Türkün gücünü hər kəs gördü!

AZ RU EN

Ana səhifə / Xəbər lenti / Türkün gücünü hər kəs gördü!

Türkün gücünü hər kəs gördü!

04.10.2023 [11:40]

Texnoloji mühitə sürətli inteqrasiyanın nəticəsi

Günel ABBAS

Oktyabrın 2-də Bakı Konqres Mərkəzində 74-cü Beynəlxalq Astronavtika Konqresinin açılış mərasimi keçirilib. Tədbirdə 100-dən artıq ölkəni təmsil edən 5000-dən çox nümayəndə iştirak edib.

İştirakçılar arasında TEKNOFEST-in İdarə Heyətinin sədri, “Baykar” şirkətinin texniki direktoru Selcuk Bayraktar da yer alıb. S.Bayraktar 74-cü Beynəlxalq Astronavtika Konqresi çərçivəsində “Akıncı” pilotsuz uçuş aparatının kiçikölçülü maketini dövlətimizin başçısına hədiyyə edib. Qeyd edək ki, 2022-ci il mayın 28-də Bakıda ilk dəfə keçirilən “TEKNOFEST Azərbaycan” Aerokosmik və Texnologiya Festivalında Azərbaycan Prezidenti İlham Əliyev Türkiyə Prezidenti Rəcəb Tayyib Ərdoğanla birgə “Akıncı” pilotsuz uçuş aparatının üzərinə imza atmışdılar.

Selçuk Bayraktar tədbirdən sonra jurnalistlərə açıqlamasında bir neçə əhəmiyyətli məqamlara toxunub. Bildirib ki, Beynəlxalq Astronavtika Konqresinin 50 il sonra müstəqil Azərbaycanda, Vətən olaraq gördüyü ölkədə keçirilməsi böyük xoşbəxtlikdir: “Türkiyənin Kosmik Agentliyi buradadır, nazirliklərimizin stendləri var, “Roketsan” və “Aselsan” burada təmsil olunur. Həmçinin bizim kosmik tədqiqatlarla məşğul olan təşkilatımız buradadır. Onsuz da biz bir millətik, iki dövlətik. Ölkələrimiz arasındakı əlaqələri kosmik məkanda da inkişaf etdirməliyik. Bu kosmos sahəsində ən prestijli konqresdir. Biz də inşallah 2 il sonra üçün Türkiyədə ev sahibliyi etmək istəyirik”, - deyə o qeyd edib.

Xatırladaq ki, Türkiyə Beynəlxalq Astronavtika Konqresində 500-ə yaxın “Teknofest” iştirakçısı və qalibi ilə iştirak edib.

Azərbaycanlı gənclər süni intellekt üzərində işləyirlər

Onun sözlərinə görə, pilotsuz uçuş aparatları ilə bağlı texnologiyaları inkişaf etdirmək üçün Azərbaycanda “Bayraktar Technology Azərbaycan” şirkəti yaradılıb: “Orada Azərbaycan gəncləri süni intellekt üzərində işləyirlər. Bu pilotsuz təyyarələrin avtomatik uçmasını təmin edən proqram təminatıdır və ən mühüm texnologiyadır. Biz bunu qabaqcıl avtomatlaşdırma adlandırırıq. Azərbaycanlı qardaşlarımız İstanbuldadırlar, tezliklə bura gələcəklər”.

S. Bayraktar qeyd edib ki, Türkiyənin Kosmik Agentliyi Azərbaycanın Kosmik Agentliyi ilə sıx əməkdaşlıq edir: “Yüksək texnologiyada da Azərbaycan güclənəcək. Biz gənclərimizin belə fəaliyyətlərdə gələcəyə iz qoyacaq layihələrdə birgə çalışmalarına önəm veririk”.

“Akınçı” pilotsuz uçuş aparatları Azərbaycana təhvil veriləcək

S.Bayraktar bildirib ki, azərbaycanlı pilotlar təlimləri uğurla başa vurublar: “Odur ki, biz ən yaxın gələcəkdə “Akınçı” PUA-larını Azərbaycana təhvil verəcəyik. Həmçinin 20 azərbaycanlı mühəndis “Baykar texnoloji Azərbaycan” şirkətində fəaliyyətə başlayıb”.

O bildirib ki, pilotsuz uçuş aparatları (PUA) istehsalı və tədrisi məqsədi ilə “Baykar texnoloji Azərbaycan” qurulmuşdu: “Mühəndis komandamız azərbaycanlı gənc qardaşlarımızla birlikdə işləməyə başlamışdı. Onlar daha çox süni intellekt və faydası daha yüksək olacaq sahələr üzərində işləməyə başlayıb. Hazırda 20 azərbaycanlı mühəndis sözügedən sahədə fəaliyyətini davan etdirir”.

“Bunlarla yanaşı, digər sahələrdə də çalışacaq komandalarımız yetişib. Sözügedən rəqəmlər sizə kiçik gələ bilər, lakin dünyanın ən böyük işlərini kiçik, amma doğru təməllər üzərinə qurulmuş komandalar həyata keçirib. Hansı ki, “Baykar” da əvvəllər kiçik bir komanda ilə fəaliyyətə başlamışdı”, - S.Bayraktar vurğulayıb.

Türkiyə dünyada ən yaxşı pilotsuz uçuş aparatlarına sahibdir

S.Bayraktar bildirib ki, bu gün Türkiyə dünyada ən yaxşı pilotsuz uçuş aparatlarına sahibdir: “Qarabağın azad olunmasında PUA-dan istifadə edildi. Bu, bizim üçün qürur mənbəyidir. PUA-ları idarə edən azərbaycanlı pilotlar türkün gücünü bütün dünyaya göstərdi. Türklər ilk dəfə olaraq PUA-larla müharibədə qalib gəldi. Türkün gücünü hər kəs gördü. Bu, əlbəttə, həm də şəhid və qazilərimiz sayəsində mümkün oldu”.

Daha sonra Selçuk Bayraktar “Bilim Bakı” mərkəzini ziyarəti çərçivəsində keçirilən tədbirdə çıxışı zamanı qeyd edib ki, hazırda yüksək texnologiya bütün həyatı şəkilləndirir: “Yaxın keçmişdə pandemiya yaşadıq və həmin dövrdə ən inkişaf ölkələrdə belə kifayət qədər süni nəfəs aparatlarının olmadığını gördük. Bu zaman həmin aparatların satışı qadağan edildi. Kiçik şeylər belə insanları qütbləşdirərkən belə həyati hadisələrin insanları bir-birindən daha da uzaqlaşdırmaması mümkün deyildi. Bu baxımdan bilim mərkəzlərimizin hədəfi vətənimizin, insanlığın faydasına işlər görən gənclərin yetişdirilməsinə nail olmaqdır”.

Paylaş:

Baxılıb: 170 dəfə