Almaniyanın Frankfurt şəhərində IMEX sərgisi açılıb

Bakı:

18 °C

77 %

1 m/s

Əlaqə

AZ RU EN

Ana səhifə / İqtisadiyyat / Almaniyanın Frankfurt şəhərində IMEX sərgisi açılıb

Almaniyanın Frankfurt şəhərində IMEX sərgisi açılıb

16.05.2018 [09:37]

Azərbaycan Konqreslər Bürosu iştirakçı ölkələr arasında ən yaxşı nümayiş stendinə görə təşəkkür məktubu alıb
Mayın 15-dən Almaniyanın Frankfurt şəhərindəki “Frankfurt Messe”də dünyanın ən nəhəng turizm sərgilərindən biri olan IMEX sərgisi açılıb.
AZƏRTAC xəbər verir ki, dünyanın müxtəlif ölkələrindən yüzlərlə təşkilatın iştirak etdiyi bu sərgidə respublikamızı Azərbaycan Konqreslər Bürosu (AzKB) uğurla təmsil edir. Mayın 17-dək davam edəcək sərgidə Azərbaycan Konqreslər Bürosunun stendi ilk gündən təşkilatçılar və ziyarətçilər tərəfindən böyük maraqla qarşılanıb. IMEX rəhbərliyinin Azərbaycan Konqreslər Bürosuna ünvanladığı təbrik məktubu bunun əyani təsdiqidir. Məktubda Azərbaycan Konqreslər Bürosuna yüksək səviyyədə iştirakına görə minnətdarlıq edən IMEX-in təşkilati və satış işləri üzrə baş meneceri Oliver Bailey Büronu sərginin ilk günündən əldə etdiyi uğura görə təbrik edib.
İMEX sərgisi hər il dünyanın MİCE sənayesinin bütün sektorlarından 3500-dən çox təchizatçını Frankfurtda bir araya gətirir.
Qeyd edək ki, 2013-cü ildən fəaliyyətə başlayan Azərbaycan Konqreslər Bürosunun vəzifələrindən biri Azərbaycana irimiqyaslı beynəlxalq tədbirləri cəlb etmək və ölkəmizin beynəlxalq səviyyəli tədbirlər məkanı kimi təbliğidir. Bu məqsədlə Büro dünyanın müxtəlif ölkələri ilə işləyir, hədəf bazarlarla yaxın əlaqələr qurur, bazar iştirakçılarını ölkəyə cəlb etməyə çalışır, əməkdaşlıq üçün beynəlxalq konqres və seminarlarda fəal iştirak edir.
Azərbaycan Konqreslər Bürosu ölkəmizdə işgüzar turizmin, həmçinin digər iqtisadi sektorların inkişafı üçün strategiya hazırlayaraq icra edir. Qurumun başlıca məqsədi dəyərli məlumat və dəstək xidmətlərini təmin etməklə, habelə yerli sənaye tərəfdaşlarının maraqlarını qorumaqla Azərbaycanın nüfuzunu dünya səviyyəli toplantı və görüş məkanı kimi möhkəmləndirməkdir.
Prezident İlham Əliyevin “Azərbaycan Respublikasında turizmin inkişafı ilə bağlı əlavə tədbirlər haqqında” 2016-cı il 1 sentyabr tarixli Sərəncamına əsasən Bakı şəhərində ticarət festivalının təşkili Azərbaycan Konqreslər Bürosu tərəfindən həyata keçirilir. 2017-ci il aprelin 10-dan mayın 10-dək Azərbaycanda ilk dəfə olaraq Bakı Şopinq Festivalı keçirilib. Bu layihə ötən ilin payızında da (15 oktyabr-15 noyabr) uğurla təkrarlanıb. Hər iki festival şəhərimizin qonaqları, yerli alıcılar və ticarət sektorunun iştirakçıları tərəfindən çox böyük maraq və məmnuniyyətlə qarşılanıb. Üçüncü şopinq festivalı bu il mayın 1-dən start götürüb. Festival mayın 31-dək davam edəcək.

Paylaş:

Baxılıb: 1016 dəfə