“PRESS” gödəkçələrin verilməsi dayandırıldı!

Bakı:

19 °C

68 %

9 m/s

Əlaqə

AZ RU EN

Ana səhifə / Xəbər lenti / “PRESS” gödəkçələrin verilməsi dayandırıldı!

“PRESS” gödəkçələrin verilməsi dayandırıldı!

01.11.2023 [11:07]

Yeni formalar hazırlanır...

Y.BAYRAMOVA

Mətbuat Şurası (MŞ) “PRESS” gödəkçələrinin verilməsini dayandırıb. Bu barədə MŞ-dən məlumat verilib. Bildirilib ki, müxtəlif sosial şəbəkə profillərində bəzi şəxslərin Azərbaycan Mətbuat Şurasına məxsus olduğu iddia edilən, üzərində “PRESS” yazılmış və şuranın loqosunun əksini tapdığı gödəkçələrdə media prinsiplərinə zidd fəaliyyət gerçəkləşdirdiklərinə dair fikirlər və görüntülər paylaşılıb. Bununla əlaqədar Mətbuat Şurası həmin gödəkçələrin verilməsini dayandırıb.

MŞ-nın məlumatında qeyd olunub ki, gödəkçələr fərdi şəxslərə deyil, möhürlü və imzalı müraciət əsasında redaksiyalara verilirdi: “Lakin Şura belə sadə prosedurun media fəaliyyəti həyata keçirdiyini bildirən təsadüfi şəxslərin də gödəkçələri əldə edə bilməsinə yol açdığını müəyyənləşdirdi. Buna görə gödəkçələrin verilməsi dayandırıldı.

Mətbuat Şurası, həmçinin, “PRESS” gödəkçələrinin bənzərlərinin ayrı-ayrı şəxslər tərəfindən fərdi qaydada hazırlandığını da müəyyənləşdirib. Hazırda yayılmış görüntülərdə bu tip şəxslər əks olunub. Şura bildirir ki, gödəkçələr jurnalistlərin kütləvi aksiyalarda, ümumən ekstremal durumlarda peşə borclarını sərbəst yerinə yetirmələri, fərqlənmələri üçündür və heç bir halda media fəaliyyətindən kənar məqsədlər naminə istifadə edilə bilməz. Jurnalist adından sui-istifadə, təmənnalı münasibət və digər xoşagəlməz hallar “Azərbaycan Jurnalistlərinin Etik Davranış Qaydaları”na zidd olmaqla yanaşı, hüquqi məsuliyyət də yaradır. Mətbuat Şurası hər kəsi bunu nəzərə almağa çağırır”.

Qeyd edək ki, “PRESS” gödəkçələrinin yeni variantı və redaksiyalara verilməsi qaydaları hazırlanır. Yaxın vaxtlarda bununla bağlı şərtlərin açıqlanması planlaşdırılır.

Yeni formaların olması labüddür...

“Bakı xəbər” qəzetinin baş redaktoru Aydın Quliyev MŞ-nın müvafiq addımı barədə fikirlərini “Yeni Azərbaycan”la bölüşüb: “Bir neçə il öncə MŞ-nın köhnə rəhbərliyinin dövründə səhv etmirəmsə, redaksiyalara bir ya da iki dəfə xüsusi geyim formaları paylanmışdı. “Bakı xəbər” redaksiyası olaraq biz də həmin formalardan almışdıq. Əməkdaşlarımızın hər birində köhnə formalardan var. Bu, təxminən 5-6 il əvvəl verilən formalardır və əməkdaşlarımız indiyə kimi həmin formalardan istifadə edirlər. Lakin çox yaxşı olar ki, yeni dizaynda müasir formalar olsun. Yeni formaların olması əhəmiyyətli və labüddür”.

Jurnalistlərin məsuliyyəti daha da artacaq...

“İki Sahil” qəzetinin baş redaktoru Vüqar Rəhimzadə qeyd edib ki, MŞ-nın formalarını təəssüf ki, mətbuatla heç bir əlaqəsi olmayan insanlar geyinirdi və təbii ki, bu, yaxşı hal deyil: “Məsələn, formaları hansısa redaksiyalara verirdilər və bir də görürdük ki, tamamilə fərqli adam o formanı istifadə edir. Bu baxımdan MŞ-nın belə addım atması qənaətbəxşdir və tamamilə düzgün bir qərardır. Əlbəttə, bu addım formalarla bağlı məsuliyyəti bir az artırmalıdır. Sırf jurnalistikaya aid olan və bu sahədə çalışan şəxslərin bu formanı geyinməsi önəmlidir, nəinki qeyri-peşə sahiblərinin jurnalistlərə məxsus formalardan istifadə etməsi. Bu formalar jurnalistlərin müəyyən tədbirlərdə iştirakı zamanı onların media nümayəndəsi olduğunu təsdiq edən bir geyimdir. Ona görə də məsələnin ciddiyə alınması vacib idi. Fikrimcə, Şuranın bu addımı gələcəkdə redaksiya və jurnalistlərin məsuliyyətini daha da artıracaq”.

Paylaş:

Baxılıb: 506 dəfə