AŞ PA sədrinin səlahiyyət müddətinin artırılmasına dair təklif olunan dəyişiklik qəbul olunmayıb

Bakı:

26 °C

78 %

8 m/s

Əlaqə

AZ RU EN

Ana səhifə / Dünya / AŞ PA sədrinin səlahiyyət müddətinin artırılmasına dair təklif olunan dəyişiklik qəbul olunmayıb

AŞ PA sədrinin səlahiyyət müddətinin artırılmasına dair təklif olunan dəyişiklik qəbul olunmayıb

03.10.2009 [12:06]

Fransalı deputat Jan-Klod Minyonun hazırladığı “60 illik təcrübənin fövqündə Avropa Şurasının gələcəyi” adlı 12017 nömrəli hesabatı dinlənilib və müzakirələr aparılıb. APA-nın Avropa Şurasında akkreditə olunmuş əməkdaşının verdiyi məlumata görə, müzakirələrdə əsas diqqət AŞ PA sədri və qurumun komitə sədrlərinin səlahiyyət müddətinin iki ildən üç ilə qaldırılması ilə bağlı hesabatda yer alan təklifə yönəlib. Bu hesabatda əsas maraq doğuran məqam AŞ PA prezidenti və qurumun komitələrinin sədrlərinin səlahiyyət müddətinin yenidən iki ildən üç ilədək uzadılması məsələsidir. Məruzədə bu təklifin irəli sürülməsi AŞ PA və qurumun komitə sədrlərinin fəaliyyətinin davamlı olmasını təmin etmək məqsədi daşıdığı vurğulanır. Bir çox parlamentarilər, xüsusilə Avropa Demokrat Qrupunun (EDG) üzvləri, o cümlədən türk və azərbaycanlı deputatlar bu paraqrafı hesabatdan çıxarmaq məqsədilə ona yazılı düzəlişlər təqdim ediblər. Qeyd edək ki, gələn il AŞ PA-nın hazırkı prezidenti Luis Maria de Puçun mandatı başa çatır və prezidentliyə növbəti namizəd Avropa Demokrat Qrupunun üzvü, Türkiyənin AŞ PA-dakı nümayəndə heyətinin rəhbəri Mövlud çavuşoğludur. Türkiyəli deputatın namizədliyi Avropa Demokrat Qrupunun çərşənbə günü Strasburqda keçirilən iclasında irəli sürülüb. Təklif olunan dəyişiklik Avropa Demokrat Qrupunun ciddi narazılığına səbəb olub. Qeyd edək ki, 2009-cu ilin yanvar ayında AŞ PA sədrinin mandatının iki ilə endirilməsinə dair siyasi qrup sədrləri arasında centlmen anlaşma və yazılı razılaşma imzalanıb. Prosedura qaydalarına görə, AŞ PA-nın növbəti sədri Avropa Demokrat Qrupundan seçilməlidir.
Müzakirələrdə Azərbaycan nümayəndə heyətinin rəhbəri Səməd Seyidov bildirib ki, Azərbaycan təqribən on il əvvəl böyük ümidlər və böyük ambisiyalarla Avropa Şurasına qəbul olunub: “Biz burada dostlarımızla birgə çox işlər gördük və təbii ki, bundan qürur hissi keçiririk. Biz ölkəmizdə ölüm hökmünü ləğv etdik, bütünlüklə ölkənin qanunvericiliyini dəyişdik, QHT və vətəndaş qurumları üçün yeni ab-hava yaratdıq və bütün bunlar söz azadlığının təmin olunması istiqamətində çox vacib addımlardır. Təbii ki, bütün bunlar bu təşkilatın səyləri və dəyərləri sayəsində edilib. Mən bu təşkilatın fəaliyyətini alqışlayıram. çünki 2005-ci ildə bu qurum mənim ölkəmin bir hissəsi olan Dağlıq Qarabağa dair bəyanat qəbul etmişdi. Mən bu təşkilatı ona görə alqışlayıram ki, burada qadın hüquqlarının pozulmasına və digər belə aktlara qarşı mübarizə aparılır. Lakin təəssüflə qeyd etməliyəm ki, bununla yanaşı, digər standartlara malik olan başqa bir Avropa Şurası da var. Eyni problemlərə fərqli yanaşmaların, böyük və kiçik ölkələrə fərqli münasibət və eləcə də bu və ya digər siyasi partiyalara fərqli mövqe nümayiş etdirən Avropa Şurasını görürük. Məsələn, Avropa Demokrat Qrupu daxilindəki proseslərə baxın. Burada bəzi dostlarımız oyun getdiyi vaxtda oyunun qaydalarını dəyişməyə cəhd göstərirdilər. Bu da bu təşkilat üçün qəbuledilməzdir. ümid edirəm ki, biz qurucularımızın bizə miras qoyduğu bütün bu ali dəyərlərimizi qoruyub saxlayacağıq və biz də bunun üçün bütün əlimizdən gələni etməliyik”.
Sonda Qətnamə layihəsi bir neçə dəyişikliklərlə qəbul olunub. Hesabatda AŞ PA prezidenti və qurumun komitə sədrlərinin səlahiyyət müddətini yenidən iki ildən üç ilə qaldırmasına dair sözügedən 28.11 bəndinin ləğvinə yönəlmiş 2-ci və 10-cu dəyişiklik keçməsə də, bu bəndə edilmiş 12-ci dəyişikliklə “hər hansı aparılan dəyişiklik 2010-cu ilin yanvar ayında keçiriləcək AŞ PA-nın yeni sədrinin seçkilərindən sonra qüvvəyə minməlidir” sözləri əlavə olunub. Bununla da AŞ PA hazırkı prezidentin səlahiyyət müddətinin iki il olmasına və üç illik mandatın 2010-cu ilin yanvarından qüvvəyə minməsinə səs verib.

Paylaş:

Baxılıb: 1703 dəfə