Sanksiyalar dalğası davam edir

Bakı:

20 °C

64 %

3 m/s

Əlaqə

AZ RU EN

Ana səhifə / Xəbər lenti / Sanksiyalar dalğası davam edir

Sanksiyalar dalğası davam edir

28.02.2023 [10:43]

10-cu paketdə nələr var?

Nicat Dilqəmli

Rusiya-Ukrayna müharibəsi səbəbindən Rusiyaya qarşı tətbiq edilən sanksiyaların əhatə dairəsi genişlənməkdə davam edir. Razılaşdırılması müzakirə predmetinə çevrilən onuncu paketin reallaşdırılması - tətbiq edilməsi nəhayət ki, baş tutub. Bununla bağlı 3 gün öncə qərar qəbul edilib. Avropa İttifaqının (Aİ) xarici siyasət və təhlükəsizlik üzrə ali nümayəndəsi Jozep Borrel sanksiyaların yubiley paketi ilə bağlı danışarkən məhdudiyyətlərin “amansız müharibənin davam etməsində mühüm rol oynayanlara” qarşı yönəldiyini qeyd edib. Avropalı diplomat fikirlərinə belə davam edib: “Rusiyaya təzyiqləri gücləndirəcəyik. Ukrayna Rusiyanın qəddar təcavüzündən azad olunana qədər - nə qədər lazımdırsa, o qədər də bu, belə davam edəcək”.

Yeni paketin təsir dairəsinə Rusiyadan olan 1473 fiziki şəxs, 205 təşkilat daxildir. Onların aktivləri dondurulacaq, Aİ vətəndaşlarının və şirkətlərinin onlara vəsait verməsi qadağan ediləcək. Bununla belə, fiziki şəxslərin Aİ ərazisinə daxil olmasına da icazə verilmir. Avropa Komissiyasının hesablamalarının nəticəsinə görə, tətbiq edilən ticarət məhdudiyyətlərinin həcmi 11.4 milyard avro dəyərindədir. Aİ-nin Rusiyaya ixracının demək olar ki, yarısı məhdudlaşdırıcı tədbirlərin sırasında yer alır.

Sanksiya siyahısına Rusiyanın Alfa-Bankı, Tinkoff Bankı və Aİ-də deyildiyi kimi, Rusiya hakimiyyətinə “əhəmiyyətli gəlir təmin edən” Rosbank da daxildir. “Rossiya Seqodnya” media qrupu və onun icraçı direktoru Kirill Vışinski, “Regnum” xəbər agentliyinin baş redaktoru Marina Əhmədova və jurnalist Aleksandr Kots da sanksiyalara məruz qalıblar.

Siyahıda Milli Dəyərlərin Müdafiəsi Fondunun prezidenti Maksim Şuqalei, Malidəki Vaqner qrupunun rəhbəri İvan Maslov, Mərkəzi Afrika Respublikasındakı Vaqner qrupunun mətbuat katibi Aleksandr İvanov da var.

ABŞ da Rusiyaya qarşı yeni sanksiyalar tətbiq edib. Ölkənin ticarət nazirliyi dəyəri 300 dollardan çox olan smartfonların və məişət texnikasının ixrac məhdudiyyətini genişləndirib. Məhdudiyyətlər 276 məhsul koduna, o cümlədən ABŞ-da dəyəri 750 dollar olan kondisionerlər və soyuduculara, ventilyatorlara, qabyuyan maşınlara, 100 dollardan yuxarı robot tozsoranlara, məişət qəhvə maşınlarına, mikrodalğalı sobalara və digər cihazlara aid ediləcək.

Rusiyanın bəzi maliyyə təşkilatları da məhdudiyyətlərə məruz qalıb. Məhdudlaşdırıcı tədbirlər ilə əsasən Moskva Kredit Bankı (MCB), Sankt-Peterburq, Uralsib, Zenit və MTS Bank bankları üzləşəcək. Bundan başqa, metallurgiya və dağ-mədən sektoru ilə əlaqəli olan, fiziki və hüquqi şəxs olmaqla 100 nəfər qadağalar siyahısına düşüb.

Paylaş:

Baxılıb: 411 dəfə