“Rəqəmsal qızıl”ın dəyəri 100 min dollara çatıb

Bakı:

18 °C

82 %

3 m/s

Əlaqə

AZ RU EN

Ana səhifə / İqtisadiyyat / “Rəqəmsal qızıl”ın dəyəri 100 min dollara çatıb

“Rəqəmsal qızıl”ın dəyəri 100 min dollara çatıb

14.05.2025 [09:11]

“Bitcoin” yığımı investorlar üçün cəlbedici alətə çevrilməkdədir

Dünyada ən bahalı kriptovalyuta (rəqəmsal pul) olan “Bitcoin”in dəyəri yenidən artaraq rekordu təzələyib. Ötən həftənin sonlarında virtual pul bazarında “Bitcoin”in qiyməti 100 min dollara çatıb. Son 3 gündə qlobal bazarlarda kriptocüzdan sahiblərinin aktivləri bu valyuta ilə kəskin dolub. “Bitcoin”in bahalaşması onun bazar dəyərini və əməliyyatlar üzrə dövriyyəsini də yüksəldib. Hazırda dövriyyədə olan bu virtual pulların ümumi dəyəri 2 trilyon dollara yaxındır. Yeri gəlmişkən, “Bitcoin”in dəyəri dolların dəyərindəki dəyişiklikdən də asılı olur. Əgər dolların qlobal dəyəri azalarsa, “Bitcoin” bir qədər də bahalaşır. ABŞ-ın Federal Ehtiyatlar Sisteminin (FED) ötən ilin sonlarından etibarən yürütdüyü monetar siyasət bu kripovalyutanın dəyərinə davamlı olaraq təsir edir.

Trampın tarif rejimini yumşaltması virtual pula yeni dəyər qazandırıb

Ekspertlər “Bitcoin”in qiymət artımının siyasi amillərlə bağlılığını istisna etmir. ABŞ Prezidenti Donald Trampın kriptovalyuta tərəfdarı kimi tanınması və yeni hüquqi-iqtisadi mühit yaratması virtual pul alətlərinin indeks göstəricilərini yaxşılaşdırıb. Xüsusilə də Qiymətli Kağızlar və Birjalar Komissiyasına (SEC) təyin edilən yeni rəhbər rəqəmsal aktivlər üzrə peşəkar kadrlardandır. Yeri gəlmişkən, rəqəmsal valyutanın martın ilk ongünlüyündə bahalaşmasına təsir göstərən amillərdən biri Donald Trampın bir ay əvvəl elan etdiyi kəskin tarif siyasətindən imtina edərək ticari rejimi yumşaldacağına dair bəyanatı da mühüm təsir göstərməkdədir.

Xüsusilə də, Trampın Böyük Britaniya ilə iri ticarət müqaviləsi bağlanacağına dair açıqlamasından sonra yeni bazar sıçrayışları baş verib. İnvestorlar prezidentin bu bəyanatını beynəlxalq gərginliyin azalacağına siqnal kimi qəbul ediblər və kriptobazarda son bir ayda müşahidə edilən psixoloji təlaş aradan qalxıb. Eləcə də ABŞ və Çin arasında yaxın günlərdə gözlənilən danışıqlar da müsbət siqnallar verməkdədir. Bir sözlə, kriptovalyuta bazarında volotillik investorların davranışına ciddi təsir edir və kriptoyığımlarda həssaslığı artırır.

Rəqəmsal pula marağın artması və yığım aktivi kimi saxlanması üçün etibarlı alətə çevrilməsi birja cüzdanlarında da dayanıqlılığı möhkəmləndirir. Artıq iri səhmdarlar arasında “Best Wallet” kriptocüzdanına xüsusi maraq yaranıb. Eləcə də “Ethereum”, “XRP”, “Dogecoin” və “$TRUMP” kimi altkoinlərə də tələbat artmaqdadır.

Göründüyü kimi “Bitcoin” üçün əlverişli bir mühit yaranıb, “rəqəmsal qızıl” kimi statusu möhkəmlənir və onun maliyyə dünyasında əhəmiyyətli bir aktivə çevrilməsi qarşısıalınmaz prosesdir.

Azərbaycanda kriptovalyutalar riskli hesab edilir

Azərbaycanda blokçeyn texnologiyalarından istifadəyə müsbət yanaşılsa da, kriptovalyuta sektoru yüksək riskli investisiya aktivi hesab edilir. Bu sahədə hüquqi infrastrukturun olmaması belə sərt xarici şoklar yarada, daxili valyuta bazarında sabitlik pozula bilər. Eyni zamanda, hazırda ölkəmizdə kriptovalyutaların onlayn alışı və satışı halları mövcud olmasına baxmayaraq, bu risk alətlərinin tənzimlənməsi üçün qəti addımların atılması da aktualdır. Mərkəzi Bank bu sahədə tənzimlənmənin aparılması üçün müxtəlif ssenarilər işləyir və öz strategiyası çərçivəsində bu istiqamətdə tədbirlər görmək niyyətindədir.

Azərbaycan bu virtual valyutanı emissiya etməyib və hesablaşmalarda, bazar əməliyyatlarında kriptovalyutadan istifadə olunmur. Ölkəmiz xarici valyuta seqmentlərinə, ələlxüsus da kriptobazarlara inteqrasiya olunmayıb, yerli səhmdarların və investorların, qiymətli kağızlar bazarının emitentlərinin virtual alətlərlə əməliyyatları həyata keçirilmir.

ELBRUS

Paylaş:

Baxılıb: 624 dəfə