Milli Mətbuat – Dövlətçilik düşüncəsinin, milli birliyin və həqiqətin carçısı

Bakı:

22 °C

78 %

7 m/s

Əlaqə

AZ RU EN

Ana səhifə / YAP xəbərləri / Milli Mətbuat – Dövlətçilik düşüncəsinin, milli birliyin və həqiqətin carçısı

Milli Mətbuat – Dövlətçilik düşüncəsinin, milli birliyin və həqiqətin carçısı

21.07.2026 [11:11]

“Milli mətbuatımızın inkişaf mərhələləri Azərbaycan xalqının azadlıq, müstəqillik uğrunda mübarizə tarixinin tərkib hissəsidir. “Əkinçi”dən üzü bəri azadlıq, demokratiya, müstəqillik uğrunda mücadilə dərslərini biz milli mətbuatımızın səhifələrindən öyrənmişik.” - Ulu Öndər Heydər Əliyev

Bu dəyərli fikir Azərbaycan milli mətbuatının keçdiyi tarixi yolun mahiyyətini və onun dövlətçilik tariximizdə oynadığı əvəzsiz rolu dolğun şəkildə ifadə edir. Milli mətbuat yalnız xəbərlərin yayılması vasitəsi deyil, xalqın milli yaddaşını yaşadan, ictimai fikri formalaşdıran, milli kimliyi möhkəmləndirən və dövlətçilik ənənələrinin qorunmasına xidmət edən mühüm ictimai institutdur.

Azərbaycan milli mətbuatının əsası 1875-ci il iyulun 22-də böyük maarifçi Həsən bəy Zərdabi tərəfindən nəşr edilən “Əkinçi” qəzeti ilə qoyulmuşdur. “Əkinçi” təkcə ilk ana dilli qəzet deyil, həm də xalqın maariflənməsinə, elmin, təhsilin və müasir dünyagörüşünün təbliğinə xidmət edən milli oyanış hərəkatının başlanğıcı idi. O dövrdə milli mətbuat xalqın hüquqlarının müdafiəsi, milli şüurun inkişafı və azərbaycançılıq ideyalarının yayılmasında misilsiz rol oynadı.

Azərbaycan mətbuatı tarix boyu mürəkkəb və şərəfli inkişaf yolu keçmişdir. Çar Rusiyası dövründə senzura ilə üzləşsə də, milli ideyaların yaşadılması missiyasından geri çəkilmədi. Azərbaycan Xalq Cümhuriyyəti dövründə mətbuat demokratik dəyərlərin və istiqlal ideyalarının əsas tribunasına çevrildi. Sovet hakimiyyəti illərində ideoloji məhdudiyyətlərə baxmayaraq, milli düşüncənin yaşadılmasına xidmət edən ziyalılar mətbuat vasitəsilə cəmiyyətin maariflənməsinə töhfələr verdilər.

Müstəqilliyin bərpasından sonra Azərbaycan mediasının inkişafında yeni mərhələ başlandı. Ümummilli Lider Heydər Əliyevin siyasi iradəsi nəticəsində ölkədə söz və mətbuat azadlığının hüquqi əsasları möhkəmləndirildi, senzura ləğv edildi və müasir media mühitinin formalaşması üçün əlverişli şərait yaradıldı. Bu islahatlar milli mətbuatın inkişafında dönüş nöqtəsi oldu və medianın cəmiyyət qarşısındakı məsuliyyətini daha da artırdı.

Bu gün Cənab Prezident İlham Əliyevin rəhbərliyi ilə media siyasəti müasir dövrün çağırışlarına uyğun şəkildə inkişaf etdirilir. İnformasiya təhlükəsizliyinin gücləndirilməsi, rəqəmsal medianın inkişafı, jurnalistikanın peşəkarlığının artırılması və milli informasiya məkanının qorunması dövlət siyasətinin prioritet istiqamətlərindəndir. Azərbaycan mediası artıq yalnız ölkə daxilində deyil, beynəlxalq informasiya məkanında da ölkəmizin maraqlarını müdafiə edən mühüm qüvvəyə çevrilmişdir.

Qloballaşan dünyada informasiya strateji resurs hesab olunur. Dezinformasiya, saxta xəbərlər, informasiya manipulyasiyaları və hibrid təhdidlər fonunda peşəkar və məsuliyyətli medianın rolu daha da artır. Belə bir şəraitdə Azərbaycan mediası həqiqətin müdafiəçisi kimi çıxış edir, dövlətimizin milli maraqlarını qoruyur, cəmiyyətin düzgün məlumatlandırılmasını təmin edir və ictimai həmrəyliyin möhkəmlənməsinə xidmət göstərir.

Xüsusilə 44 günlük Vətən müharibəsi dövründə Azərbaycan mediası informasiya cəbhəsində böyük peşəkarlıq nümayiş etdirdi. Yerli jurnalistlər və media qurumları operativ, obyektiv və etibarlı məlumatlarla ictimaiyyəti məlumatlandırdı, ölkəmizə qarşı aparılan dezinformasiya kampaniyalarına tutarlı faktlarla cavab verdi. Azərbaycan həqiqətlərinin dünya ictimaiyyətinə çatdırılması istiqamətində görülən işlər milli medianın gücünü və peşəkarlığını bir daha nümayiş etdirdi.

Müasir dövrdə Şuşa Qlobal Media Forumu kimi beynəlxalq platformaların yaradılması da Azərbaycanın media sahəsində artan nüfuzunun göstəricisidir. Şuşada dünyanın müxtəlif ölkələrindən media nümayəndələrinin iştirakı ilə keçirilən forum qlobal informasiya təhlükəsizliyi, süni intellekt, rəqəmsal transformasiya və media etikası kimi mühüm məsələlərin müzakirə olunduğu nüfuzlu dialoq məkanına çevrilib. Bu forum Azərbaycanın beynəlxalq əməkdaşlığa, açıq dialoqa və obyektiv informasiya mühitinin formalaşdırılmasına verdiyi önəmin bariz ifadəsidir.

Milli mətbuatın inkişafı yalnız jurnalistlərin deyil, bütövlükdə cəmiyyətin və dövlətin inkişaf göstəricisidir. Güclü media güclü dövlətin ayrılmaz atributlarından biridir. Milli maraqlara sadiq, peşəkar və məsuliyyətli media cəmiyyətin düzgün istiqamətləndirilməsində, milli birliyin möhkəmləndirilməsində və dövlətçilik ideologiyasının təbliğində mühüm rol oynayır.

22 İyul – Milli Mətbuat Günü münasibətilə bütün jurnalistləri, media əməkdaşlarını və qələmi ilə həqiqətə xidmət edən hər kəsi səmimi-qəlbdən təbrik edir, onlara möhkəm cansağlığı, tükənməz yaradıcılıq, peşə uğurları və daim milli maraqlara, obyektivliyə və həqiqətə sadiq fəaliyyət arzulayırıq. Azərbaycan milli mətbuatı bundan sonra da dövlətçiliyimizin möhkəmlənməsinə, cəmiyyətimizin inkişafına və ölkəmizin beynəlxalq nüfuzunun yüksəlməsinə layiqli töhfələr verməyə davam edəcəkdir.

Cəmilə Hüseynova

YAP Naxçıvan şəhər təşkilatının ƏPT sədri,

Naxçıvan Peşə Təhsil Mərkəzinin direktor müavini

Paylaş:

Baxılıb: 361 dəfə