Növbədənkənar seçki məsələsi Paşinyanın komandasında da fikir ayrılığına səbəb olub

Bakı:

25 °C

73 %

10 m/s

Əlaqə

AZ RU EN

Ana səhifə / Dünya / Növbədənkənar seçki məsələsi Paşinyanın komandasında da fikir ayrılığına səbəb olub

Növbədənkənar seçki məsələsi Paşinyanın komandasında da fikir ayrılığına səbəb olub

01.04.2021 [08:49]

Bu ilin iyununda Ermənistanda növbədənkənar parlament seçkilərinin keçiriləcəyi elan edilsə də, məğlub ölkədə siyasi böhran davam edir. Erməni mətbuatının yaydığı məlumatlara görə, böhran təkcə iqtidarla müxalifət arasında deyil, hakimiyyət daxilində də hökm sürür. Belə ki, hakim partiya və blokun seçkiqabağı kampaniyada fəaliyyət planından tutmuş proporsional siyahıya kimlərin daxil edilməsinə qədər bir çox məsələlərdə Paşinyan komandasının daxilində fikirayrılığı davam edir.
Eyni zamanda, baş nazir Nikol Paşinyan aprel ayında istefa verəcəyini bildirməklə yanaşı, növbədənkənar parlament seçkilərinə qədər hökumətə rəhbərlik edəcəyini açıqlaması, hətta seçkidə iştirak qərarı verən müxalifət partiyaları tərəfindən də narazılıqla qarşılanıb.
Digər tərəfdən, hakimiyyətə qarşı barışmaz mövqedə dayanan müxalifət partiyalarının da təmsil olunduğu “Vətənin xilası naminə hərəkat”ın parlament binası qarşısındakı çadırları özünün qərargahı elan etməsi Ermənistanda xaosun davam etdiyinə dəlalət edir.
Yerli mətbuatın yazdığına görə, prezident Armen Sarkisyanın yerli və xarici mediaya verdiyi son müsahibələrində ölkədəki durumu “böhran” kimi dəyərləndirməsi, xarici işlər naziri Ara Ayvazyanın istefa verəcəyi ilə bağlı yayılan xəbərlər də məğlub Ermənistandakı vəziyyətin stabilliyə doğru getmədiyini göstərir.
Yeri gəlmişkən, qeyd edək ki, Paşinyanın istefa verəcəyi tarix artıq açıqlanıb. Baş nazirin aparat rəhbəri Arsen Torosyan parlamentin buraxılması və növbədənkənar seçkilərin keçirilməsi məqsədilə Paşinyanın 20 aprel - 5 may tarixləri arasında istefa verəcəyini bildirib.
Bu arada “Hraparak” qəzeti yazır ki, Paşinyan hakim “Mənim addımım” blokundakı ortaqlarının demarşından qorxaraq hələlik seçki siyahısını gizli saxlayır. Qəzet bəzi mənbələrə istinadən yazır ki, N.Paşinyan siyahılar hazırlamağa və kimin hansı yerdə olacağını söyləməyə tələsmir.
Həmin qəzetin yaydığı digər məlumata görə, artıq “Çiçəklənən Ermənistan” partiyasının lideri Qagik Çarukyanın göstərişi ilə partiya təmsilçiləri də ayrı-ayrı qruplarda bölgələrə “seçkiqabağı” səfərlərə başlayıblar. Xatırladaq ki, baş nazir Paşinyan və qrupu iki həftədir regionlardadır, martın sonundan etibarən “Vətənin xilası naminə hərəkat”ın üzvləri də hakimiyyətin əleyhinə təbliğat aparmaq üçün bölgələrə yola düşüblər.
Göründüyü kimi, məğlub Ermənistanda, hakim komanda başda olmaqla, bəzi qüvvələr artıq regionlarda seçkiqabağı təşviqata başlayıblar. Buna baxmayaraq, ekspertlərin fikrincə, hökumətdə gözlənilən istefalar və prezident başda olmaqla, seçkiyə münasibətdə tərəddüdlər ölkədə siyasi böhranın daha da dərinləşdiyinə işarə edir.
Qaşqay ZİYƏDDİNOĞLU

Paylaş:

Baxılıb: 908 dəfə