Prezident İlham Əliyevin Slovakiya bəyanatı: Yeni strateji hədəflərin konturları

Bakı:

25 °C

58 %

4 m/s

Əlaqə

AZ RU EN

Ana səhifə / YAP xəbərləri / Prezident İlham Əliyevin Slovakiya bəyanatı: Yeni strateji hədəflərin konturları

Prezident İlham Əliyevin Slovakiya bəyanatı: Yeni strateji hədəflərin konturları

10.12.2025 [15:06]

Slovakiyaya rəsmi səfəri çərçivəsində Prezident İlham Əliyevin mətbuata verdiyi bəyanat Azərbaycan–Slovakiya münasibətlərinin artıq strateji tərəfdaşlıq mərhələsinə keçdiyini aydın şəkildə ortaya qoydu. Dövlət başçısının vurğuladığı kimi, iki ölkə arasındakı əlaqələr təkcə dostluğa deyil, qarşılıqlı maraqlara əsaslanan çoxölçülü əməkdaşlıq modelinə söykənir.Ötən il imzalanan Strateji Tərəfdaşlıq haqqında Birgə Bəyannamə bu münasibətlərin inkişafına güclü impuls verərək siyasi dialoqdan tutmuş iqtisadi əməkdaşlığa qədər bütün istiqamətlərdə işbirliyini sistemli şəkildə genişləndirdi. Bu gün fəaliyyət göstərən birgə iqtisadi işçi qrup, müxtəlif sahələr üzrə yaradılmış komitələr və əməkdaşlıq mexanizmləri iki ölkə arasında praktiki əməkdaşlığın real nəticələr yaratdığını göstərir.

Energetika sahəsi bu əlaqələrin əsas sütunlarından biri olaraq qalır. Azərbaycan qazının ötən il ilk dəfə Slovakiyaya çatdırılması bu tərəfdaşlığın konkret göstəricisidir. Azərbaycanın geniş enerji resursları, 25 milyard kubmetri aşan illik ixrac həcmi və Avropa İttifaqının 8 ölkəsinə qaz tədarük etməsi ölkəmizin Avropanın enerji təhlükəsizliyindəki həlledici rolunu bir daha təsdiqləyir. Yeni yataqların istismara verilməsi isə Slovakiya da daxil olmaqla region ölkələrinə əlavə ixrac imkanları yaradacaq.

Müdafiə sənayesi sahəsində əməkdaşlıq da perspektiv vəd edən istiqamətlərdən biridir. Prezident İlham Əliyev bu əməkdaşlığın hərbi məqsədlərdən kənar olduğunu, əməkdaşlığın əsas məqsədinin sənaye və texnologiya mübadiləsi olduğunu xüsusi vurğuladı. Slovakiya texnologiyaları ilə Azərbaycan investisiya imkanlarının sintezi rəqabətədavamlı məhsulların istehsalına və dünya bazarlarına çıxışına şərait yarada bilər. Slovakiyanın Zəfər Günündə yüksək səviyyədə təmsil olunması isə ölkələr arasında qarşılıqlı etimadın bariz nümunəsidir.

Slovakiyanın müstəqil xarici siyasət kursu Azərbaycanda yüksək qiymətləndirilir. Prezident İlham Əliyev bəyanatında ölkənin müəyyən təzyiqlərə baxmayaraq müstəqil mövqeyini qorumasını alqışladı və bunun Slovakiya rəhbərliyinə beynəlxalq arenada böyük hörmət qazandırdığını qeyd etdi.Azərbaycanın xarici siyasətində prioritet istiqamətlərdən biri də nəqliyyat və logistika sahəsidir. Prezidentin Slovakiyada səsləndirdiyi fikirlərdən də göründü ki, bu sahə iki ölkə əməkdaşlığında mühüm yer tutur. Azərbaycanın Orta Dəhlizin ən etibarlı və sürətli seqmentinə çevrilməsi, Asiya–Avropa bağlantısında strateji rol oynaması Slovakiya ilə birgə layihələr üçün geniş imkanlar açır.

Bundan başqa, yüksək texnologiyalar və data mərkəzləri üzrə əməkdaşlıq da gündəmdədir. Azərbaycanın istifadə olunmayan enerji potensialının yaxın illərdə 8 giqata çatdırılması və ölkənin müxtəlif bölgələrinin əlverişli iqlimi beynəlxalq data mərkəzləri üçün ideal şərait yaradır. Prezident İlham Əliyevin qeyd etdiyi kimi, həm enerji, həm də sərin iqlim bu sahədə əsas üstünlüklərdir və Slovakiya ilə əməkdaşlıq qarşılıqlı maraqlara əsaslanır.

Ümumilikdə, Prezident İlham Əliyevin Slovakiyada səsləndirdiyi məqamlar gələcək illərdə Azərbaycan–Slovakiya münasibətlərinin yeni, daha geniş strateji çərçivədə inkişaf edəcəyini göstərir. Energetika, nəqliyyat, yüksək texnologiyalar, sənaye kooperasiyası və müdafiə sənayesi kimi sahələr üzrə əməkdaşlıq iki ölkə tərəfdaşlığını Avrasiya məkanında sabit və uzunmüddətli modelə çevirir.

Lalə İskəndərova

YAP Qusar rayon təşkilatının fəal üzvü

Paylaş:

Baxılıb: 374 dəfə