Yeni Azərbaycan Partiyası Xəzər rayon təşkilatının təsis edilməsinin 33-cü ildönümü münasibətilə tədbir keçirilib

Bakı:

26 °C

61 %

9 m/s

AZ RU EN

Ana səhifə / Arxiv / Yeni Azərbaycan Partiyası Xəzər rayon təşkilatının təsis edilməsinin 33-cü ildönümü münasibətilə tədbir keçirilib

Yeni Azərbaycan Partiyası Xəzər rayon təşkilatının təsis edilməsinin 33-cü ildönümü münasibətilə tədbir keçirilib

20.07.2026 [10:56]

“Şəhərsalma və Memarlıq İli” çərçivəsində Yeni Azərbaycan Partiyası Xəzər rayon təşkilatı və Xəzər Rayon İcra Hakimiyyətinin birgə təşkilatçılığı ilə Yeni Azərbaycan Partiyası Xəzər rayon təşkilatının yaranmasının 33 illiyi münasibətilə tədbir keçirilib.

Tədbir iştirakçıları əvvəlcə Xəzər Rayon İcra Hakimiyyətinin inzibati binası önündə ucaldılmış Ümummilli Lider Heydər Əliyevin abidəsini ziyarət edib, dahi şəxsiyyətin əziz xatirəsini dərin ehtiramla yad edərək abidə önünə gül dəstələri düzüblər.

Tədbir Azərbaycan Respublikasının Dövlət Himninin səsləndirilməsi, Azərbaycan xalqının Ümummilli Lideri Heydər Əliyevin və ölkəmizin ərazi bütövlüyü və suverenliyi uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Sonra Yeni Azərbaycan Partiyası Xəzər rayon təşkilatının 33 illik fəaliyyətindən bəhs edən videoçarx nümayiş olunub.

Tədbiri giriş sözü ilə açan YAP Xəzər rayon təşkilatının sədri Namiq Əhmədov bildirib ki, ölkəmizin dövlət müstəqilliyini yenidən bərpa etdiyi, mürəkkəb ictimai-siyasi proseslərin cərəyan etdiyi bir dövrdə Yeni Azərbaycan Partiyasının yaradılması xalqın sabitlik, inkişaf və milli həmrəylik arzularının təcəssümü idi. Bu mühüm addımın davamı olaraq, 1993-cü ilin iyul ayında YAP Xəzər rayon təşkilatının təsis konfransı keçirilmiş və bununla da təşkilat rəsmi fəaliyyətə başlamışdır. O qeyd edib ki, 33 il ərzində YAP Xəzər rayon təşkilatı rayonun ictimai-siyasi həyatında fəal mövqe nümayiş etdirmiş, ölkədə həyata keçirilən siyasi kursun rayon səviyyəsində dəstəklənməsi və təbliği istiqamətində mühüm rol oynamışdır.

Daha sonra Xəzər Rayon İcra Hakimiyyətinin başçısı Elşən Salahov çıxış edərək bildirib ki, 33 il ərzində YAP Xəzər rayon təşkilatı müxtəlif ictimai təşəbbüslərin həyata keçirilməsində, gənclərin və qadınların ictimai fəallığının artırılmasında, şəhid ailələri və qazilərlə bağlı sosial layihələrin reallaşdırılmasında, ətraf mühitin mühafizəsi və vətəndaş cəmiyyətinin inkişafı kimi sahələrdə mühüm işlər görmüşdür. O vurğulayıb ki, YAP Xəzər rayon təşkilatı eyni zamanda Ümummilli Lider Heydər Əliyevin siyasi irsinin və Prezident cənab İlham Əliyevin həyata keçirdiyi uğurlu islahatların təbliği istiqamətində də ardıcıl və sistemli fəaliyyət göstərir.

Tədbirdə YAP İdarə Heyətinin üzvü, Milli Məclisin deputatı, Əmək və sosial siyasət komitəsinin sədri Musa Quliyev, Milli Məclisin deputatı Soltan Məmmədov, YAP Mərkəzi Aparatının Təşkilat şöbəsinin müdir müavini Rafael Gülməmmədov və YAP İdarə Heyətinin üzvü Rauf Əliyev çıxış edərək YAP Xəzər rayon təşkilatının təsis edilməsinin 33-cü ildönümü münasibətilə partiya üzvlərini təbrik ediblər. Həmçinin, natiqlər çıxışlarında bildiriblər ki, Ümummilli Lider Heydər Əliyevin müdrik ideyaları, siyasi iradəsi və uzaqgörən qərarları nəticəsində formalaşan Yeni Azərbaycan Partiyası bu günə qədər şərəfli və zəngin inkişaf yolu keçmişdir. Qeyd olunub ki, ölkəmizin ən güclü və ən mütəşəkkil siyasi qüvvəsi kimi tanınan YAP öz fəaliyyətində daim milli maraqları prioritet hesab edərək dövlətçilik ənənələrinin qorunmasına və möhkəmləndirilməsinə töhfə verir. Bu gün həmin milli maraqlar Prezident, Müzəffər Ali Baş Komandan İlham Əliyevin rəhbərliyi ilə ən yüksək səviyyədə təmin olunur. Azərbaycanın əldə etdiyi möhtəşəm nailiyyətlər və mühüm uğurlar dövlət başçısının dəqiq planlaşdırılmış və mərhələli şəkildə həyata keçirdiyi strateji addımların, eləcə də onun hərbi-siyasi uzaqgörənliyinin real nəticəsidir.

Çıxışlardan sonra partiya sıralarına yeni qəbul olunmuş üzvlərə üzvlük vəsiqələri, rayonun ictimai-siyasi həyatında fəal iştirak edən bir qrup şəxsə isə fəxri fərmanlar təqdim edilib.

Təltifetmə mərasimindən sonra tədbirin bədii hissəsinə keçid edilərək respublikanın tanınmış incəsənət xadimlərinin iştirakı ilə konsert proqramı təqdim olunub.

Tədbir Yeni Azərbaycan Partiyasının Himninin səsləndirilməsi ilə yekunlaşıb.

Paylaş:

Baxılıb: 433 dəfə