Şərqi Avropa Ölkələrinin Parlament Assambleyasının ilk iclasının mart ayında keçirilməsi gözlənilir

Bakı:

25 °C

50 %

6 m/s

AZ RU EN

Ana səhifə / Müsahibə / Şərqi Avropa Ölkələrinin Parlament Assambleyasının ilk iclasının mart ayında keçirilməsi gözlənilir

Şərqi Avropa Ölkələrinin Parlament Assambleyasının ilk iclasının mart ayında keçirilməsi gözlənilir

22.01.2010 [13:43]

Asəf Hacıyev: Yeni yaradılan təşkilat Azərbaycana öz sözünü demək üçün mühüm tribunadır
Məlum olduğu kimi, bu günlərdə Şərqi Avropa ölkələrinin Parlament Assambleyasının yaradılması üzrə işçi qrupun Brüsseldə iclası keçirilib. Həmin iclasda Milli Məclisin deputatı Asəf Hacıyev iştirak edib. Bizimlə söhbətində A.Hacıyev bu barədə ətraflı məlumat verib:
- Bildiyiniz kimi, Avropa Birliyinin “Şərq tərəfdaşlığı” proqramı çərçivəsində belə bir qərar qəbul olunub ki, Şərqi Avropa ölkələrinin Parlament Assambleyası yaradılsın. Parlament Assambleyasına “Şərq tərəfdaşlığı”na daxil olan altı ölkədən - Ukrayna, Belarus, Moldova, Azərbaycan, Gürcüstan və Ermənistan olan, hər birindən 10 deputat daxil olacaq. Qarşı tərəf isə Avropa Parlamentidir. 60 deputat da Avropa Parlamentindən bu assambleyaya qatılacaq və 120 nəfərlik bir qurum olacaq. Sadəcə, orada Belarusla bağlı müəyyən problem var.
- Belarusla əlaqədar hansı problem mövcuddur?
- Bildiyiniz kimi, Belarusdakı seçkiləri Avropa Birliyi, Avropa Parlamenti və Avropa Şurası tanımayıb. Ona görə də, bu ölkədən deputatları dəvət etmək çətin olacaq. Ancaq ilkin qərar ondan ibarətdir ki, hələlik oradan 5 müxalifət partiyasının üzvləri dəvət edilsin. Qeyd edim ki, bu yöndə müzakirələr gedir və bu barədə hələlik dəqiq qərar qəbul olunmayıb. Onu da nəzərinizə çatdırım ki, mart ayında assambleyanın ilk iclasının keçirilməsi gözlənilir. Ola bilər ki, bu qurumda iki həmsədr olacaq. çox güman ki, bunlardan biri Avropa Parlamentinin, biri isə assambleyaya üzv olan 6 ölkədən birinin nümayəndəsi olacaq. Bununla yanaşı, assambleyanın 5 vitse-prezidenti də seçiləcək. Qeyd edim ki, bu günlərdə assambleyanın işçi qrupunun Belçikanın paytaxtı Brüssel şəhərində iclası keçirilib və orada “Şərq tərəfdaşlığı” proqramına uyğun olaraq 4 məsələ qoyulub. Birincisi, demokratiya və dövlət idarəçiliyinin gücləndirilməsi, ikincisi, enerji təhlükəsizliyi, üçüncüsü, iqtisadi əməkdaşlıq və Avropaya yaxınlıq, dördüncüsü, xalqların bir araya gəlməsi, xalqlar arasında münasibətlərin yaxşılaşdırılması məsələsi. Bu məsələlərlə də bağlı mən çıxışım zamanı Azərbaycan tərəfinin mövqeyini çatdırmışam. Xüsusilə, iqtisadi əməkdaşlıq məsələsi ilə bağlı qeyd etmişəm ki, hər bir ölkə ilə əməkdaşlığa hazırıq, yalnız Ermənistandan başqa. Yəni, nə qədər ki, Azərbaycan torpaqları işğal altındadır, Ermənistanla əməkdaşlıq ola bilməz. Bu, dövlətimizin dəyişməz mövqeyidir. Ona görə də, bir daha onların nəzərinə çatdıraraq bildirmişəm ki, gələcəkdə belə bir problemlə rastlaşıla bilər...
- Qeyd etdiniz ki, yeni yaradılan təşkilatda Azərbaycan Ermənistanla əməkdaşlıq etməyəcək. Bəs, bu amil qurumun gələcək taleyini sual altına almırmı?
- Bilirsiniz, bu gün Avropa Şurası Parlament Assambleyasında, Qara Dəniz ölkələri İqtisadi Əməkdaşlıq Təşkilatı Parlament Assambleyasında, ATƏT-in Parlament Assambleyasında, NATO-nun Parlament Assambleyasında, ümumiyyətlə, bir çox beynəlxalq və regional təşkilatların parlament assambleyalarında da həm Azərbaycan, həm də Ermənistan parlamentariləri təmsil olunur. Lakin bu o demək deyil ki, Azərbaycan Ermənistanla birbaşa əməkdaşlıq edir. Ona görə bu məsələdə heç bir ziddiyyət, problem yoxdur. Söhbət burada Parlament Assambleyasından getmir. Hətta deyərdim ki, bu assambleya çərçivəsində nə vaxtsa Qarabağ problemi də müzakirə oluna bilər. Bu, bir tribunadır, Azərbaycan da öz sözünü demək üçün hər bir tribunadan istifadə etməli və mövqeyini dünyaya çatdırmalıdır. Demək istəyirəm ki, söhbət yalnız və yalnız iqtisadi əməkdaşlıqdan gedir ki, bu da indiki şərtlər və reallıqlar daxilində real görünmür. Məsələn, ermənilər tərəfindən Bakı-Gümrü-Qars dəmir yolu layihəsi ortaya atılır. Bu, heç cür mümkün deyil. çünki biz müharibə başa çatmadığı, torpaqlar işğaldan azad olunmadığı üçün Ermənistanla əməkdaşlıq etmək istəmirik. Bu, bizim qəti mövqeyimizdir...
- Bəs assambleyanın qərargahı 6 üzv ölkədən hansında yerləşəcək?
- Assambleyanın rəsmi yığıncağı keçirilmədiyi üçün bu məsələ də tam bəlli deyil. öncə assambleyanın nizamnaməsi hazırlanmalı və qəbul edilməlidir. Bundan başqa, ola bilər ki, bu qurumun beynəlxalq katibliyi olsun, ola bilər ki, olmasın. Bunlar hamısı müzakirələr mərhələsindədir və bu müzakirələr başa çatdıqdan, birinci iclas keçirildikdən sonra bu və digər məsələlərin hamısına tam aydınlıq gətiriləcək.
- Həmin qurumda təmsil olunmaq üçün Azərbaycan nümayəndə heyətinin tərkibi müəyyənləşdirilibmi?
- Xeyr, hələlik müəyyənləşdirilməyib. Ancaq onu qeyd edə bilərəm ki, hər üzv dövlətdən, o cümlədən, Azərbaycandan bu assambleyada 10 nəfər təmsil olunacaq.
Nardar BAYRAMLI

Paylaş:

Baxılıb: 1410 dəfə