Bu gün artıq başqadır

Bakı:

27 °C

45 %

4 m/s

Əlaqə

AZ RU EN

Ana səhifə / YAP xəbərləri / Bu gün artıq başqadır

Bu gün artıq başqadır

15.03.2023 [10:36]

YAP Ağdam rayon təşkilatının sədri

Mansur Quliyev

Dünyanın 60 ölkəsindən 350 nəfər yüksək səviyyəli təmsilçinin iştirakı martın 9-da X Qlobal Bakı Forumunun ölkəmizdə keçirilməsi Azərbaycanın beynəlxalq müstəvidə artan nüfuzundan və həmçinin diplomatik sahədə qazandığımız növbəti uğurların diplomatik təntənəsinin məntiqi nəticəsi kimi qiymətləndirilir.

Martın 9-da Nizami Gəncəvi Beynəlxalq Mərkəzi tərəfindən təşkil olunmuş, “Dünya bu gün: Çağırışlar və ümidlər” mövzusunda keçirilən X Qlobal Bakı Forumunda Azərbaycan Respublikasının Prezidenti cənab İlham Əliyevin iştirakı və bu mötəbər forumda çıxışı mühüm tarixi əhəmiyyətə malikdir. Forumda çıxış edən ölkə Prezidenti cənab İlham Əliyev Ermənistanın Azərbaycana qarşı həyata keçirdiyi terror və işğal siyasəti haqqında məlumat verərək bildirdi ki, “Erməni tərəfi konstruktiv yanaşma göstərmədi. Nəticədə Azərbaycan güc tətbiq etdi və öz ərazilərini azad etdi. Hazırda, təxminən iki il yarım vaxt ötür və biz 10 min kvadratmetrlərlə ölçülən və tamamilə dağıdılmış böyük ərazini yenidən tikirik. Biz ermənilərdən fərqli olaraq hər hansı hərbi cinayət törətmədik. Biz ermənilərdən fərqli olaraq soyqırımı törətmədik. Biz döyüş meydanında qisas aldıq. Hazırda sülh üçün vaxt yetişib. 2020-ci ilin noyabrında müharibə bitdikdən dərhal sonra biz sülh danışıqlarına başlamaq üçün təşəbbüs irəli sürdük və Ermənistanla sülh müqaviləsinin əsasını təşkil edəcək beş məşhur prinsipi təqdim etdik.”

Qeyd edək ki, Prezident cənab İlham Əliyevin Forumda çıxışında qarşıda dayanan hədəflər barədə və regionun gələcək inkişaf perspektivləri haqqında fikirləri olduqca önəmlidir. Ölkə Prezidenti vurğulayıb ki, artıq Cənubi Qafqaz regionu üçün sülh imkanları yaranıb. Bəli, bu gün Azərbaycan bölgədə və regionda sülhün, təhlükəsizliyin əsas qarantıdır və bu istiqamətdə konstruktiv addımlar atmaqdadır.

Xüsusilə vurğulamaq lazımdır ki, Ermənistanın və onun havadarlarının işğala və tədricən Azərbaycan ərazilərinin ilhaqına əsaslanan planları 44 günlük şanlı Vətən müharibəsi zamanı alt-üst oldu. Regionda Azərbaycanın maraqlarına cavab verən yeni siyasi reallıq yarandı. Azərbaycan 30 ilə yaxın davam edən işğala son qoydu. Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusu canı-qanı bahasına Ermənistan Ordusunun məğlubedilməzliyi barədə illərdir formalaşdırılmış mifi 44 günə dağıtdı və Azərbaycanın ərazi bütövlüyünü bərpa etdi. Ermənistan üzərinə götürdüyü öhdəliklərinə əməl etməli və təxribatlara son qoymalıdır. Bu gün diktə edən tərəf qalib Azərbaycandır və hazırda dünya gücləri yeni reallıqları qəbul edib.

Bu gün artıq reallıq başqadır və Azərbaycan diktə edən tərəf kimi öz uğurlu diplomatik gedişlərini icra etməkdədir.

Paylaş:

Baxılıb: 538 dəfə