Suveren Azərbaycanın gücü və gələcəyi

Bakı:

26 °C

61 %

7 m/s

Əlaqə

AZ RU EN

Ana səhifə / YAP xəbərləri / Suveren Azərbaycanın gücü və gələcəyi

Suveren Azərbaycanın gücü və gələcəyi

18.09.2026 [11:06]

Tarix göstərir ki, hər bir xalqın inkişaf yolu onun dövlətçilik ənənələri və suverenliyə münasibəti ilə müəyyən olunur. Müstəqillik dövlətin yaranmasını ifadə edirsə, suverenlik həmin dövlətin bütün ərazisində ali hakimiyyətini tam həyata keçirməsini, daxili və xarici siyasətini sərbəst müəyyənləşdirməsini təmin edir. Bu baxımdan 20 Sentyabr – Dövlət Suverenliyi Günü Azərbaycanın müasir tarixində təkcə əlamətdar tarix deyil, dövlətçiliyimizin möhkəmlənməsini və milli iradənin təntənəsini ifadə edən siyasi hadisədir. Prezident İlham Əliyevin 2024-cü il 19 sentyabr tarixli ilə təsis edilmiş Dövlət Suverenliyi Günü xalqımızın uzun illər davam edən mübarizəsinin məntiqi nəticəsini əks etdirir. Sərəncamda vurğulandığı kimi, xalqımız tarix boyu müxtəlif çətinliklər, işğal və məhrumiyyətlərlə üzləşsə də, müstəqil dövlətçilik ideyasından heç vaxt geri çəkilməyib. Bu gün şəhidlərimizin müqəddəs xatirəsi, qəhrəman hərbçilərimizin fədakarlığı sayəsində tam təmin edilmiş ərazi bütövlüyü və dövlət suverenliyi Azərbaycanın ən böyük milli nailiyyətlərindən biridir.
Ermənistanın Azərbaycana qarşı həyata keçirdiyi işğalçılıq siyasəti otuz ilə yaxın davam etdi. Bu dövrdə beynəlxalq hüququn norma və prinsipləri kobud şəkildə pozuldu, şəhər və kəndlər viran edildi, tarixi-mədəni irs məhv olundu, yüz minlərlə azərbaycanlı öz doğma yurdlarından didərgin salındı. BMT Təhlükəsizlik Şurasının Ermənistan silahlı qüvvələrinin işğal olunmuş ərazilərdən çıxmasını tələb edən qətnamələri isə uzun illər kağız üzərində qaldı. Bununla belə, beynəlxalq birlik Azərbaycanın ərazi bütövlüyünü və suveren hüquqlarını daim tanıyırdı.

2020-ci ildə baş vermiş Vətən müharibəsi regionun siyasi reallıqlarını tamamilə dəyişdi. Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusu 44 gün ərzində tarixi Zəfər qazandı və ölkəmizin ərazi bütövlüyünün böyük hissəsini bərpa etdi. Müharibədən sonrakı mərhələdə isə dövlət suverenliyinin tam təmin olunması istiqamətində ardıcıl addımlar atıldı. Laçın-Xankəndi yolunda nəzarət-buraxılış məntəqəsinin yaradılması Azərbaycanın öz sərhədlərinə nəzarət hüququnun tam bərpasını təmin etdi və qanunsuz fəaliyyətlərin qarşısının alınmasında həlledici rol oynadı. 2023-cü il sentyabrın 19-da həyata keçirilən lokal antiterror tədbirləri isə bu prosesin yekun mərhələsi oldu. Cəmi bir gün davam edən əməliyyat nəticəsində Ermənistan silahlı qüvvələrinin qalıqları tərk-silah edildi, separatçı rejim fəaliyyətini dayandırdı və Azərbaycan Respublikasının Konstitusiya quruluşu bütün ölkə ərazisində tam bərpa olundu. Prezident İlham Əliyevin qeyd etdiyi kimi, bununla dövlət suverenliyi tam təmin edildi, beynəlxalq hüququn aliliyi öz təsdiqini tapdı və Azərbaycan güclü dövlət olduğunu bir daha nümayiş etdirdi. Tam suverenlik bu gün Azərbaycanın davamlı inkişafının əsas təminatıdır. Azad edilmiş ərazilərdə aparılan genişmiqyaslı bərpa-quruculuq işləri, Böyük Qayıdış proqramının uğurla həyata keçirilməsi, iqtisadi potensialın artması, beynəlxalq əməkdaşlığın genişlənməsi və daxili sabitliyin daha da möhkəmlənməsi bunun bariz nümunəsidir. Dövlət Suverenliyi Günü xalqımızın mübarizə əzmini, dövlətimizin sarsılmaz gücünü və gələcək inkişaf hədəflərini özündə birləşdirən mühüm tarixi gün kimi hər il xüsusi qürur hissi ilə qeyd olunur.

Emil Tağıyev

YAP Xaçmaz rayon təşkilatının sədri

Paylaş:

Baxılıb: 133 dəfə