İnsanlar dövlətimizin daha da güclənməsinə, rifahının daha da yüksəlməsinə xidmət edən siyasətə səs verəcək

Bakı:

33 °C

38 %

8 m/s

AZ RU EN

Ana səhifə / YAP xəbərləri / İnsanlar dövlətimizin daha da güclənməsinə, rifahının daha da yüksəlməsinə xidmət edən siyasətə səs verəcək

İnsanlar dövlətimizin daha da güclənməsinə, rifahının daha da yüksəlməsinə xidmət edən siyasətə səs verəcək

21.10.2010 [09:52]

Yeni Azərbaycan Partiyasının 11 saylı Qaradağ seçki dairəsindən namizədi Ağalar Vəliyev Qobustan qəsəbəsinin seçicilərilə görüş keçirib
Dünən Yeni Azərbaycan Partiyasının (YAP) 11 saylı Qaradağ seçki dairəsindən Milli Məclisə namizədi Ağalar İsrəfil oğlu Vəliyev Qobustan qəsəbəsinin sakinləri ilə görüş keçirib.
Görüşdən əvvəl Ağalar Vəliyev şəhid Yusif Əliyevin abidəsi önünə gül dəstələri düzüb, ehtiramını bildirib.
Mədəniyyət sarayında təşkil olunmuş görüşdə çıxış edən YAP Qaradağ rayon təşkilatının sədri, partiyanın Siyasi Şurasının üzvü Aydın Hüseynov ölkədə aparılan genişmiqyaslı abadlıq-quruculuq işlərindən danışıb: “çox sevindirici haldır ki, bu gözəl işlərin nəticələrini Qobustan qəsəbəsinin dəyişən, gözəlləşən simasında da müşahidə edirik”.
Aydın Hüseynov parlament seçkilərinin əhəmiyyətindən söz açıb və qanunverici orqan olan Milli Məclisin xalqın səsverməsi ilə formalaşdığını deyib. O, daha sonra Sahil qəsəbəsinin seçicilərinə namizəd Ağalar Vəliyev haqqında məlumat verib. Qeyd edilib ki, Ağalar İsrəfil oğlu Vəliyev 1957-ci il iyulun 23-də Yevlax şəhərində fəhlə ailəsində anadan olub. O, 1976-cı ildə Mingəçevir Politexnik Texnikumunu, 1989-cu ildə isə Azərbaycan İnşaat Mühəndisləri İnstitutunu bitirib: “İxtisasca inşaat mühəndisidir. Ailəlidir. Bir oğul atasıdır”.
Səmərəli fəaliyyətinə görə, Ağalar Vəliyevin Prezident İlham Əliyevin Sərəncamı ilə Respublikanın “Əməkdar mühəndisi” fəxri adına layiq görüldüyünü söyləyən Aydın Hüseynov deyib ki, Ağalar Vəliyev rəhbərlik etdiyi kollektivin üzvlərinin, ehtiyacı olan insanların xeyir-şər işlərində həmişə yaxından iştirak edib, vaxtının məhdudluğuna baxmayaraq, öz maddi və mənəvi köməkliyini heç vaxt əsirgəməyib. Qeyd edib ki, Ağalar Vəliyevin köməkliyi ilə 10 nəfərdən çox insan müqəddəs Həcc ziyarətində olub və bu ənənə indi də böyük həvəslə davam etdirilir. Respublikamızın rayonlarında bir neçə müqəddəs ziyarətgah məhz Ağalar Vəliyev tərəfindən bərpa olunaraq yenidən soydaşlarımızın istifadəsinə verilib.
Aydın Hüseynov çıxışının sonunda qəsəbə sakinlərini qurub-yaratmaq kimi bütün müsbət keyfiyyətlərə malik YAP-ın namizədi Ağalar Vəliyevə səs verməyə çağırıb: “Əminəm ki, qobustanlılar seçki günündə məntəqələrə gedərək Yeni Azərbaycan Partiyasının namizədinə - Ağalar Vəliyevə səs verəcəklər”.
Sonra çıxış edən Yeni Azərbaycan Partiyasının 11 saylı Qaradağ seçki dairəsindən Milli Məclisə namizədi Ağalar Vəliyev bildirib ki, seçicilərə böyük vədlər vermək niyyətində deyil: “Parlament üzvünün vəzifələri qanunlarla müəyyənləşib. Deputatların əsas vəzifəsi qanun yaradıcılığı işi ilə məşğul olmaqdır. Amma insanların dəstəyilə parlamentə seçilən şəxs də həmin insanların problemləri ilə maraqlanmağa və həllinə çalışmağa borcludur. Mən sizə nəyi vəd edirəmsə, onu da edəcəyəm”.
Ağalar Vəliyev qəsəbə sakinlərinin ona səs verəcəyi və seçicilərin etimadı nəticəsində deputat seçiləcəyi təqdirdə verdiyi bütün vədlərin həyata keçirilməsinə çalışacağını bildirib: “Mən sizə hansı vədləri verirəmsə, onların həyata keçirilməsi üçün var gücümlə çalışacağam”.
Görüş iştirakçıları isə mövcud problemlər barədə namizədə məlumat veriblər, təkliflər irəli sürüblər.
Sonda görüşdən razı qalan Qobustan qəsəbəsinin sakinləri də Yeni Azərbaycan Partiyasının 11 saylı Qaradağ seçki dairəsindən Milli Məclisə namizədi Ağalar İsrəfil oğlu Vəliyevə səs verəcəklərini söyləyiblər.
Ramil VƏLİBƏYOV

Paylaş:

Baxılıb: 1502 dəfə