin gün Yeni Azərbaycan Partiyasının təsis konfransının keçirilməsi dövlətçilik tariximizin dönüş nöqtəsi kimi yaddaşlara həkk olundu. Qarışıqlığın, siyasi böhranın, hakimiyyətsizliyin hökm sürdüyü bir dövrdə xalqın iradəsindən doğan bu tarixi çağırış Azərbaycanın gələcəyini təmin edən mühüm siyasi hadisəyə çevrildi.

Bu konfransın arxasında duran qüdrətli ideya, xalqın xilaskarı və dövlətimizin memarı Ulu Öndər Heydər Əliyevin müdrikliyi idi. Məhz buna görə Ulu Öndərin həmin tarixi sözləri bu gün də siyasi xəttin ideoloji dayağını təşkil edir:

“YAP dünənin, bu günün və gələcəyin partiyasıdır.”

Bu kəlam partiyanın keçmişinə qiymət, bu gününə arxa, gələcəyinə isə böyük inanclar üzərində qurulmuş strateji baxışdır. 1992-ci ildə Azərbaycan parçalanma təhlükəsi ilə üz-üzə qaldığı vaxtda xalq ruhen və siyasi baxımdan böyük bir dayağa ehtiyac duyurdu. Həmin məqamda 91 nəfər ziyalının tarixi müraciəti ilə Yeni Azərbaycan Partiyasının əsası qoyuldu. Bu addım təkcə bir siyasi təşkilatın yaradılması deyildi – bu, dövlətçiliyin xilas edilməsi, milli birliyin bərpası üçün atılmış cəsarətli bir qərar idi. Rayonlarımızın hər birində olduğu kimi, bizim bölgəmizdə də həmin dövrdə vəziyyət ağır idi. İnsanlar sabahına ümid tapmaqda çətinlik çəkir, ölkədə baş verən proseslərə narahatlıqla yanaşırdılar. Hakimiyyət böhranı fonunda rayonlarımız işğal olunur, tarixi dədə-baba torpaqlarımız düşmən tapdağına çevrilordi. YAP-ın təsis olunması xalqın içində ümid işığı yandırdı. Hər bir kənddə, hər bir qəsəbədə insanlar artıq Azərbaycanın qurtuluşunun mümkünlüyünə inanmağa başladı. Bu gün Yeni Azərbaycan Partiyası Ulu Öndər Heydər Əliyevin müəyyən etdiyi yolla sabit şəkildə irəliləyir. Azərbaycan Respublikasının Prezidenti, YAP Sədri cənab İlham Əliyevin rəhbərliyi ilə partiya təkcə siyasi qüvvə deyil, həm də millətin milli inkişaf platformasıdır. 44 günlük Vətən müharibəsində Qələbə, ərazi bütövlüyümüzün bərpası, Qarabağda tam suverenliyin təmin edilməsi – bunların hamısı YAP-ın siyasi kursunun qüdrətini təsdiqləyən tarixi nailiyyətlərdir. Bu gün rayon səviyyəsində həyata keçirilən sosial-iqtisadi layihələr, yeni infrastruktur, yollar, içməli su və elektrik təchizatı, kənd təsərrüfatı layihələri YAP-ın bölgələrə göstərdiyi yüksək diqqətin nəticəsidir. Biz bu inkişafı öz həyatımızda hər gün görürük, hiss edirik. Ulu Öndər Heydər Əliyevin uzaqgörən ideyası YAP-ı təkcə dünənin və bu günün deyil, həm də gələcəyin partiyasına çevirmişdir. Bu gün işğaldan azad olunmuş torpaqlarda aparılan geniş quruculuq işləri, “Böyük Qayıdış” proqramı, yeni şəhərlərin salınması, ağıllı infrastruktur layihələri Azərbaycan dövlətinin gələcək nəsillər üçün hazırladığı möhkəm təməl deməkdir. Hər bir üzvümüz YAP-ın ideyalarını genişləndirmək, dövlətçilik ənənələrimizi möhkəmləndirmək, gəncləri vətənpərvərlik ruhunda formalaşdırmaq üçün ardıcıl fəaliyyət göstərir, gələcəyin güclü Azərbaycanını qurmaq üçün partiya olaraq həm təşkilati, həm siyasi, həm də sosial istiqamətlərdə məsuliyyətlə çalışırıq.

Yeni Azərbaycan Partiyası təkcə siyasi institusional qurum deyil, həm də dövlətçilik məktəbidir. Bu gün partiyanın hər bir üzvü Ulu Öndərin düşündüyü mükəmməl dövlət modelinin daşıyıcısıdır. YAP Azərbaycançılıq ideyasının, milli həmrəyliyin və inkişafın əsas aparıcı qüvvəsi olaraq tarix səhnəsində öz mövqeyini daha da möhkəmləndirir.

21 noyabr 1992-ci ildə keçirilən YAP-ın təsis konfransı bir xalqın taleyini dəyişdi. YAP bu gün də Azərbaycanın siyasi və ideoloji dayağı olaraq fəaliyyət göstərir və gələcəyin daha qüdrətli dövlətinin qurulması yolunda aparıcı rol oynayır.

Ulu Öndər Heydər Əliyevin dediyi kimi:

“YAP dünənin, bu günün və gələcəyin partiyasıdır.”

Bu sözlər bizim üçün şüar deyil, fəaliyyət proqramıdır.

Rayon təşkilatı olaraq biz bu missiyanın şərəfli daşıyıcılarıyıq və bundan sonra da dövlətçiliyimizin möhkəmlənməsinə, Azərbaycanımızın inkişafına sədaqətlə xidmət edəcəyik.

Paylaş:

Baxılıb: 322 dəfə