Oğuzda “Gənc liderlər” gənc siyasətçilər üçün “Yay məktəbi” davam edir

Bakı:

24 °C

42 %

3 m/s

Əlaqə

AZ RU EN

Ana səhifə / YAP xəbərləri / Oğuzda “Gənc liderlər” gənc siyasətçilər üçün “Yay məktəbi” davam edir

Oğuzda “Gənc liderlər” gənc siyasətçilər üçün “Yay məktəbi” davam edir

15.07.2014 [14:40]

Oğuz rayonunda Yeni Azərbaycan Partiyası (YAP) Gənclər Birliyinin “Gənc liderlər” gənc siyasətçilər üçün “Yay məktəbi” layihəsinin II turu öz işini davam etdirir. İyulun 15-də seminar-diskussiya keçirilib, müxtəlif məsələlərə dair fikir mübadiləsi aparılıb, interaktiv oyunlar və idman yarışları təşkil edilib.
“İKT və informasiya təhlükəsizliyi” mövzusunda keçirilən seminarda çıxış edən “Yeni Azərbaycan” qəzetinin baş redaktoru, Oğuz II tur qrupunun rəhbəri Hikmət Babaoğlu XXI yüzilliyi informasiya əsri kimi səciyyələndirərək müasir dövrdə İKT-nin inkişafının strateji əhəmiyyət kəsb etdiyini bildirib. Baş redaktor deyib ki, informasiya-kommunikasiya texnologiyalarının sürətli inkişafı və cəmiyyət həyatının bütün sahələrini əhatə etməsi müsbət məqamlarla yanaşı, bir sıra zərərli tendensiyaların meydana çıxmasına səbəb olub.
İnformasiya resurslarını strateji idarəetmə vasitəsi kimi xarakterizə edən Hikmət Babaoğlu qeyd edib ki, sosial medianın meydana çıxması və internetdən istifadə imkanlarının genişlənməsi informasiya təhlükəsizliyi məsələsini daha da aktuallaşdırıb.
“İKT və kibertexnologiyaların inkişafı çox sürətlə gedir və bəşəriyyəti insanların proqnozlaşdıra bilmədikləri nöqtələrə gətirib çıxarır. Yeni kibertexnologiyalar yaradılan zaman onu yaradan və idarə etməyə çalışan mərkəzlərin maraqlarına xidmət etsə də, sonrakı mərhələdə öz-özlüyündə yarımmüstəqil platformaya çevrilərək proqnozlaşdırılmayan və idarə olunmayan proseslərə gətirib çıxarır. Və belə demək mümkünsə, yeni innovasiyalar və yeni kibertexnologiyalar insanlara yeni azadlıqlar bəxş etsə də, eyni zamanda, bu azadlıqların hüdudları, ölçüsü və dərəcəsi qeyri-müəyyən olduğu üçün bunun azadlıqmı, yoxsa anarxiyamı olduğuna dair ciddi suallar yaradır. Məsələ bundadır ki, yeni texnologiyalar yaradılan zaman, ilk növbədə, qarşıya qoyulan məqsəd həmin texnologiyalara nəzarət etməyi də özündə birləşdirən bir ideya idi. Təəssüf ki, getdikcə nəzarət amili sıradan çıxdı və artıq kibertexnologiyalar virtual məkanda öz-özünə inkişaf edən, öz-özünü tənzimləyən, öz sərhədlərini və keyfiyyətini müəyyənləşdirən nizamlı, eyni zamanda, xaotik bir prosesə çevrilir”,- deyən baş redaktor müasir qloballaşma şəraitində informasiya təhlükəsizliyi probleminin bütün cəmiyyətlərə aid olduğunu və strateji məsələ kimi çıxış etdiyini əlavə edib.
Sosial medianı özünəməxsus platforma kimi səciyyələndirən qrup rəhbəri “O, bütün fərdləri əhatə edəcək qədər kütləvidir, eyni zamanda, ifrat sərbəstlik verəcək qədər azaddır. Belə olan təqdirdə bəhs olunan platformada idarəetməni və rasional nəzarəti necə təşkil etmək lazımdır? Rasional münasibətlər sisteminin formalaşmadığı neqativ yüklü cəmiyyətlərdə bu platforma, bir növ, xaos və destruktiv ziddiyyətlər mənbəyi kimi çıxış edir ki, bu da, əlbəttə ki, arzuolunmazdır. Məsələn, "Ərəb baharı" adlandırılan Yaxın Şərq və Şimali Afrika olaylarından sonra bir daha əmin olduq ki, sosial media hər nə qədər inkişaf üçün bir açar əhəmiyyəti daşıyırsa, bir o qədər də tənəzzül mənbəyi və ya vasitəsi kimi çıxış edir”,-deyə əlavə edib.
Qarşılıqlı fikir mübadiləsi əsasında baş tutan diskussiyada İKT sektorunun inkişafının əhəmiyyətindən bəhs edilib, informasiya əsrinin yaratdığ problemlər diqqətə çatdırılıb. Bildirilib ki, gənclər sosial mediadan səmərəli və milli maraqlara müvafiq surətdə istifadə etməklə həm özlərinin intellektual potensiallarını artırmalı, həm də cəmiyyətdə hökm sürən zərərli tendensiyaların aradan qaldırılmasına yardımçı olmalıdırlar.
NURLAN

Paylaş:

Baxılıb: 1100 dəfə