Uğurla inkişaf edən münasibətlər

Bakı:

31 °C

46 %

7 m/s

Əlaqə

AZ RU EN

Ana səhifə / YAP xəbərləri / Uğurla inkişaf edən münasibətlər

Uğurla inkişaf edən münasibətlər

17.07.2026 [14:43]

Azərbaycan Respublikasının Prezidenti cənab İlham Əliyevin Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində iyulun 14-də Şuşada verdiyi bəyanat bir daha göstərdi ki, Azərbaycan bu gün regionda sülhün, əməkdaşlığın və qarşılıqlı etimada əsaslanan münasibətlərin təşviqində mühüm rol oynayan ən etibarlı dövlətlərdən biridir. Mədəniyyət paytaxtımız Şuşada keçirilən bu görüş həm siyasi, həm iqtisadi, həm də mənəvi baxımdan xüsusi əhəmiyyət daşıyan bir görüşdür.

Şuşa artıq yalnız Azərbaycanın deyil, bütün regionun mühüm beynəlxalq dialoq məkanına çevrilib. Məhz bu şəhərdə müxtəlif dövlət başçılarının, beynəlxalq təşkilat nümayəndələrinin və nüfuzlu qonaqların qəbul edilməsi Azərbaycanın gündən- günə artan beynəlxalq nüfuzunun və Möhtərəm Prezident İlham Əliyevin uğurlu xarici siyasət kursunun bariz göstəricisidir.

Möhtərəm Prezident İlham Əliyev bəyanatında Azərbaycan ilə Slovakiya arasında münasibətlərin yüksələn xətt üzrə inkişaf etdiyini vurğulayaraq, siyasi dialoqun, iqtisadi əməkdaşlığın və qarşılıqlı hörmətə əsaslanan əlaqələrin daha da genişləndirilməsi üçün möhkəm zəminin formalaşdığını diqqətə çatdırdı. Bu isə bir daha onu göstərir ki, ölkəmiz Avropa dövlətləri ilə bərabərhüquqlu və etibarlı tərəfdaşlıq münasibətlərini uğurla inkişaf etdirir.

Bəyanatda enerji təhlükəsizliyi məsələlərinə də xüsusi diqqət yetirildi. Bu gün Azərbaycan Avropanın enerji təhlükəsizliyinin təmin edilməsində mühüm rol oynayan ən etibarlı ölkələrdən biridir. Təbii qaz ixracının genişlənməsi, yeni əməkdaşlıq istiqamətlərinin müəyyənləşdirilməsi və yaşıl enerji sahəsində həyata keçirilən layihələr Azərbaycanın strateji əhəmiyyətini daha da artırır. Slovakiya ilə bu sahədə əməkdaşlığın genişləndirilməsi hər iki ölkənin maraqlarına xidmət edən mühüm addım kimi qiymətləndirilə bilər.

Möhtərəm Prezident İlham Əliyevin çıxışında müstəqil, suveren Azərbaycanın sülh gündəliyinə sadiqliyi də aydın şəkildə ifadə olundu. Ölkəmiz regionda davamlı sülhün və sabitliyin təmin olunmasının tərəfdarı olduğunu dəfələrlə nümayiş etdirib. Azərbaycanın beynəlxalq hüquqa əsaslanan mövqeyi dünya ictimaiyyəti tərəfindən getdikcə daha geniş şəkildə qəbul edilir və dəstəklənir.

Şuşada səsləndirilən fikirlər bir daha təsdiq etdi ki, Azərbaycan müstəqil siyasət yürüdən, milli maraqlarını qətiyyətlə müdafiə edən və eyni zamanda beynəlxalq əməkdaşlığa böyük önəm verən bir dövlətdir. Son illərdə əldə olunan uğurlar, ölkəmizin beynəlxalq nüfuzunun artması və strateji tərəfdaşlarının sayının çoxalması Möhtərəm Prezident İlham Əliyevin uzaqgörən və uğurlu siyasətinin nəticəsidir.

Slovakiya Prezidentinin Şuşaya səfəri və burada keçirilən görüşlər həm də işğaldan azad edilmiş ərazilərimizin bərpasına və inkişafına beynəlxalq marağın artdığını nümayiş etdirir. Bu gün Qarabağ və Şərqi Zəngəzur bölgəsində həyata keçirilən genişmiqyaslı quruculuq işləri dünyanın diqqət mərkəzindədir və Azərbaycan öz gücü hesabına bu işləri həyata keçirir.

Heç şübhəsiz ki, Şuşada keçirilən bu görüş və verilən bəyanatlar Azərbaycan-Slovakiya münasibətlərinin gələcək inkişafına yeni təkan verəcək, eyni zamanda ölkəmizin beynəlxalq mövqeyinin daha da möhkəmlənməsinə xidmət edəcəkdir. Möhtərəm Prezident İlham Əliyevin rəhbərliyi ilə həyata keçirilən uğurlu daxili və xarici siyasət Azərbaycanın inkişafını, beynəlxalq nüfuzunu və strateji əhəmiyyətini gündən-günə artırır. Şuşadan dünyaya ünvanlanan bu mesaj bir daha göstərdi ki, Azərbaycan sabitliyin, tərəfdaşlığın və qarşılıqlı etimadın ən etibarlı məkanıdır.

Murğuz Alıyev

YAP Qazax rayon təşkilatı ərazi partiya təşkilatının sədri

Paylaş:

Baxılıb: 192 dəfə