Asiya və Dünya Bankının Azərbaycanda “yaşıl” hədəfləri...

Bakı:

17 °C

94 %

3 m/s

Əlaqə

AZ RU EN

Ana səhifə / İqtisadiyyat / Asiya və Dünya Bankının Azərbaycanda “yaşıl” hədəfləri...

Asiya və Dünya Bankının Azərbaycanda “yaşıl” hədəfləri...

31.08.2024 [08:15]

Hər iki maliyyə institutu “yaşıl enerji” sektoruna investisiyalar yatırmağı planlaşdırır

AİB maliyyə dəstəyi göstərməyə hazırdır

Azərbaycan Asiya İnkişaf Bankı (AİB) ilə “yaşıl enerji sektoruna xarici investisiyaların cəlb edilməsi imkanlarını müzakirə edib. İqisadiyyat Nazirliyində keçirilən görüşdə AİB-in Şərqi, Mərkəzi və Qərbi Asiya komandasının enerji direktoru Junho Hvanq bildirib ki, Azərbaycanda bərpa olunan enerji mənbələrinin istehsalı üçün zəruri müasir infrastrukturların qurulması və istehsalın genişləndirilməsi, habelə “yaşıl enerji” ixracını təmin edən dəhlizlərin yaradılmasında bank öz maliyyə dəstəyini göstərməyə hazırdır.

Azərbaycanla 25 ilə yaxındır ki, infrastruktur, nəqliyyat, su təchizatı və enerji, maliyyə, təhsil və səhiyyə sektorlarında müxtəlif layihələrin maliyyələşdirilməsində yaxın tərəfdaş kimi təmsil olunan Asiya Bankı bu müddət ərzində ölkəmizin iqtisadiyyatına 4,2 milyard dollar həcmində sərmayə yatırıb. Hazırda isə AİB-in gündəliyində yeni enerji mənbələrinin maliyyələşdirilməsi dayanır, Azərbaycan hökuməti ilə bank arasında 2024-2026-cı illərə dair əməkdaşlıq strategiyasına əsasən bərpaolunan enerji və “yaşıl nəqliyyat” sahələrinin maliyyələşdirilməsinə dair sazişin imzalanması nəzərdə tutulur. Bank xüsusilə də işğaldan azad olunmuş ərazilərdə hidroelektrik stansiyaların tikilməsinə sərmayə qoyması gündəlikdə durur. Bərpa olunan enerji mənbələrinin ən zəngin ünvanlarından biri azad olunmuş Qarabağ və Şərqi Zəngəzur bölgəsidir. Bu bölgədə su elektrik enerjisi baxımından nəhəng potensiala malikdir. Ortamüddətli inkişaf konsepsiyasına əsasən, bu ərazilər Yaşıl Enerji Zonası elan edilib və Yaponiyanın TEPSCO şirkəti müxtəlif ssenarilər tətbiq edilməklə ərazilərin enerji tələbatı modelləri hazırlanıb. AİB-in əsas səhmdarı olan Çin bu bölgədə resursların potensialını nəzərə alaraq həm bankın donorluğu, həm də birbaşa öz maliyyəsi hesabına sərmayələr yatırmağı planlaşdırır. Bir neçə ay əvvəl “China Gezhouba Group” ilə Azərbaycan arasında imzalanmış Anlaşma Memorandumu da həmin hədəflərin bir hissəsini əhatə edir. Bundan başqa, “China Energy” şirkəti ilə enerji saxlanc sistemləri, “yaşıl hidrogen”in istehsalı və ixracı, qabaqcıl ötürücü və paylayıcı şəbəkə texnologiyaları və digər prioritet istiqamətlər üzrə birgə əməkdaşlıq imkanlarını da dəyərləndirilməkdədir.

AİB həmçinin “Xəzər-Avropa İttifaqı Yaşıl Enerji Dəhlizi”nin yaradılmasından bəhs edilib. Bildirilib ki, bu layihələr bərpa olunan enerji sahəsində geniş əməkdaşlığı təşviq edir və ölkəmiz Çin şirkətləri ilə “yaşıl enerji” tərəfdaşlığının qurulmasında maraqlıdır.

Asiya Bankının prezidenti Masatsuqu Asakava bildirib ki, AİB Asiya və Sakit Okean regionu üçün iqlimi dəstəkləyən bank kimi xidmət göstərməyə tam sadiqdir və Bank 2030-cu ilə qədər 100 milyard dollar həcmində iqlim maliyyələşdirməsini təmin etməyi hədəfləyir: Azərbaycan hökumətinin 2030-cu ilə qədər bərpaolunan enerjinin payını 30 faizə çatdırmaq məqsədini nəzərdə tutan təmiz enerjidə keçid istiqamətində inamlı səylərini dəyərləndirən Bank bu istiqamətdə ölkəmizi dəstəkləməyə davam edəcəkdir. AİB prezidentinin sözlərinə görə, Azərbaycan həmçinin dayanıqlı şəhər nəqliyyatı üzrə e-mobillik, dəmir yollarının rəqəmsallaşdırılması, sürətli dəmir yolu, metro sisteminin təkmilləşdirilməsi, dəniz suyunun duzsuzlaşdırılması və təhlükəsiz su təchizatının təmin edilməsi kimi bir sıra innovativ təşəbbüslərə diqqət yetirir. Bank “yaşıl enerji”, su resursları, bağlantıların yaradılması və iqlimə davamlı infrastrukturun prioritetləşdirilməsi üçün öz dəstəyini təklif edir.

Əsas donor...

Dünya Bankı (DB) da Azərbaycanda bərpa olunan enerji mənbələrinə (BOEM) sərmayə qoyuluşunda əsas donor kimi çıxış etmək niyyətini bəyan edib. Bank “Azərbaycan 2030: sosial-iqtisadi inkişafa dair Milli Prioritetlər”in 5-ci istiqaməti olan “təmiz ətraf mühit və yaşıl artım ölkəsi” hədəfinin reallaşmasına töhfə verəcəyini bəyan edib. Bankın Avropa və Mərkəzi Asiya regionu üzrə vitse-prezidenti Antonella Bassani qeyd edib ki, ölkəmizdə enerji keçidinin bərpa olunan enerji və enerji səmərəliliyi komponentlərinə Dünya Bankının dəstəyinin artırılması, COP29 tədbiri ilində Azərbaycanın yaşıl sektorlarına sərmayə qoyuluşları nəzərdən keçiriləcək və bankın donorluğu təmin olunacaq.

DB-nin əsas maliyyə strukturlarından biri olan Beynəlxalq Maliyyə Korporasiyası arasında imzalanmış Azərbaycanda bərpa olunan enerji sahəsinin inkişafı məqsədi ilə dənizdə külək enerjisi resursundan istifadə üzrə əməkdaşlığa dair anlaşma memorandumu bu sahədə ilkin sərmayə proqramı hesab edilə bilər.

Ümumilikdə, Dünya Bankı 2027-ci ilədək ölkəmizdə 8 külək və Günəş elektrik stansiyalarının qurulması və enerji sisteminə inteqrasiyası məqsədilə maliyyə dəstəyini göstərəcək. Həmçinin, işğaldan azad olunmuş ərazilərdə bərpa olunan enerji mənbələrinə sərmayələrin yönəldilməsi, “ağıllı şəhər və ağıllı kənd” konsepsiyalarının tətbiqində “yaşıl texnologiyalar”ın və “yaşıl enerji zonası” layihələrinin icrasında da yaxından iştirakını etmək marağını ifadə edib.

ELBRUS CƏFƏRLİ

Paylaş:

Baxılıb: 761 dəfə