Türkiyə-Azərbaycan birliyi bölgədə sülhün qarantıdır

Bakı:

27 °C

66 %

1 m/s

Əlaqə

AZ RU EN

Ana səhifə / Gündəm / Türkiyə-Azərbaycan birliyi bölgədə sülhün qarantıdır

Türkiyə-Azərbaycan birliyi bölgədə sülhün qarantıdır

18.05.2022 [09:54]

Mustafa Şentop: Qlobal iştirakçılar regional problemlərin həlli yolunu tapmırlar

NURLAN

Azərbaycanın xarici siyasət kursu çoxvektorludur və milli maraqlara əsaslanır. Məqsəd ikitərəfli və çoxtərəfli münasibətləri inkişaf etdirmək, dostların və tərəfdaşların sayının artmasına, ölkənin beynəlxalq mövqeyinin möhkəmlənməsinə nail olmaqdır. Bunun üçün ayrı-ayrı ölkələrlə münasibətlərin gücləndirilməsi ilə yanaşı, beynəlxalq təşkilatlarda uğurlu təmsilçiliyə də xüsusi diqqət yetirilir. Bu baxımdan, parlament diplomatiyası mühüm əhəmiyyətə malikdir.

Prezident İlham Əliyev VI çağırış Milli Məclisin ilk sessiyasında çıxışı zamanı Azərbaycan parlamentinin milli maraqların qorunmasında, beynəlxalq müstəvidə səmərəli iş aparılmasında fəal olmasının vacibliyini diqqətə çatdırmışdı. Bu istiqamətdə çoxşaxəli fəaliyyət davam etdirilir. Xatırlatmaq yerinə düşər ki, 2021-ci il iyul ayının 27-də Milli Məclisdə Azərbaycan, Türkiyə və Pakistan parlament sədrlərinin üçtərəfli görüşündə Bakı Bəyannaməsi imzalanıb. Şübhəsiz ki, bu, tarixi-mənəvi və siyasi-strateji baxımdan olduqca mühüm əhəmiyyətə malikdir, eləcə də dost, qardaş və strateji tərəfdaş olan üç ölkə arasında çoxşaxəli münasibətlərin yeni mərhələdə daha da möhkəmləndirilməsinə xidmət edən, tərəflər üçün yeni perspektivlər yaradan amildir. Tərəflər arasında parlamentlərarası üçtərəfli əməkdaşlıq formatının təsis edilməsi təkcə qanunverici hakimiyyətlər arasında münasibətlərin inkişafı baxımından müstəsna önəm daşımır, eyni zamanda, siyasi məzmuna malik olmaqla strateji işbirliyinin güclənməsinə töhfədir.

Bu gün də parlamentlərarası əməkdaşlıq çərçivəsində təmaslar uğurla davam etdirilir. Yeri gəlmişkən, Milli Məclisdə İqtisadi Əməkdaşlıq Təşkilatı Parlament Assambleyasının (İƏT PA) Üçüncü Ümumi Konfransının keçirilməsi də bu baxımdan önəmə malikdir. Çıxışlarda qeyd edildiyi kimi, Azərbaycan İƏT PA-nın fəaliyyətinin gücləndirilməsində, təşkilata üzv ölkələrlə ikitərəfli və çoxtərəfli əməkdaşlığın genişləndirilməsində maraqlıdır. Ölkəmiz 2021-ci ildə İƏT PA-nın nizamnaməsini ratifikasiya edib. Təşkilata sədrliyin Azərbaycana keçməsi isə İƏT PA-nın fəaliyyətinin gücləndirilməsi üçün müəyyən edilmiş prioritetlərin reallaşdırılması baxımından əhəmiyyətlidir. İƏT PA-nın Üçüncü Ümumi Konfransında Bakı Bəyannaməsi imzalanıb. Baş katib Tahir Hussain Bəyannamənin imzalanması münasibətilə iştirakçıları təbrik edib.

Yeri gəlmişkən, Türkiyə Böyük Millət Məclisinin sədri Mustafa Şentop deyib ki, “İqtisadi Əməkdaşlıq Təşkilatı Parlament Assambleyasının Üçüncü Ümumi Konfransı çərçivəsində dost, qardaş Azərbaycanda olmaqdan şərəf duyuram”. O, “parlament diplomatiyasının regional inteqrasiya və inkişafa töhfə verəcəyinə inanırıq” ,- deyə vurğulayıb. M.Şentop birgə hərəkət etməyin vacibliyindən, Türkiyənin bu istiqamətdə çoxtərəflilik prinsipini dəstəkləməsindən bəhs edib: “İƏT-də əlaqələri güclü şəkildə inkişaf etdirmək vacibdir. Qlobal iştirakçılar regional problemlərin həlli yolunu tapmırlar. Onlar problemləri gərginləşdirəcək qərarlar qəbul edirlər. Bu müdaxilələr heç bir ölkəyə sülh gətirməyib. Bizim bunlardan dərs çıxarmağımız vacibdir”.

Reallıq budur ki, Azərbaycan ilə Türkiyə regional və beynəlxalq təhlükəsizliyə dair məsələlərdə həm əməkdaşlığın, həm də həmrəyliyin təmin olunmasına mühüm töhfə verirlər. İki ölkə, eyni zamanda, bölgədə yeni geosiyasi nizamın yaradılmasında fəal rol oynayırlar. Tərəflərin mövqeyi aparıcı və həlledicidir.

Ümumiyyətlə, Türkiyə ilə Azərbaycan arasındakı dostluq, qardaşlıq və strateji tərəfdaşlıq münasibətləri parlament diplomatiyasının da uğurla həyata keçirilməsini mümkün edir. Qarşılıqlı səfərlərin həyata keçirilməsi, əməkdaşlığın əhatə dairəsinin genişləndirilməsi bu sahədə yeni perspektivlər yaradır. Həm Azərbaycanın, həm də Türkiyənin iqtisadi imkanlarının artması, regional və beynəlxalq müstəvidə mövqelərinin möhkəmlənməsi xalqlarımız, dövlətlərimiz üçün yeni strateji üstünlüklər yaratmaqla yanaşı, parlamentlərarası əlaqələrin də effektiv olmasını şərtləndirir. Bütövlükdə, bir millətin iki dövləti sıx birlik - sarsılmaz həmrəylik nümayiş etdirir. Və bu reallıq fonunda ortaq siyasi iradə - birgə strateji fəaliyyət ölkələrimizə mühüm üstünlüklər qazandırır.

Paylaş:

Baxılıb: 923 dəfə