Tərtərdə Beynəlxalq Gənclər Günü münasibətilə tədbir keçirilib

Bakı:

20 °C

56 %

2 m/s

Əlaqə

AZ RU EN

Ana səhifə / YAP xəbərləri / Tərtərdə Beynəlxalq Gənclər Günü münasibətilə tədbir keçirilib

Tərtərdə Beynəlxalq Gənclər Günü münasibətilə tədbir keçirilib

12.08.2026 [15:37]

Yeni Azərbaycan Partiyası (YAP) Tərtər rayon təşkilatı, Rayon İcra Hakimiyyəti və Qarabağ Regional Gənclər və İdman İdarəsinin birgə təşkilatçılığı ilə 12 Avqust – Beynəlxalq Gənclər Günü münasibətilə “Gənclik gələcəkdir” mövzusunda tədbir keçirilmişdir.

Tədbirdə YAP Tərtər rayon təşkilatının sədri Eldar Əsədov, Tərtər Rayon İcra Hakimiyyəti başçısı aparatının İctimai-siyasi və humanitar məsələlər sektorunun müdiri Zabil Paşayev, Qarabağ Regional Gənclər və İdman İdarəsinin rəisi Anar Əsgərov, Tərtər Gənclər Mərkəzinin müdiri Musa Paşayev və rayonun bir neçə idarə, müəssisə və təşkilatının gənc nümayəndələri iştirak etmişlər.

Tədbir iştirakçıları ilk öncə Yeni Azərbaycan Partiyasının qurucusu, Ümummilli Lider Heydər Əliyevin, eləcə də ölkəmizin ərazi bütövlüyü və suverenliyi uğrunda canlarından keçmiş qəhrəman şəhidlərimizin əziz xatirəsini bir dəqiqəlik sükutla yad etmişlər.

Tədbiri giriş sözü ilə açan YAP Tərtər rayon təşkilatının sədri Eldar Əsədov əlamətdar günün tarixi əhəmiyyətindən geniş bəhs etmişdir. O, Azərbaycanda dövlət gənclər siyasətinin fundamental əsasının Ulu Öndər Heydər Əliyev tərəfindən qoyulduğunu qeyd etmişdir. Diqqətə çatdırılmışdır ki, 1997-ci ildə məhz Ümummilli Liderin müvafiq Fərmanı ilə ölkəmizdə Gənclər Günü təsis edildiyi halda, BMT Baş Məclisi bu günü yalnız 1999-cu ildə beynəlxalq səviyyədə rəsmiləşdirmişdir. Eldar Əsədov bu uğurlu strateji kursun bu gün Prezident cənab İlham Əliyev tərəfindən qətiyyətlə davam etdirildiyini, gənclərin cəmiyyətdə aparıcı qüvvəyə çevrildiyini və rayon partiya təşkilatının gənc üzvlərinin bütün ictimai proseslərdə ön sıralarda addımladığını vurğulamışdır.

Tərtər Rayon İcra Hakimiyyəti başçısı aparatının İctimai-siyasi və humanitar məsələlər sektorunun müdiri Zabil Paşayev çıxış edərək yerli idarəetmə orqanlarının gənclərlə iş sahəsindəki fəaliyyətindən danışmışdır. O, rayon icra hakimiyyətinin gənclərin innovativ layihələrinə, yaradıcı təşəbbüslərinə və könüllülük hərəkatına hər zaman hərtərəfli dəstək verdiyini, gənclərin sosial-ictimai fəallığının artırılması üçün rayonda geniş imkanlar yaradıldığını bildirmişdir.

Qarabağ Regional Gənclər və İdman İdarəsinin rəisi Anar Əsgərov öz çıxışında regionda idmanın kütləviliyinin təmin olunması və gənclər siyasətinin regional müstəvidə səmərəli reallaşdırılması istiqamətində görülən işlərə toxunmuşdur. O, Tərtər gənclərinin həm intellektual, həm də idman yarışlarında qazandıqları uğurların Qarabağ regionunun ümumi potensialını nümayiş etdirdiyini bildirmiş və gəncləri daha böyük nailiyyətlərə səsləmişdir.

Tərtər Gənclər Mərkəzinin müdiri Musa Paşayev rəhbərlik etdiyi qurumun gənclərin asudə vaxtının düzgün və səmərəli təşkili, onların fərdi inkişafı istiqamətində həyata keçirdiyi proqramlar barədə ətraflı məlumat vermişdir. Qeyd olunmuşdur ki, mərkəz gənclərin bilik və bacarıqlarını artırmaq üçün daimi bir platforma rolunu oynayır.

Tədbirdə Tərtər Peşə Məktəbinin psixoloqu Altunə Bayramova və Tərtər Heydər Əliyev Mərkəzinin əməkdaşı Mərziyyə Əmirxanlı öz çıxışlarında Ulu Öndər Heydər Əliyevin zəngin dövlətçilik irsinin və gənclərə ötürdüyü dəyərlərin öyrənilməsinin tarixi əhəmiyyətini vurğulamışlar. Çıxışçılar müasir Azərbaycan gəncliyinin bu dahi irsdən bəhrələnərək vətənpərvər ruhda böyüdüyünü diqqətə çatdırmışlar.

Paylaş:

Baxılıb: 235 dəfə