Xocalı Soyqırımı Memorialının açılışı ədalətin təntənəsidir

Bakı:

17 °C

54 %

4 m/s

Əlaqə

AZ RU EN

Ana səhifə / YAP xəbərləri / Xocalı Soyqırımı Memorialının açılışı ədalətin təntənəsidir

Xocalı Soyqırımı Memorialının açılışı ədalətin təntənəsidir

02.03.2026 [14:32]

Fevralın 26-da Xocalı şəhərində Xocalı Soyqırımı Memorialının açılışında cənab Prezident İlham Əliyev çıxışında qeyd etmişdir ki, Heydər Əliyev Fondu fəaliyyətə başladığı ilk dövrlərdən etibarən Xocalı həqiqətlərinin dünya ictimaiyyətinə çatdırılmasını əsas prioritetlərdən biri kimi müəyyənləşdirmişdir. Fondun vitse-prezidenti Leyla Əliyevanın təşəbbüsü ilə başladılan “Xocalıya ədalət!” beynəlxalq kampaniyası qısa müddətdə geniş coğrafiyanı əhatə etmiş, bir çox ölkələrdə tədbirlər, konfranslar və sərgilər təşkil olunmuşdur. Bu hərəkat Xocalı soyqırımının tanıdılması və tarixi ədalətin bərpası istiqamətində mühüm rol oynamışdır.

Dövlət başçısı vurğulamışdır ki, Azərbaycan Ordusu 44 gün davam edən İkinci Qarabağ müharibəsi zamanı düşməni darmadağın etmiş, Ermənistan kapitulyasiya aktına imza atmağa məcbur olmuşdur. Bu qələbə nəticəsində Azərbaycanın ərazi bütövlüyü bərpa edilmiş, işğala son qoyulmuşdur. Prezident qeyd etmişdir ki, bu tarixi zəfər xalqın birliyi, ordunun gücü və siyasi iradənin qətiyyəti sayəsində mümkün olmuşdur.

İlham Əliyev çıxışında Azərbaycan xalqının humanist dəyərlərə sadiq olduğunu vurğulamışdır. O bildirmişdir ki, Azərbaycan Ordusu heç vaxt mülki əhaliyə qarşı məqsədli hücumlar həyata keçirməmişdir. Bu mövqe ölkəmizin beynəlxalq hüquqa və mənəvi prinsiplərə sadiqliyinin göstəricisidir və xalqımızın ucalığını nümayiş etdirir.

Prezident xatırlatmışdır ki, Xocalı Soyqırımı Memorial Kompleksinin təməli iki il əvvəl onun iştirakı ilə qoyulmuşdur. Bu gün isə həmin kompleksin açılışı baş tutur. Bu hadisə təkcə bir abidənin istifadəyə verilməsi deyil, həm də tarixi yaddaşın əbədiləşdirilməsi deməkdir.

Dövlət başçısı qeyd etmişdir ki, dünyada nadir ölkələr tapılar ki, həm ədalətli müharibədə tam qələbə qazansın, həm ərazi bütövlüyünü tam bərpa etsin, həm də müharibə cinayətkarlarını məsuliyyətə cəlb etsin. Azərbaycan bunu bacarmışdır. Bu, dövlətin gücünü və xalqın iradəsini göstərir.

Prezident çıxışında bildirmişdir ki, Memorial Kompleks Azərbaycan xalqının sarsılmaz iradəsinin və əyilməz ruhunun təcəssümüdür. Xocalı faciəsinin qurbanlarının xatirəsi daim uca tutulacaq və Ermənistan dövlətinin vəhşilikləri heç vaxt unudulmayacaqdır.

ıxışda vurğulanmışdır ki, bu beynəlxalq kampaniya nəticəsində bir sıra ölkələr və beynəlxalq təşkilatlar Xocalı hadisələrinə hüquqi-siyasi qiymət vermişdir. Hərəkat informasiya mübarizəsində Azərbaycanın haqlı mövqeyini gücləndirmişdir.

Prezident qeyd etmişdir ki, Memorial Kompleksin məhz Xocalıda açılması xüsusi rəmzi məna daşıyır. Bu, ədalətin bərpasının və tarixi həqiqətin qalib gəlməsinin təntənəsidir.

İlham Əliyev vurğulamışdır ki, Azərbaycan xalqı və dövləti ədaləti öz gücü ilə təmin etmişdir. Heç bir xarici qüvvə bu ədaləti bizə bəxş etməmişdir. Qələbə xalqımızın birliyi və Ordumuzun qəhrəmanlığı nəticəsində qazanılmışdır.

Prezident çıxışında təəssüf hissi ilə bildirmişdir ki, Vətən müharibəsi Ermənistan rəhbərliyinə dərs olmamışdır. Buna baxmayaraq, Azərbaycan öz suverenliyini tam bərpa etmiş və regionda yeni reallıqlar yaratmışdır. Dövlət başçısı qeyd etmişdir ki, bundan sonra da ölkəmiz güclü dövlət kimi inkişaf edəcək və şəhidlərin xatirəsi daim uca tutulacaqdır.

Kənan Quliyev

YAP Laçın rayon təşkilatının məsləhətçisi

Paylaş:

Baxılıb: 296 dəfə