Heydər Əliyev
yeni azerbaycan logo

Ana səhifə / Siyasət / Zurabişvili yenidən prezident seçiləcəkmi?

Zurabişvili yenidən prezident seçiləcəkmi?

13.06.2024 [10:50]

MÜBARİZ

Qonşu Gürcüstanda böyük ajiotaja səbəb olan “Xarici təsirin şəffaflığı haqqında” qanun qəbul edildikdən sonra cəmiyyət və siyasi müxalifət gələn il keçiriləcək parlament seçkilərinə fokuslanıb. O cümlədən Gürcüstan Prezidenti Salome Zurabişvili deyib ki, o, ikinci müddətə namizədliyini irəli sürmək imkanını istisna etmir, lakin bunun üçün ilk növbədə müxalifətin 2024-cü il oktyabrın 26-da keçiriləcək parlament seçkilərində qalib gəlməsi lazımdır.

Dövlət başçısı bu barədə gənclərlə görüşündə bildirib. “Mən dəfələrlə demişəm və yenə də təkrar edirəm ki, işimizi sona çatdırmaq üçün lazım olan yerdə olacağam . ...Nəticəni (parlament seçkilərinin nəticəsi - red.) müdafiə edəcək, onu Brüsselə çatdıracaq və danışıqların aparılacağına dair təsdiqi alacaq şəxs olmaq istəyirəm. Bu prezident rolunda olacaq, ya yox, gələcək göstərəcək. Hər şeyə hazıram”, - deyə Zurabişvili vurğulayıb.

Qeyd edək ki, Salome Zurabişvili 2018-ci ildə Gürcüstanın Prezidenti seçilib. Gürcüstanın növbəti prezidenti isə ümumi, ümumxalq səsverməsi ilə deyil, 300 seçici tərəfindən seçiləcək. Onların arasında parlament üzvləri və yerli hökumət nümayəndələri də olacaq. Növbəti prezident seçkiləri parlament seçkilərindən sonra baş tutacaq.

İndiki reallıqlar fonunda S. Zurabişvilinin yenidən prezident seçilməsi perspektivi asan görünmür. Məsələ burasındadır ki, hazırda Gürcüstanda bir növ Qərb-Rusiya qarşıdurması yaşanır. 2018-ci illə müqayisədə indi bu ölkədə cəmiyyətdə qütbləşmə meylləri artıb. Ötən onilliyin siyasi mənzərəsini göz önündə canlandırsaq, deyə bilərik ki, o dövrdə bu ölkəyə bir Qərb eyforiyası hakim kəsilmişdi. 2008-ci il müharibəsindən sonra Gürcüstan separatizmin baş qaldırdığı Şimali Osetiyanı və Abxaziyanı de-fakto  itirdi. Gürcüstan cəmiyyəti bunun günahını Rusiyada görür. Öz növbəsində hakimiyyət də siyasətində cəmiyyətin ovqatını nəzərə almaya bilməzdi. Buna görə də hakimiyyət tərəfindən Rusiyaya münasibətdə və səsləndirilən bəyanatlarda xüsusi bir ehtiyatlılıq dərhal nəzərə çarpırdı. Rusiyadan qopmağa çalışan Gürcüstan cəmiyyəti bütünlüklə bu ölkəyə şirin vədlər verən, o cümlədən də vizasız rejimə şərait yaradan Qərbə istiqamətlənmişdi. Belə bir şəraitdə S.Zurabişvilinin 2018-ci il seçkilərində səs çoxluğu ilə qalib gəlməsi çətin olmadı.

Ancaq Qərbin dəstəyi və vədləri Gürcüstana gözlənilən xoşbəxtliyi gətirmədi. Əksinə, Qərbin təsirlərinin bu ölkənin milli maraqlarına daha ciddi təhdidlər yaratdığı üzə çıxdı. Əvvəla, onu qeyd edək ki, Avropa ölkələrinə vizasız rejimin tətbiqi Gürcüstandan əmək qabiliyyətli əhalinin, xüsusilə də gənclərin ölkədən kütləvi axınına səbəb oldu. Digər tərəfdən, Qərb dairələri yaranmış fürsətdən sui-istifadə etməklə ölkə üzrə öz agentura şəbəkəsini qurmağa nail oldu. Verilən məlumatlara görə, hazırda Gürcüstan kimi kiçik bir ölkədə təxminən on min qeyri-hökumət təşkilatı (QHT) fəaliyyət göstərir. Həmin QHT-lərə maliyyə axını isə Qərb dairələrindən gəlir. Lakin həmin dairələr Gürcüstana yalnız maliyyə vəsaitləri yönəltmir, bu vəsaitlər çoxsaylı QHT-lərə müəyyən şərtlər və tapşırıqlar qarşılığında verilir. Gürcüstan hakimiyyəti hesab edir ki, həmin şərtlər və tapşırıqlar əksər hallarda ölkənin milli maraqlarına təhdidlər yaradır. Hakim “Gürcü arzusu- demokratik Gürcüstan”  partiyası da məhz yaranmış reallıqlardan çıxış etməklə parlamentdə “Xarici təsirin şəffaflığı haqqında” müvafiq qanunun qəbul edilməsini təkid edib və uzun mübarizədən sonra buna nail olub. Siyasi hakimiyyət ciddi nəzarət mexanizmini işə salmaqla, o cümlədən də cərimələr tətbiq etməklə Gürcüstanın milli təhlükəsizliyinə təhdidlər yaradan xarici təsirlərin qarşısını almağı hədəfləyib. Qeyd edək ki, bəhs olunan qanun layihəsinin parlamentdə müzakirələrə çıxarılması hakimiyyət daxilində də parçalanmaya yol açdı. O cümlədən Prezident S.Zurabişvili qəbul olunan qanuna veto qoydu. Ancaq sonradan parlament çoxluğu səsvermə yolu ilə Prezidentin vetosunun ləğvinnə nail oldu.

Gələn il keçiriləcək seçkilərin S.Zurabişvili üçün asan olmayacağını şərtləndirən digər bir mühüm amil isə İvanişvili komandasının cəmiyyətdə Rusiyaya yönəlik sərt ritorikanı yumşaltmağa nail olmasıdır. İndi bu ölkədə Rusiya ilə ənənəvi əlaqələrin daha geniş miqyasda bərpa edilməsinin tərəfdarları kifayət qədər çoxdur.  Bu isə parlament seçkilərində siyasi müxalifətin üstünlük qazanması, son nəticədə isə S.Zurabişvilinin yenidən prezident seçilmək şanslarına təsirsiz ötüşməyəcək.

Paylaş:
Baxılıb: 182 dəfə

Xəbər lenti

Hamısına bax

Xəbər lenti

Xəbər lenti

Sosial

Sosial

Sentyabr ayından...

12 İyul 11:00

Sosial

Ədəbiyyat

Dünya

Xəbər lenti

MEDİA

Xarici siyasət

Siyasət

Sülh gündəliyi

12 İyul 10:20

Siyasət

Gündəm

Xəbər lenti

İqtisadiyyat

Arxiv
B Be Ça Ç Ca C Ş
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31