Ulu öndər Heydər Əliyev müstəqil Azərbaycanın qurucusudur

Bakı:

18°C

88%

3m/s

Əlaqə

AZ RU EN

Ana səhifə / Gündəm / Ulu öndər Heydər Əliyev müstəqil Azərbaycanın qurucusudur

Ulu öndər Heydər Əliyev müstəqil Azərbaycanın qurucusudur

20.10.2009 [02:38]

Maştağa qəsəbəsində ümummilli liderin abidəsinin açılış mərasimi keçirilib
Oktyabrın 18-də Sabunçu rayonunun Maştağa qəsəbəsində Ulu öndər Heydər Əliyevin abidəsinin açılış mərasimi keçirilib. Mərasimdə Yeni Azərbaycan Partiyasının (YAP) Sədr müavini-İcra katibi Əli Əhmədov, Milli Məclis sədrinin I müavini Ziyafət Əsgərov, ədliyyə naziri Fikrət Məmmədov, millət vəkilləri, YAP fəalları və qəsəbə ictimaiyyətinin nümayəndələri iştirak ediblər.
Mərasimi giriş sözü ilə açan Sabunçu rayon İcra Hakimiyyətinin başçısı, YAP Siyasi Şurasının üzvü Əlibaba Əliyev Ulu öndər Heydər Əliyevin Azərbaycan xalqı qarşısında misilsiz xidmətlərindən danışıb. O, bildirib ki, Heydər Əliyev hər zaman xalqımızın çətin anlarında xilaskarlıq missiyasını yerinə yetirərək Azərbaycanı təhlükələrdən qurtarıb. Məhz Ulu öndərimizin müəyyənləşdirdiyi siyasət nəticəsində bu gün Azərbaycan uğurla inkişaf edir. Ə.Əliyev qeyd edib ki, Prezident İlham Əliyev Ulu öndərimizin müəyyənləşdirdiyi siyasəti uğurla davam etdirir və bu proses ölkəmizin hərtərəfli inkişafı ilə müşayiət olunur. Onun sözlərinə görə, dövlət başçısının sərəncamı ilə Bakıətrafı qəsəbələrin sosial-iqtisadi inkişafını nəzərdə tutan dövlət proqramı uğurla icra edilir. Bunun nəticəsində Sabunçu rayonunda da böyük abadlıq və quruculuq işləri həyata keçirilir.
Milli Məclis sədrinin I müavini, YAP Siyasi Şurasının üzvü Ziyafət Əsgərov çıxışında bildirib ki, Azərbaycan xalqının Ulu öndər Heydər Əliyevə sonsuz məhəbbət və ehtiramı var. ümummilli liderimiz öz fəaliyyəti ilə xalqın bu məhəbbətini qazanıb. Ona görə də, respublikanın bütün bölgələrində Heydər Əliyevin əzəmətli abidələri ucaldılır. Heydər Əliyevin müstəqil Azərbaycanın banisi olduğunu deyən Z.Əsgərov qeyd edib ki, gənc nəsil Ulu öndərimizin fəaliyyətini dərindən öyrənməlidir. çünki bu, güclü tərbiyəvi əhəmiyyətə malikdir. “Heydər Əliyev Azərbaycanı çox çətinliklərdən xilas edib və nəticədə belə bir müstəqil, hüquqi dövlət qurub. Bu gün ölkəmiz Prezident İlham Əliyevin rəhbərliyi ilə inkişaf edir. Hər bir vətəndaş Azərbaycanın inkişafına öz töhfəsini verməlidir”, - deyə birinci vitse-spiker vurğulayıb.
Millət vəkili Eldar Quliyev çıxışında qeyd edib ki, Ulu öndər Heydər Əliyev Azərbaycanın müstəqilliyini qoruyaraq bütün təhlükələrdən xilas etdi. Onun sözlərinə görə, bu gün Azərbaycanın Cənubi Qafqazda lider dövlət olması Heydər Əliyev siyasətinin təntənəsidir.
Rayon ağsaqqalı Məmmədağa Əliyev ölkə başçısının diqqət və qayğısı sayəsində Maştağa qəsəbəsində böyük quruculuq işlərinin reallaşdığını bildirib və buna görə də, qəsəbə ictimaiyyəti adından Prezident İlham Əliyevə təşəkkür edib.
Dövlət Müstəqilliyi günündə ümummilli lider Heydər Əliyevin heykəlinin açılması rəmzi məna daşıyır. Bunu açılış mərasimindən sonra jurnalistlərlə söhbətində YAP Sədrinin müavini - İcra katibi, millət vəkili Əli Əhmədov deyib. YAP Sədrinin müavini bildirib ki, Azərbaycanın müstəqilliyinin əbədi, dönməz amilə çevrilməsi birbaşa Ulu öndər Heydər Əliyevin xidmətləri ilə bağlıdır: “Bu gün qüdrəti getdikcə daha da artan müasir Azərbaycanın bünövrəsi Heydər Əliyev tərəfindən qoyulub. Xalqımız Ulu öndərin misilsiz xidmətlərini unutmur. Onun xatirəsi ölkəmizin müxtəlif güşələrində abidələrinin açılması ilə qeyd edilir. Bu isə Azərbaycan xalqının ümummilli liderin şəxsiyyətinə ehtiramının ifadəsidir”.
N.BAYRAMLI

Paylaş:

Baxılıb: 1126 dəfə