531 il əvvəl...

AZ RU EN

Ana səhifə / Xəbər lenti / 531 il əvvəl...

531 il əvvəl...

28.10.2023 [12:40]

Kolumbun Kuba kəşfi

Yeganə BAYRAMOVA

Oktyabrın 28-i ada dövləti olan Kubanın kəşf edildiyi gündür. Paytaxtı və ən böyük şəhəri Havana olan Kuba 11 milyondan artıq insanın vətənidir. Eyni zamanda, Kuba Qərb bölgəsində ən böyük əraziyə malikdir. Ada ətrafındakı sular tərəfindən ilıqlaşdırılmış bir tropik iqlimə sahibdir. Eyni zamanda, Karib Dənizinin isti suları və adanın Meksika körfəzinə paralel yerləşməsi Kubanı qasırğalar üçün açıq hədəf vəziyyətinə gətirib. 1232,5 kilometr uzunluğundakı Kuba adası planetimizin ən böyük 13-cü adasıdır.

Kuba necə kəşf edildi?

Kubaya gələn ilk avropalı 1492-ci ilin oktyabrında arxipelaqın şərq hissəsinə qədəm qoyan səyyah Xristofor Kolumb olub. Kolumbun ilk dəfə Atlantik okeanını üzüb keçməsi böyük coğrafi kəşflərin başlanğıcı kimi qəbul olunur. Amerika sahillərinə yaxınlaşan Kolumbun gəmiləri ilk dəfə olaraq 12 oktyabr 1492-ci ildə sahildə quru ərazini görürlər və sonrakı gün özlərinin kəşf etdikləri torpağa ayaq basaraq onu Vest-İndiya adlandırırlar. Bununla da birinci səyahəti zamanı (1492-1493-cu illər) X.Kolumb Baham, Kuba və Haiti (Espanyola) adalarını kəşf edir.

Onun 1493-1496-cı illərdəki ikinci səyahəti Kiçik Antil adalarının bir qrupunun, Puerto-Riko və Yamayka adalarının kəşfinə gətirib çıxarır. Bundan başqa, o, Kubanın cənub sahillərini də tədqiq edir...

1511-ci ildə Dieqo Velaskes de Kuelyar adanın yerli əhalisini özünə tabe edərək Barakoa limanının əsasını qoydu və Kubanın ilk ispan qubernatoru oldu. 1514-cü ilə kimi burada 7 yeni yaşayış məskəninin əsası qoyulmuşdu. 1515-ci ildə Dieqo Velaskes de Kuelyar öz iqamətgahını Kubanın birinci paytaxtı olan Santyaqo de Kubaya köçürdü. Adanın yerli əhalisinin 75 faizini təşkil edən hindu mənşəli tainolar ispanların müstəmləkə siyasətinə qarşı ciddi müqavimət göstərirdilər.

Nikel istehsalına görə 1-ci yer...

Kuba 1943-cü ildən hasilatına başlanıldığı nikel ehtiyatlarına görə dünyada ikinci yeri tutur. Nikel istehsalı 1959-cu il inqilabından sonra SSRİ ilə birlikdə şaxta avadanlıqlarının modernləşdirilməsindən və dağ-mədən kombinatının yaradılmasından sonra əhəmiyyətli dərəcədə artıb. Müasir dövrdə Kuba nikel istehsalına görə dünyada birinci yeri tutur.

Kuba zəngin kobalt ehtiyatlarına da malikdir. Belə ki, kobalt emalına və istehsalına görə dünyada üçüncü yeri tutur. 1984-cü ildə ölkənin qərbində neft və qaz yataqları aşkar edilib. 2006-cı ildən adanın şimalında, Florida sahillərindən bir qədər aralı məsafədə yeni neft-qaz yataqlarının mənimsənilməsinə başlanılıb.

Bəzi məlumatlara görə, Kubada neft ehtiyatları 5 milyard barreldən, qaz ehtiyatları isə 300 milyard kub metrdən çoxdur. 2010-cu ildə təsdiq edilmiş məlumatlara əsasən, Kubada neft ehtiyatları 178,9 mln. barel, təbii qaz ehtiyatları isə 70,9 milyard kub metrdir.

Kuba mədəniyyəti

Kuba mədəniyyəti dünyanın müxtəlif bölgələrindən gətirilmiş etnik mədəniyyətin qarışığından ibarətdir. XVI əsrdən başlayaraq Kuba plantasiyalarında işləmək üçün gətirilən qullar sonradan ağ dərili kolonistlər və yerli xalq ilə qaynayıb-qarışaraq müasir kubalıların bir xalq kimi yaranmasına səbəb olub. Burada aborigenlərin, ispanların, afrikalıların, sonradan gəlmiş qərbi avropalıların və çinlilərin gətirdiyi mədəniyyət müasir Kuba mədəniyyətini formalaşdırıb.

Paylaş:

Baxılıb: 209 dəfə