Cəbrayılın azadlığı Zəfər tariximizin şanlı səhifəsidir

Bakı:

19 °C

72 %

3 m/s

Əlaqə

AZ RU EN

Ana səhifə / YAP xəbərləri / Cəbrayılın azadlığı Zəfər tariximizin şanlı səhifəsidir

Cəbrayılın azadlığı Zəfər tariximizin şanlı səhifəsidir

05.10.2026 [16:14]

Cəbrayılın adı Azərbaycan tarixində artıq yalnız bir rayonun adı kimi deyil, 44 günlük Vətən müharibəsində Zəfərə gedən yolun ən parlaq səhifələrindən biri kimi çəkilir. 2020-ci il oktyabrın 4-də Azərbaycan Respublikasının Prezidenti, Müzəffər Ali Baş Komandan İlham Əliyevin xalqa müraciətlə Cəbrayıl şəhərinin və rayonun bir sıra kəndlərinin işğaldan azad edildiyini elan etməsi illərlə həsrətində olduğumuz torpaqlara qayıdışın real mənzərəsini ortaya qoydu. Bu qələbənin arxasında Azərbaycan Ordusunun əsgər və zabitlərinin misilsiz qəhrəmanlığı, Vətən sevgisi və Ali Baş Komandanın siyasi iradəsi dayanırdı.

Cəbrayılın işğalı 1993-cü ilin avqustunda Azərbaycanın ən ağır hərbi-siyasi dövrlərindən birində baş vermişdi. İşğal nəticəsində rayonun şəhəri və kəndləri dağıdılmış, yüz minlərlə insan doğma yurdlarından didərgin düşmüşdü. Sonrakı illərdə Cəbrayılın işğalının nəticələri yalnız dağıdılmış evlər, viran qalmış məktəblər və tarixi-mədəni abidələrlə məhdudlaşmadı. Ermənistanın həyata keçirdiyi məqsədli vandalizm siyasəti burada Azərbaycan xalqının izlərini silməyə hesablanmışdı. Lakin tarixdən silinməyən bir həqiqət var idi - Cəbrayıl Azərbaycan torpağı idi və bu torpaqların azad olunacağı gün gələcəkdi. Həmin günün yaxınlaşması Azərbaycan Ordusunun illər ərzində həyata keçirilən hərtərəfli hazırlığının nəticəsi oldu. 2020-ci il sentyabrın 27-də Ermənistanın genişmiqyaslı hərbi təxribatına cavab olaraq başlayan Vətən müharibəsində Azərbaycan əsgəri qarşısına qoyulan məqsədə doğru inamla irəlilədi. Cəbrayıl istiqamətində gedən döyüşlər xüsusilə ağır və mürəkkəb şəraitdə aparılırdı. Qarşı tərəfin möhkəmləndirilmiş mövqeləri, relyef və uzun illər ərzində qurulmuş müdafiə xətləri Azərbaycan hərbçilərinin qarşısında ciddi maneələr yaradırdı. Lakin Vətən sevgisi bu maneələrdən daha güclü idi.

Cəbrayıl uğrunda döyüşlərdə Azərbaycan əsgəri yalnız hərbi tapşırığı yerinə yetirmirdi. O, 27 il doğma torpağına qayıda bilməyən insanların ümidini, ata-baba yurduna qovuşmaq arzusunu da özü ilə döyüş meydanına aparırdı. Hər qarış torpaq uğrunda irəliləyən Vətən oğullarının göstərdiyi qəhrəmanlıq Cəbrayılın azadlığını mümkün edən əsas amillərdən oldu. Şəhidlərimizin qanı ilə yazılan bu Zəfər Azərbaycan tarixinin ən müqəddəs səhifələrindən birinə çevrildi.

Cəbrayıl şəhərinin azad edilməsi Vətən müharibəsinin gedişində mühüm strateji və mənəvi əhəmiyyət daşıyırdı. Oktyabrın 4-də Cənab Prezident İlham Əliyevin Cəbrayıl şəhərinin azad olunmasını rəsmən elan etməsi xalqımız üçün illərlə gözlənilən xəbərin gerçəyə çevrilməsi idi. Bu xəbər təkcə hərbi uğuru deyil, Azərbaycanın işğal faktını dəyişdirmək gücündə olduğunu bütün dünyaya nümayiş etdirirdi. Cəbrayılın azadlığı həm də Azərbaycan Ordusunun döyüş qabiliyyətinin, yüksək hazırlığının və müasir hərbi imkanlarının göstəricisi idi. Ən əsası isə bu qələbənin arxasında Ali Baş Komandanın qəti siyasi iradəsi dayanırdı. Cənab Prezident İlham Əliyevin müharibə günlərində nümayiş etdirdiyi prinsipial mövqe, hərbi və diplomatik cəbhədə apardığı məqsədyönlü siyasət Azərbaycanın Zəfər strategiyasının mühüm dayaqlarından biri oldu. Ali Baş Komandanın rəhbərliyi ilə Ordumuz qarşıya qoyulan tarixi vəzifəni şərəflə yerinə yetirdi.

Bu gün Cəbrayılda aparılan genişmiqyaslı bərpa-quruculuq işləri həmin Zəfərin davamıdır. İşğal illərində dağıdılmış şəhər yenidən qurulur, yollar və infrastruktur yaradılır, keçmiş məcburi köçkünlərin doğma yurda qayıdışı təmin edilir. Bir vaxtlar düşmən tərəfindən viran qoyulan Cəbrayıl bu gün Azərbaycanın quruculuq və Böyük Qayıdış siyasətinin rəmzlərindən birinə çevrilir. Cəbrayılın azadlığı bizə bir daha göstərdi ki, torpaqlarımızın azadlığı yalnız siyasi qərarla deyil, həmin qərarın arxasında dayanan qətiyyətli milli iradə, güclü dövlət və Müzəffər Ali Baş Komandanın rəhbərliyi ilə Vətən uğrunda canından keçməyə hazır olan qəhrəman oğulların fədakarlığı ilə mümkün olur. Siyasi iradə qarşıya tarixi məqsəd qoydu, dövlətimiz həmin məqsədin reallaşdırılması üçün öz gücünü səfərbər edir, Ali Baş Komandanın qətiyyətli rəhbərliyi isə bu mübarizəyə vahid istiqamət verdi. Cəbrayılın azadlığı da məhz bu amillərin – siyasi iradənin, dövlət gücünün, xalqın milli həmrəyliyinin və Azərbaycan əsgərinin misilsiz qəhrəmanlığının vəhdətindən doğan tarixi Zəfərdir. Bu Qələbənin arxasında şəhidlərimizin müqəddəs qanı, qazilərimizin şücaəti və Vətən naminə döyüş meydanında qəhrəmanlıq göstərən oğullarımızın böyük fədakarlığı dayanır.Azərbaycan əsgərinin Cəbrayıl torpağında ucaltdığı üçrəngli bayraq şəhidlərimizin müqəddəs ruhuna, xalqımızın milli qüruruna və gələcək nəsillərə əmanətdir. Cəbrayılın azadlığı tariximizin qürur səhifəsidir. Bu səhifənin müəllifləri isə başda Müzəffər Ali Baş Komandan İlham Əliyev olmaqla, Vətən uğrunda döyüşən, şəhidlik zirvəsinə ucalan və qəhrəmanlıqla qələbə qazanan Azərbaycan Ordusunun igid əsgər və zabitləridir. Onların göstərdiyi misilsiz şücaət heç vaxt unudulmayacaq, Cəbrayılın azadlığı isə Azərbaycan xalqının Zəfər salnaməsində əbədi yaşayacaq.

David Həsənov

Yeni Azərbaycan Partiyası Naxçıvan şəhər təşkilatının əməkdaşı

Paylaş:

Baxılıb: 26 dəfə