BMT-də 11-ci sənəd...

Bakı:

24 °C

60 %

7 m/s

Əlaqə

AZ RU EN

Ana səhifə / Siyasət / BMT-də 11-ci sənəd...

BMT-də 11-ci sənəd...

11.04.2025 [10:04]

Qərbi Azərbaycan İcmasının növbəti uğuru

Qərbi azərbaycanlıların doğma yurdlarına qayıdışı məsələsi beynəlxalq ictimaiyyətin diqqət mərkəzindədir. Onların tarixi torpaqlarına qayıdışının təmin olunması beynəlxalq hüquq çərçivəsində müəyyənləşmiş fundamental haqlarından biridir. Bu məqsədlə bütün imkanlardan, o cümlədən beynəlxalq platformalardan istifadə olunur, Qərbi Azərbaycan İcması müvafiq beynəlxalq təşkilatlara müraciətlər edir.

Xatırladaq ki, 2025-ci il martın 1-də Qərbi Azərbaycan İcması Qadınlar Şurasının təşkilatçılığı ilə onlayn formatda “Qaçqınlıq və Qadınlar” mövzusunda beynəlxalq konfrans keçirilib. 8 Mart Beynəlxalq Qadınlar Günü ərəfəsində keçirilmiş konfransın məqsədi beynəlxalq ictimaiyyətin diqqətini Qərbi azərbaycanlı qadınların etnik təmizləməyə məruz qalmaları və öz evlərinə qayıda bilməmələrindən irəli gələn hüquq pozuntularına cəlb etmək idi. Tədbirdə 12 ölkədən diaspor fəaliyyətində iri layihələr həyata keçirən 50-yə yaxın nüfuzlu qadın iştirak edib.

Konfransın sonunda iştirakçılar adından beynəlxalq təşkilatlara və dünyanın birinci xanımlarına müraciət qəbul olunmuşdu. Müraciətdə bildirilir ki, 1987-1991-ci illər deportasiyası zamanı azərbaycanlılara qarşı həyata keçirilən etnik təmizləmə və deportasiya siyasəti nəticəsində qadınlar və uşaqlar da ağır travmalar alıblar. Onlar evlərini itirib və fundamental insan hüquqlarından məhrum olublar. Diqqətə çatdırılıb ki, Qərbi azərbaycanlı qadınlar bundan sonra da qayıdış və digər hüquqlarının təmin olunması istiqamətində fəaliyyətlərini davam etdirəcəklər.

Qərbi Azərbaycan İcmasından verilən məlumata görə, sözügedən müraciət BMT-nin Baş Assambleyasının və Təhlükəsizlik Şurasının rəsmi sənədi kimi yayılıb. Sənədin BMT-nin ali orqanlarının rəsmi sənədi kimi yayılması Qərbi Azərbaycan məsələsi üzrə beynəlxalq məlumatlılığın artmasında mühüm rol oynayır. Qərbi Azərbaycan İcması geri qayıdış hüququnun təşviqi və bu müstəvidə humanitar məsələlərin işıqlandırılması istiqamətində səylərini davam etdirir.

Məsələ ilə bağlı Qərbi Azərbaycan İcmasının İctimaiyyətlə Əlaqələr şöbəsinin müdiri Ülviyyə Zülfiqar bildirib ki, İcmanın Qadınlar Şurasının beynəlxalq ictimaiyyətə müraciətinin BMT-nin rəsmi sənədi kimi yayılması Qərbi Azərbaycan məsələsi ilə bağlı aparılan iş baxımından mühüm önəm daşıyır. O qeyd edib ki, bu müraciətlə İcmanın BMT-də yayılan sənədlərinin sayı 11-ə çatıb. Sözçü bildirib ki, sənədin ali orqanın gündəliyində yer alması və qurumun rəsmi sənədi kimi yayılması insan hüquqlarının təşviq olunmasında, soyqırımının, etnik təmizləmənin və insanlığa qarşı cinayətlərin qarşısının alınmasında, qaçqınların hüquqlarının qorunmasında, həmçinin bu hallara qarşı beynəlxalq mübarizənin formalaşdırılmasında mühüm rol oynayır. “Qərbi Azərbaycan İcması soydaşlarımızın geri qayıdış hüququ və konkret həssas qrupların hüquqlarının müdafiəsi istiqamətində apardığı fəaliyyəti davam etdirir”, - deyə Ü.Zülfiqar vurğulayıb.

Nardar BAYRAMLI

Paylaş:

Baxılıb: 577 dəfə