Ortaq tarix, mədəni dəyərlər, qarşılıqlı etimad

Bakı:

25 °C

61 %

2 m/s

Əlaqə

AZ RU EN

Ana səhifə / Arxiv / Ortaq tarix, mədəni dəyərlər, qarşılıqlı etimad

Ortaq tarix, mədəni dəyərlər, qarşılıqlı etimad

03.08.2026 [18:15]

Dövlətimizin başçısı İlham Əliyev 30-31 iyul tarixlərində Qırğız Respublikasında dövlət səfərində oldu. Səfər çərçivəsində keçirilən görüşlər, imzalanan sənədlər ortaq tarixə, mədəni dəyərlərə, qarşılıqlı etimada əsaslanan Azərbaycan-Qırğızıstan münasibətlərinin gələcək inkişafı barədə aydın təsəvvür yaratdı. Səfər zamanı keçirilən Azərbaycan və Qırğızıstan Dövlətlərarası Şuranın 3-cü iclası bir daha təsdiqlədi ki, tərəflər münasibətləri yalnız dostluq və siyasi dialoq müstəvisində deyil, uzunmüddətli strateji tərəfdaşlıq modeli əsasında inkişaf etdirmək niyyətindədir və bunu real addımları ilə nümayiş etdirirlər. Prezident İlham Əliyev mətbuta bəyanatında “Bu gün biz Sizinlə dövlətlərarası münasibətləri ən yüksək səviyyəyə qaldırdıq, qarşılıqlı fəaliyyətimizin möhkəmlənməsinə birgə səyləri bir daha nümayiş etdirdik” söyləyərək onu da vurğuladı ki, müttəfiqlik münasibətləri çox böyük məsuliyyət deməkdir və biz bu məsuliyyətə hazırıq. Biz bütün təşəbbüslərdə - həm beynəlxalq platformalarda, həm də iqtisadi-ticari sahədə və təhlükəsizliyin möhkəmləndirilməsində bir-birimizi bundan sonra da dəstəkləyəcəyik. Bu gün imzalanan sənədlər zərfi qarşılıqlı fəaliyyətimizin geniş sferasını nümayiş etdirir. Əminəm ki, səfərimin nəticələrinə görə əldə olunan razılaşmalar da əvvəlkilər kimi uğurla həyata keçiriləcək. O da qeyd edildi ki, bu gün birgə Azərbaycan-Qırğız İnvestisiya Fondunun maliyyə vəsaitinin iki dəfə - 200 milyon dollara qədər artırılması barədə razılıq əldə etdik. Bu da son hədd deyil, çünki Fondun fəaliyyəti üzrə bizə nümayiş etdirilən təqdimat konkret məzmunla zənginləşir. Qırğızıstanda həyata keçirilən çoxlu layihə var və onlar birgə istehsal, yeni iş yerləri yaradır, qarşılıqlı fəaliyyətimizin iqtisadi potensialını möhkəmləndirir: “Biz, həmçinin Qarabağın bərpasına göstərilən kömək üçün daim minnətdarlığımızı ifadə edirik. Sizinlə birlikdə Ağdam rayonunda “Manas” adını daşıyan məktəbin açılışında iştirak etdik. Bu, Qırğız xalqının 30 il ərzində işğaldan zərər çəkən Qarabağın bərpası işinə böyük töhfəsi oldu”.

İki ölkə arasında humanitar əlaqələr də yüksək səviyyədədir. Dövlətimizin başçısı İlham Əliyev mətbuata bəyanatında bu məsələyə də xüsusi diqqət yönəldərək bildirdi ki, bu gün bizim danışdığımız humanitar əlaqələr – Qırğızıstanda Azərbaycanın, Azərbaycanda isə Qırğızıstanın Mədəniyyət Günləri müsbət ab-hava yaradır, ortaq köklərə malik və bir neçə beynəlxalq strukturda birləşmiş xalqlarımızın necə yaxın olduğunu bir daha nümayiş etdirir.

Qırğızıstan Prezidenti Sadır Japarov isə bu əminliyi ifadə etdi ki, səfər qardaş münasibətlərimizin möhkəmlənməsinə yeni impuls verəcək. Qırğızıstan ilə Azərbaycan bir-birini daim dəstəkləyir və qarşılıqlı maraq doğuran məsələlər üzrə mövqelərini uğurla əlaqələndirir. Məmnunluqla qeyd edirəm ki, Qırğızıstanla Azərbaycan arasında siyasi dialoq bu gün ən yüksək səviyyədədir. Müntəzəm təmaslar və qarşılıqlı etimad bu gün qurulan müttəfiqlik münasibətləri üçün möhkəm zəmin yaradır: “Biz cənab Prezidentlə Qırğızıstan-Azərbaycan əməkdaşlığına dair məsələlərin bütün kompleksi üzrə ətraflı və etimada əsaslanan danışıqlar apardıq. Bizim sədrliyimiz ilə Dövlətlərarası Şuranın 3-cü iclası keçirildi və Qərar imzalandı. Şuranın qərarlarının həyata keçirilməsinə dair informasiyanı dinlədik və birgə təşəbbüslərin yerinə yetirilməsinin gedişatını, o cümlədən Azərbaycan-Qırğızıstan Fondunun fəaliyyətini müzakirə etdik. İkitərəfli qarşılıqlı fəaliyyətin əsas istiqamətlərini nəzərdən keçirdik və tərəfdaşlığımızın inkişafına dair yeni addımları müəyyən etdik. Bugünkü danışıqların mühüm yekunu müttəfiqlik münasibətləri haqqında Müqavilənin imzalanması oldu. Bu tarixi hadisə, həqiqətən də Qırğızıstan-Azərbaycan əməkdaşlığının yeni mərhələsinin əsasını qoyur”.

Prezident İlham Əliyevin Qırğızıstana dövlət səfəri çərçivəsində imzalanan “Azərbaycan Respublikası ilə Qırğız Respublikası arasında müttəfiqlik münasibətləri haqqında Müqavilə” rəsmi Bakı ilə Bişkek arasında strateji tərəfdaşlığın daha yüksək səviyyəyə yüksəldilməsi baxımından mühüm siyasi hadisədir. Belə ki, müqavilə iki ölkə arasında mövcud olan siyasi etimadın, qarşılıqlı hörmətin və uzunmüddətli əməkdaşlıq iradəsinin hüquqi əsaslarını daha da möhkəmləndirməklə yanaşı, Azərbaycan-Mərkəzi Asiya münasibətlərinin inkişafında da yeni mərhələnin başlanğıcını ifadə edir. Müttəfiqlik münasibətləri haqqında Müqavilənin mühüm istiqamətlərindən biri regionlararası əməkdaşlığın inkişafıdır. Azərbaycanın və Qırğızıstanın müxtəlif regionları arasında birbaşa əlaqələrin qurulması, həmçinin genişləndirilməsi iqtisadi, mədəni və humanitar münasibətlərin inkişafına əlavə imkanlar yaradacaq. Bu əməkdaşlıq xalqlar arasında təmasların artmasına, biznes dairələri səviyyəsində əlaqələrin genişlənməsinə və turizm potensialının daha səmərəli istifadəsinə xidmət edəcək. Azərbaycan-Qırğızıstan əlaqələrinin uğurlu inkişafı ümumilikdə Azərbaycan-Mərkəzi Asiya ölkələri münasibətlərinin aydın mənzərəsini yaradır. Dövlətimizin başçısının sözügedən səfəri zamanı Azərbaycanın və Mərkəzi Asiya ölkələrinin Dövlət Başçılarının qeyri-rəsmi görüşünün keçirilməsi özündə mühüm məqamları ehtiva edir.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 275 dəfə