Səbaildə yeni tədris ilinə hazırlığın vəziyyəti müzakirə olunub

Bakı:

18 °C

77 %

4 m/s

Əlaqə

AZ RU EN

Ana səhifə / Siyasət / Səbaildə yeni tədris ilinə hazırlığın vəziyyəti müzakirə olunub

Səbaildə yeni tədris ilinə hazırlığın vəziyyəti müzakirə olunub

06.09.2014 [09:41]

Səbail rayon İcra Hakimiyyətinin başçısı yanında Şuranın geniş tərkibli iclasında rayonda ötən tədris ilinin yekunları və yeni tədris ilinə hazırlığın vəziyyəti müzakirə olunub.
Rayon icra hakimiyyətindən AzərTAc-a bildiriblər ki, toplantıda çıxış edən icra başçısı Asif Əsgərov ölkədə təhsil məsələləri ilə bağlı görülən işlərdən, Azərbaycan Prezidenti İlham Əliyev və birinci xanım, Heydər Əliyev Fondunun prezidenti Mehriban Əliyeva tərəfindən təhsilə göstərilən diqqət və qayğıdan danışıb.
A.Əsgərov deyib ki, son illərdə qazanılan bütün uğurlar dövlət başçısı İlham Əliyevin təhsilin inkişafı ilə əlaqədar imzaladığı proqramlar çərçivəsində həyata keçirilən islahatların, birinci xanım Mehriban Əliyevanın təhsil obyektlərinin yeniləşməsi sahəsində gördüyü işlərin və dövlətin bu sahəyə xüsusi qayğısının nəticəsi kimi dəyərləndirilməlidir. Üç il ərzində Prezidentin imzaladığı sərəncamlar və dövlət proqramlarına əsasən rayondakı orta və məktəbəqədər təhsil müəssisələrinin böyük əksəriyyəti əsaslı təmir olunub, 1 yeni orta məktəb binası və 1 uşaq bağçası tikilib, 2 orta məktəb, 1 uşaq musiqi məktəbinin binası sökülərək yenidən inşa olunub. Bundan başqa, 2 məktəb üçün yeni əlavə korpus tikilib, 1 peşə, 11 orta, 2 uşaq musiqi məktəbi, 2 uşaq texniki yaradıcılıq mərkəzi, 8 uşaq bağçası əsaslı təmir olunub.
Keçən il, həmçinin Heydər Əliyev Fondunun təşəbbüsü ilə Badamdar qəsəbəsindəki 136 nömrəli körpələr evi-uşaq bağçasında əsaslı təmir işləri aparılıb və sentyabr ayında Heydər Əliyev Fondunun prezidenti Mehriban Əliyevanın iştirakı ilə açılışı olub.
Badamdar qəsəbəsində yaşayan insanların sayının artması ilə bağlı burada məktəbəqədər təhsil müəssisələrinin vəziyyətini nəzərə alan Heydər Əliyev Fondu nəcib təşəbbüs göstərərək bu ilin aprel ayında qəsəbədəki “Könül” körpələr evi-uşaq bağçasında əsaslı təmir işlərinə başlayıb və artıq burada bütün işlər başa çatdırılıb.
Prezident İlham Əliyevin müvafiq Sərəncamı ilə təsdiq olunmuş “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın həyata keçirilməsi üzrə Tədbirlər Planına uyğun olaraq Səbail rayonunun təhsil müəssisələri üzrə 3 orta və 1 musiqi məktəbinin və 3 uşaq bağçasının əsaslı təmiri nəzərdə tutulub.
A.Əsgərov bildirib ki, rayonda təhsilin səviyyəsi və təhsil müəssisələrinin vəziyyətinə icra hakimiyyəti tərəfindən ciddi fikir verilir. Yay aylarında təhsil müəssisələrində təmir işləri aparılıb, məktəblər lazımi avadanlıq və vəsaitlə təmin olunub.
Tədbirdə görülən işlərlə yanaşı, keçən tədris ilində təhsil müəssisələrinin qazandığı uğurlardan da danışılıb. Bildirilib ki, 2013-2014-cü tədris ilində rayonun orta məktəblərini 1355 nəfər bitirib, onlardan 901 nəfəri tələbə adını qazanıb. Qəbul imtahanlarında abituriyentlərdən 124 nəfəri 500-dən, 37 nəfəri 600-dən, 9 nəfəri isə 650-dən çox bal toplayıb. Məzunlardan 124 nəfəri xarici ölkələrin müxtəlif ali məktəblərinə qəbul olunub.
91 nömrəli tam orta məktəbin direktoru Svetlana Zülfüqarova, 687 bal toplayaraq tələbə adını qazanmış Xalid Məmmədli və digər çıxış edənlər təhsil müəssisələrində yaradılan şəraitə və təhsilə göstərdikləri diqqət və qayğıya görə Azərbaycan Prezidenti İlham Əliyevə və Heydər Əliyev Fondunun prezidenti Mehriban Əliyevaya minnətdarlıqlarını bildiriblər.
Sonda qəbul imtahanlarında yüksək nəticələr göstərmiş məzunlara rayon icra hakimiyyəti tərəfindən hədiyyələr təqdim olunub, Qarabağ müharibəsi əlilləri, veteranları, şəhid və aztəminatlı ailələrdən olan 100 uşağa isə məktəbli forması hədiyyə edilib.

Paylaş:

Baxılıb: 1382 dəfə