Müstəqil siyasətin informasiya müstəvisində təsdiqi

Bakı:

28 °C

57 %

7 m/s

Əlaqə

AZ RU EN

Ana səhifə / YAP xəbərləri / Müstəqil siyasətin informasiya müstəvisində təsdiqi

Müstəqil siyasətin informasiya müstəvisində təsdiqi

14.07.2026 [14:30]

Son illər Azərbaycan yalnız regional proseslərin iştirakçısı deyil, həm də beynəlxalq gündəliyə təsir göstərən dövlət kimi çıxış edir. Bu reallıq IV Şuşa Qlobal Media Forumunda Prezident İlham Əliyevin səsləndirdiyi fikirlərdə də aydın ifadəsini tapdı. Dövlət başçısının çıxışı göstərdi ki, müasir dünyada siyasi proseslərin mahiyyətini düzgün qiymətləndirmək və onları beynəlxalq ictimaiyyətə obyektiv çatdırmaq medianın üzərinə düşən ən mühüm vəzifələrdən biridir.

Müasir beynəlxalq münasibətlər sistemi sürətlə dəyişir, yeni çağırışlar və geosiyasi risklər meydana çıxır. Belə bir şəraitdə Azərbaycanın milli maraqlara söykənən müstəqil xarici siyasəti ölkənin ən böyük üstünlüklərindən biri kimi çıxış edir. Prezident İlham Əliyev çıxışında vurğuladı ki, Azərbaycan heç bir xarici təsir mərkəzindən asılı olmadan öz milli maraqlarını rəhbər tutur və beynəlxalq münasibətlərdə qarşılıqlı hörmət, bərabərhüquqlu əməkdaşlıq prinsiplərinə sadiq qalır. Bu siyasət ölkəmizin etibarlı tərəfdaş kimi mövqeyini daha da möhkəmləndirib.

Forum bir daha nümayiş etdirdi ki, informasiya məkanı artıq geosiyasi rəqabətin əsas istiqamətlərindən birinə çevrilib. Bu gün dövlətlərin nüfuzu yalnız iqtisadi və hərbi potensialla deyil, həm də həqiqətə əsaslanan informasiya siyasəti ilə müəyyən edilir. Azərbaycanın son illərdə təşkil etdiyi beynəlxalq tədbirlər, o cümlədən Şuşa Qlobal Media Forumu ölkənin açıq dialoq tərəfdarı olduğunu və ən müxtəlif mövzuların sərbəst müzakirəsinə şərait yaratdığını nümayiş etdirir. Dünyanın müxtəlif ölkələrindən jurnalistlərin Prezident İlham Əliyevə birbaşa suallar ünvanlaması və ətraflı cavablar alması da bu açıq yanaşmanın bariz nümunəsidir.

Şuşanın belə mühüm beynəlxalq tədbirlərə ev sahibliyi etməsi xüsusi siyasi məna daşıyır. Vaxtilə işğalın və dağıntının simvoluna çevrilmək istənilən bu şəhər bu gün beynəlxalq fikir mübadiləsinin, dialoqun və əməkdaşlığın məkanıdır. Bu, Azərbaycanın həyata keçirdiyi bərpa siyasətinin, regionda davamlı inkişaf və sabitlik yaratmaq əzminin real nəticəsidir. Məhz buna görə Şuşadan verilən mesajlar təkcə Azərbaycan üçün deyil, bütövlükdə regionun gələcəyi baxımından da diqqətlə izlənilir.

IV Şuşa Qlobal Media Forumu bir daha təsdiqlədi ki, Prezident İlham Əliyevin rəhbərliyi ilə həyata keçirilən müstəqil siyasət Azərbaycanın beynəlxalq nüfuzunu ardıcıl şəkildə gücləndirir. Ölkəmiz artıq qlobal əhəmiyyətli məsələlərin müzakirə olunduğu etibarlı platformalar yaradan, müxtəlif baxışların sərbəst ifadəsinə imkan verən və həqiqətə söykənən dialoqu təşviq edən dövlət kimi tanınır. Bu isə Azərbaycanın beynəlxalq informasiya məkanında söz sahibi olan ölkələr sırasında mövqeyini daha da möhkəmləndirir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 51 dəfə