Prezident İlham Əliyev Qaradağ rayonunda "AAC" müasir tikinti materialları zavodunun açılışında iştirak edib

Bakı:

11 °C

87 %

8 m/s

AZ RU EN

Ana səhifə / Gündəm / Prezident İlham Əliyev Qaradağ rayonunda "AAC" müasir tikinti materialları zavodunun açılışında iştirak edib

Prezident İlham Əliyev Qaradağ rayonunda "AAC" müasir tikinti materialları zavodunun açılışında iştirak edib

27.12.2011 [22:13]

Azərbaycan Respublikasının Prezidenti İlham Əliyev dünən Qaradağ rayonunda “AAC” müasir tikinti materialları zavodunun açılışında iştirak edib.
Məlumat verilib ki, tikintisinə 2008-ci ilin mayında başlanılan və müasir standartlara cavab verən zavodun ümumi sahəsi 10 hektardır. Burada məsaməli beton, yandırılmış və sönmüş əhəng istehsalı və kvars qumunun yuyulması sahələri yerləşir.
Qeyd edilib ki, zavodun ərazisində xammal və hazır məhsul anbarları, inzibati bina, dəmir yolu xətti, nəqliyyat vasitələrinin saxlanılma və texniki xidmət sahəsi və digər təsərrüfat obyektləri yerləşir. İstehsal olunan məhsulların yüksək standartlara cavab verməsini təmin etmək üçün zavodda ən son mikrobioloji, fiziki-kimyəvi avadanlıqla təchiz olunan laboratoriya da fəaliyyət göstərir.
Bildirilib ki, zavodun elektrik təchizatı üçün müstəqil yarımstansiya quraşdırılıb. Bu isə yüksək keyfiyyətli, fasiləsiz elektrik enerjisi ilə təminata şərait yaradır. Zavodun ərazisində yaşıllıqlar salınıb, müasir işıqlandırma sistemi quraşdırılıb.
Azərbaycan Prezidentinə məlumat verilib ki, zavodun tikintisində İqtisadi İnkişaf Nazirliyinin Sahibkarlığa Kömək Milli Fondunun ayırdığı 10 milyon manat güzəştli kreditdən istifadə olunub.
Qeyd edilib ki, “Qobustan” brendi ilə beynəlxalq standartlara uyğun yandırılmış və sönmüş əhəng məhsulları və məsaməli beton blokları zavodun ayrı-ayrı istehsal sahələrində hazırlanır. Yüksək texnologiyalı bu müəssisə Qafqaz regionunda yalnız Azərbaycanda fəaliyyət göstərir.
Dövlətimizin başçısı yandırılmış və sönmüş əhəng istehsalı sahəsini işə salıb.
Məlumat verilib ki, xammal əhəng anbarından istehsal sahəsinə yönəldilməmişdən əvvəl yuyulma prosesindən keçir, sonra qapalı şəkildə emal olunaraq ekoloji cəhətdən təmiz məhsul əldə olunur. İstehsal prosesi beynəlxalq standartlara uyğun, ekoloji cəhətdən təmiz və ətraf mühitə ziyansız şəkildə həyata keçirilir. Bu istehsal sahəsində 100 ton yandırılmış və 120 ton sönmüş əhəng istehsal edilir.
Hazır məhsulların nümunələrinə baxan dövlətimizin başçısına məlumat verilib ki, yandırılmış və sönmüş əhəngdən tikinti, metallurgiya, mədən və qida sənayesində geniş istifadə olunur. Zavodda emal və istehsal prosesində istifadə olunan texnika və avtomobillər də dünyanın aparıcı şirkətlərinin istehsalıdır. Burada da keyfiyyət və ekoloji təmizlik əsas götürülüb.
Sonra Prezident İlham Əliyev məsaməli beton istehsalı sahəsinin fəaliyyəti ilə tanış olub.
Zavodun maketinə baxan Azərbaycan Prezidentinin diqqətinə çatdırılıb ki, istehsal prosesində yerli xammal olan kvars qumu və əhəng daşından istifadə edilir. Xammal yerli Umbakı kvars qumu yatağından birbaşa zavoda gətirilir. Əhəng daşı isə Qazax rayonunda yerləşən karxanadan dəmir yolu ilə müəssisəyə çatdırılır.
Prezident İlham Əliyev məsaməli beton istehsalı sahəsinin fəaliyyətindən bəhs edən video-çarxa baxıb.
Bildirilib ki, bütün istehsal prosesi avtomatlaşdırılmış texnologiya əsasında həyata keçirilir. Hazırda bu sahənin istehsal gücü gün ərzində 600 kubmetr təşkil edir. Müasir tələblərə cavab verən avadanlıqla təchiz edilmiş laboratoriya vasitəsilə xammalın və hazır məhsulun keyfiyyətinə tam nəzarət edilir. Bu da məhsulun müasir standartlara uyğun istehsalına və keyfiyyətinə təminat yaradır.
Dövlətimizin başçısı istehsal sahəsini işə salıb.
Prezident İlham Əliyev estakadadan istehsal prosesini izləyib.
Bildirilib ki, istehsal olunan məsaməli beton blokları istilik keçirməmək xüsusiyyətinə görə kərpicdən 6 dəfə üstün, ekoloji baxımdan təhlükəsiz, yanğına və zəlzələyə davamlıdır. Yüngül çəki və dəqiq ölçüləri olan bu beton bloklar iqtisadı cəhətdən daha qənaətlidir. Bu müəssisə daxili bazar üçün məhsul istehsal etməklə yanaşı, gələcəkdə xarici ölkələrə də ixracı nəzərdə tutur.
Bildirilib ki, zavodda peşəkar kadr heyəti formalaşıb. Bu məqsədlə əməkdaşlar xarici ölkələrin müvafiq müəssisələrində təlim kurslarında iştirak ediblər. Hazırda zavodda 130 nəfər işləyir. Onların orta aylıq əməkhaqqı 760 manatdır.
Zavodun fəaliyyətindən razılığını bildirən Prezident İlham Əliyev tapşırıq və tövsiyələrini verib.

Paylaş:

Baxılıb: 967 dəfə