"Yeni Azərbaycan"ın "Güclü dövlət naminə" təşviqat kampaniyası

Bakı:

20°C

68%

4m/s

Əlaqə

AZ RU EN

Ana səhifə / Gündəm / "Yeni Azərbaycan"ın "Güclü dövlət naminə" təşviqat kampaniyası - 13 mart

"Yeni Azərbaycan"ın "Güclü dövlət naminə" təşviqat kampaniyası - 13 mart

14.03.2009 [15:58]

“Yeni Azərbaycan” referendum üzrə təşviqat qrupu Azərbaycan Respublikasının Konstitusiyasına təklif olunan əlavə və dəyişikliklərlə bağlı 18 mart 2009-cu ildə keçiriləcək ümumxalq səsverməsi (referendum) ilə bağlı “Güclü dövlət naminə” təşviqat kampaniyasını dünən davam etdirib.
“Yeni Azərbaycan” referendum üzrə təşviqat qrupunun səlahiyyətli nümayəndələrinin və vəkillərinin iştirakı ilə “Güclü dövlət naminə” devizi altında Bakının Nərimanov, Suraxanı, Səbail, Binəqədi, Nizami, Yasamal, Nəsimi rayonlarında, Sabunçu rayonunun Zabrat qəsəbəsində, Qaradağ rayonunun Lökbatan qəsəbəsində, Sumqayıt şəhərinin Corat qəsəbəsində, Sumqayıt şəhərində məskunlaşmış Qubadlı rayonundan olan məcburi köçkünlərlə, Xırdalan şəhərində, Saatlı şəhərində və rayonun Dəlilər və Qara Nuru kəndlərində seçicilərlə görüşlər keçirilib.
“Yeni Azərbaycan” referendum üzrə təşviqat qrupunun səlahiyyətli nümayəndələrindən YAP İdarə Heyətinin üzvü, MM-in deputatı Mixail Zabelin, YAP İdarə Heyətinin üzvü Kərim Kərimov, MM-in deputatı, YAP Siyasi Şurasının üzvü Məlahət İbrahimqızı, Əməkdar artist, bəstəkar Gövhər Həsənzadə, təşviqat qrupunun vəkillərindən YAP İdarə Heyətinin üzvləri, professor Zahid Qaralov, professor Şahlar Əsgərov, YAP Siyasi Şurasının üzvü, AMEA-nın müxbir üzvü Sudeyif İmamverdiyev, Azərbaycan Dövlət Pedaqoji Universiteinin rektoru Yusif Məmmədov, Azərbaycan Memarlıq və İnşaat Universiteinin rektoru Gülçöhrə Məmmədova və başqaları keçirilən görüşlərdə iştirak ediblər.
“Yeni Azərbaycan” referendum üzrə təşviqat qrupunun “Güclü dövlət naminə” devizi altında həyata keçirdiyi təşviqat kampaniyası qanunvericiliyə uyğun olaraq, yalnız yerli icra hakimiyyətlərinin müəyyənləşdirdiyi ünvanlarda keçirilib. Keçirilmiş bütün görüşlərdə ölkə vətəndaşlarının yüksək fəallığı və ruh yüksəkliyi müşahidə olunub. ötən dövr ərzində ölkənin bütün regionlarını əhatə etmiş kütləvi görüşlərdə iştirak etmiş ictimaiyyət nümayəndələrinin yüksək əhval-ruhiyyəsi onu deməyə əsas verib ki, insanlar Azərbaycan Respublikasının Konstitusiyasına təklif olunan əlavə və dəyişiklikləri birmənalı qaydada dəstəkləyir və müdafiə edirlər. Müşahidələr bir daha sübut edib ki, Azərbaycan vətəndaşları ötən dövr ərzində ölkədə yüksələn xəttlə davam edən inkişaf prosesinin nəticələrini özlərinin gündəlik həyatlarında nəzərə çarpacaq dərəcədə hiss edir və bunu dəyərləndirir. Azərbaycan seçicisi bu inkişafı bilavasitə Azərbaycan Respublikasının Prezidenti cənab İlham Əliyevin uğurla davam etdirdiyi və layiqincə həyata keçirdiyi islahatların bəhrəsi hesab edir. Bu səbəbdən də, hər bir seçici bu inkişafın davamlı olmasının və uğurla davam etdirilməsinin tərəfdar kimi çıxış edir, bu inkişafın davamlı olmasını nəzərdə tutan Konstitusiya islahatlarını dəstəkləyir.
Geniş ictimaiyyət nümayəndələrinin iştirakı ilə keçirilmiş bütün görüşlərdə və müzakirələrdə 101-ci maddənin 5-ci bəndinin, yəni bir şəxsin iki dəfədən artıq prezident seçilə biləməməsi məhdudiyyətinin aradan qaldırılması sosial sifariş kimi qiymətləndirilib. Bir fikir xüsusilə vurğulanıb ki, mühüm geosiyasi məkanda yerləşən və müharibə şəraitində olan Azərbaycanın gələcək inkişaf strategiyasının müəyyən olunmasında Prezidentin uzunmüddətli xidmət etməsi prinsipinin tətbiqi qaçılmazdır, zəruridir.
Azərbaycan Respublikasının Prezidenti cənab İlham Əliyevin rəhbərliyi dövründə ölkəmiz müqayisə olunmaz dərəcədə böyük uğurlar qazanıb, sürətli inkişaf yolu keçmiş və bu inkişaf bu gün də öz dinamikasını saxlamaqdadır. 2003-cü ildə prezident seçildikdən sonra Azərbaycanda Ulu öndər Heydər Əliyevin başladığı islahatları uğurla və layiqincə davam etdirən cənab İlham Əliyev çox qısa zaman ərzində inkişaf səviyyəsinə görə Azərbaycanı bölgənin lider dövlətinə çevirə bilib. Aparılan uğurlu sosial-iqtisadi və siyasi islahatlar sayəsində dünyanın nüfuzlu beynəlxalq təşkilatları Azərbaycanı öncül islahatçılar siyahısına daxil edib. Bütün sahələrdə qazandığımız nəailiyyətlər onu deməyə əsas verir ki, Azərbaycan Respublikasının Prezidenti cənab İlham Əliyev əsl Liderdir və Onun həyata keçirdiyi islahatlar, balanslaşdırılmış siyasət xalqımızı və dövlətimizi firəvan gələcəyə doğru aparır.
Təşviqat kampaniyası çərçivəsində keçirilən bütün görüşlərədə Konstitusiyaya təklif edilən hər bir əlavə və dəyişikliyin mahiyyəti barədə açıqlama verilib, geniş maarifləndirmə və izahetmə işi aparılıb. Vurğulanıb ki, mühüm siyasi kampaniya olan ümumxalq səsverməsi dövlətimizin möhkəmlənməsi baxımından çox əhəmiyyətli və tarixi hadisədir. Təklif edilən əlavə və dəyişikliyin hər biri layiqli həyat tərzimizi müəyyənləşdirən, gələcəyimiz üçün etibarlı təminat olan yeniliklərdən ibarətdir. 1993-cü ildən ötən dövr ərzində həyatımızın bütün sahələrində hiss olunan bu inkişafın qanunlarımızda əks olunması üçün Konstitusiyaya əlavə və dəyişiklərin edilməsi həyatın tələbidir.
Görüşlərdə yerli ictimaiyyət adından çıxış edən ziyalılar qeyd ediblər ki, ölkəmizdə hər bir ailə, vətəndaş bu əlavə və dəyişikliklərin mahiyyətini çox aydın başa düşür, yüksək qiymətləndirir. Dövlətçiliyin daha da möhkəmləndirilməsi, iqtisadiyyatımızın qüdrətlənməsi, ailə və uşaqların hüquqlarının hüdudlarının daha da genişləndirilməsini nəzərdə tutan yeni əlavə və təkliflərin hər biri insan hüquqları və azadlıqlarının daha da möhkəmlənməsini nəzərdə tutur. ölkə vətəndaşlarının toxunulmazlığının, din, vicdan, əqidə azadlığının və tolerantlığın Azərbaycanda illərdən bəri mövcud olmasına baxmayaraq, əlavə və dəyişikliklər bu imkanları daha da genişləndirir.
“Yeni Azərbaycan” referendum üzrə təşviqat qrupunun nümayəndələrinin iştirakı ilə keçirilmiş bütün görüşlərdə bir fikir hakim olub ki, Konstitusiyaya təklif olunan əlavə və dəyişikliklər ümumxalq mənafeyinə və dövlətçiliyimizin daha da gücləndirilməsinə xidmət edir. Azərbaycanın gələcək inkişafını düşünən hər bir ölkə vətəndaşı 18 mart 2009-cu ildə keçiriləcək ümumxalq səsverməsində fəal iştirak edəcək və Konstitusiyaya təklif edilən hər bir əlavə və dəyişikliyə özünün müsbət mövqeyini nümayiş etdirəcək.

Paylaş:

Baxılıb: 1305 dəfə