İqtisadiyyatın diversifikasiyası ilə bağlı strateji inkişaf konsepsiyası hazırlanıb

Bakı:

12 °C

58 %

12 m/s

Əlaqə

AZ RU EN

Ana səhifə / Gündəm / İqtisadiyyatın diversifikasiyası ilə bağlı strateji inkişaf konsepsiyası hazırlanıb

İqtisadiyyatın diversifikasiyası ilə bağlı strateji inkişaf konsepsiyası hazırlanıb

17.04.2010 [15:34]

Respublikamız iqtisadi islahatları keyfiyyət və kəmiyyət baxımından daha da dərinləşdirmək və ən son texnologiyaların tətbiqinə əsaslanan innovativ iqtisadiyyatı təmin etmək niyyətindədir
Keçid iqtisadiyyatını başa vuraraq yeni inkişaf erasına daxil olan Azərbaycan bundan sonrakı mərhələdə iqtisadi islahatların kursunu keyfiyyət və kəmiyyət baxımından daha da dərinləşdirmək və ən son texnologiyaların tətbiqinə əsaslanan innovativ iqtisadiyyatı təmin etmək niyyətindədir. Bu məqsədlə hazırlanmış mükəmməl strateji iqtisadi inkişaf modelinə uyğun olaraq islahatların dinamikası daha da sürətləndiriləcək, modernizasiya tədbirlərinin miqyası genişləndiriləcək. Uzunmüddətli inkişaf strategiyasının əsas prioritetləri iqtisadiyyatın diversifikasiyasının əhatəli şəkildə həyata keçirilməsindən ibarətdir. Artıq bu istiqamətdə mühüm proqramların icrasına start verilib və əldə olunan effektiv nəticələr bunu təsdiq edir.
Prezident İlham Əliyev bildirib ki, iqtisadiyyatın şaxələndirilməsi ilə bağlı aparılan davamlı işlər respublikamızın inkişafı üçün əlverişli zəmin yaradıb və qlobal böhranın ölkəmizə təsirinin qarşısının alınmasında mühüm rol oynayıb: “Azərbaycan qarşıda duran əsas vəzifələrdən biri olan iqtisadiyyatın şaxələndirilməsi məsələlərini uğurla icra edir. Əgər belə olmasaydı, biz bu böhran aylarında özümüzü o qədər arxayın hiss etməzdik. Əgər iqtisadiyyatımız artıq şaxələndirilmiş iqtisadiyyat olmasaydı, Azərbaycan rəqabətqabiliyyətliliyinə görə, mötəbər beynəlxalq maliyyə qurumları tərəfindən MDB məkanında birinci yeri tutmazdı. Məhz ona görə, biz birinci yeri tutmuşuq ki, iqtisadiyyatımız çoxşaxəlidir, bir sektordan asılı deyildir. Neft-qaz sənayesi, güclü neft-qaz potensialımız, o sektora cəlb edilən investisiyalar, onlardan düzgün istifadə edilməsi bizə imkanlar yaratdı ki, iqtisadiyyatımızı şaxələndirək”.
Azərbaycan hökuməti iqtisadiyyatın şaxələndirilməsi ilə bağlı genişmiyqaslı tədbirləri özündə əks etdirən konseptual sənədin hazırlanmasını nəzərdə tutur. Qarşıdakı illərdə iqtisadi strategiyanın əsas hədəfləri neftdən kənar bölmələrdə diversifikasiya siyasətinin dərinləşdirilməsindən ibarət olacaq. Respublikamızın qarşıdakı illər üzrə sosial-iqtisadi inkişaf göstəricilərinə əsasən hazırlanmış proqnozlar və ssenarilər də Azərbaycanda yeni iqtisadi modelin tətbiq olunmasını ehtiva edir. Həyata keçirilən düşünülmüş iqtisadi siyasət, liberallaşmanın struktur və keyfiyyət baxımından dərinləşməsi, sahibkarlığa dövlət dəstəyinin artırılması, rəqabət qabiliyyətinin təmin olunması, ticarət qaydalarının və idxal-ixrac əməliyyatlarının sadələşdirilməsi, investorların hüquq və maraqlarının qorunması, vergi-gömrük və fiskal qanunvericiliyin təkmilləşdirilməsi və digər islahatlar iqtisadiyyatın şaxələndirilməsinin əsas komponentləridir.
Respublikamızda qeyri-neft sektorunun yüksək inkişaf perspektivləri iqtisadiyyatın diversifikasiyası üçün başlıca stimullardan biridir və yeni strateji plana əsasən, Azərbaycan yaxın onillikdə qeyri-neft məhsullarının ixracatçısı kimi dünyada böyük nüfuza malik olacaq.
Təbii ki, ilkin mərhələdə iqtisadiyyatın diversifikasiyasının sürətləndirilməsi üçün neftdən daxil olan vəsaitlərin həcmi xüsusi rol oynayacaq. Azərbaycan hökuməti zəngin neft resurslarının satışından daxil olan valyuta ehtiyatlarını səmərəli şəkildə xərcləməklə iqtisadiyyatın bütün sektorlarının dinamik inkişafı üçün əlverişli baza yaratmağa nail olub və hazırda qeyri-neft sektoru valyuta gətirə bəiləcək strateji bölməyə çevrilib. Həyata keçirilmiş məqsədyönlü investisiya proqramlarının icrası nəticəsində neftdən kənar sahələr valyutatutumlu olmaqla, gələcək iqtisadi inkişaf üçün dərin zəmin yaradır.
İqtisadiyyatın şaxələndirilməsi neft sektorundan asılılığın minimuma endirilməsinə və innovativ iqtisadiyyata keçidin təmin edilməsinə zəmin yaratmış olur. Şaxələndirmə siyasətinin başlıca tələblərindən olan biznes mühitinin daha da təkmilləşdirilməsi, xüsusi iqtisadi zonaların, sənaye şəhərciklərinin, biznes-inkubatorların yaradılması, sahibkarlığa dövlət dəstəyinin gücləndirilməsi və işgüzar əlaqələrin inkişaf etdirilməsi 2010-2015-ci illərin və sonrakı illərin əsas iqtisadi ssenarilərini təşkil edəcək.
XXI əsrin birinci onilliyində respublikamızın iqtisadi inkişafında neft gəlirləri başlıca valyuta mənbəyi olsa da, ikinci onillikdə qeyri-neft məhsullarının istehsalının və ixracının yüksəlməsi valyuta resurslarının strukturunun dəyişməsinə imkan yaradır. Yəni, iqtisadiyyatda diversifikasiya siyasətinin həyata keçirilməsi yaxın illərdə öz mühüm bəhrəsini verdikdən sonra ölkəmizin valyuta mənbələri sırasında qeyri-neft məhsuları xüsusi paya malik olacaq. Həmin perspektivli sahələr sırasında isə sənaye, informasiya-kommunikasiya texnologiyaları, beynəlxalq maliyyə bazarlarında idarəetməyə verilən qiymətli kağızlar, kənd təsərrüfatı, turizm və digər bölmələrin dinamikliyini göstərmək olar.
ümumiyyətlə, iqtisadiyyatın şaxələndirilməsi ilə bağlı sistemli tədbirlərin davam etdirilməsi Azərbaycanın yüksəkgəlirli dövlətlər qrupunda yer almasına zəmin yaratmaqla bərabər, iqtisadi artımın keyfiyyətinin prioritetliyinin təmin edilməsini də şərtləndirmiş olur. Məhz iqtisadiyyatın diversifikasiyasının genişləndirilməsi neft sektorundan asılılığın minimuma endirilməsinə və innovativ iqtisadiyyata keçidin təmin edilməsinə zəmin yaratmış olur. Azərbaycan iqtisadiyyatının yeni modelə uyğun inkişaf edərək daha keyfiyyətli və yüksək artım indikatorları ilə müşayiət olunması sosial infrastrukturun da keyfiyyətcə dəyişməsinə və modernləşməsinə səbəb olacaq. Respublikamızın qarşıdakı mərhələdə inkişaf ssenarilərinin reallaşması isə Azərbaycanın yüksək gəlirlərə malik, yaxşı infrastrukturlu və zəngin insan kapitalına sahib olan bir ölkə kimi tanınmasına səbəb olacaq.
Elbrus CƏFƏRLİ

Paylaş:

Baxılıb: 1232 dəfə