Bakıda “Sağlam gənclik, sağlam gələcək” mövzusunda forum keçirilib

Bakı:

16 °C

88 %

4 m/s

Əlaqə

AZ RU EN

Ana səhifə / Siyasət / Bakıda “Sağlam gənclik, sağlam gələcək” mövzusunda forum keçirilib

Bakıda “Sağlam gənclik, sağlam gələcək” mövzusunda forum keçirilib

11.12.2014 [10:20]

Dekabrın 10-da Bakıda “Sağlam ailə” tibb mərkəzinin, Azərbaycan Respublikası Gənclər Təşkilatları Milli Şurasının (ARGTMŞ) təşkilatçılığı ilə “Sağlam gənclik, sağlam gələcək” mövzusunda beynəlxalq forum keçirilib.
AzərTAc xəbər verir ki, forum Gənclər və İdman Nazirliyi, Ailə, Qadın və Uşaq Problemləri üzrə Dövlət Komitəsi (AQUPDK), Ginekologiya və Perinatologiyanın İnkişafına Dəstək Assosiasiyasının dəstəyi ilə təşkil olunub.
Forumda gənclər təşkilatlarının nümayəndələri, yerli və xarici ekspertlər iştirak ediblər.
Tədbirdə Prezident Administrasiyasının İctimai-siyasi məsələlər şöbəsinin gənclər təşkilatları ilə iş sektorunun müdiri Vüsal Quliyev, gənclər və idman nazirinin müavini İntiqam Babayev, AQUPDK-nın sədr müavini Aynur Sofiyeva, ARGTMŞ-ın sədri Şahin Seyidzadə və başqaları Azərbaycanda səhiyyə sahəsində görülən işlər barədə çıxış ediblər. Onlar Ümummilli lider Heydər Əliyevin Azərbaycanda səhiyyənin inkişafına, tibb sahəsində yüksək ixtisaslı kadrların hazırlanmasına və tibbi təhsilin keyfiyyətinin yüksəldilməsinə diqqət və qayğısından söhbət açıblar. Respublikada səhiyyənin inkişafı istiqamətində həyata keçirilən uğurlu islahatlar, bu sahədə qəbul edilən dövlət proqramları xüsusi qeyd edilib. Hazırda bu siyasətin Azərbaycan Prezidenti İlham Əliyev tərəfindən davam etdirildiyi vurğulanıb. Çıxışlarda gənclər arasında sağlam həyat tərzinin təbliğinin, ölkəmizdə idman sahəsinin inkişafının dövlət siyasətinin tərkib hissəsi olduğu vurğulanıb. Dövlət qurumları, özəl sektor və gənclər təşkilatlarının bu sahədə birgə əməkdaşlığının vacibliyindən danışılıb.
Bildirilib ki, bu gün Azərbaycanda uğurlu gənclər siyasəti həyata keçirilir. Hazırda ölkədə sağlamlıqla bağlı keçirilən tədbirlərin əsas təşkilatçıları gənclər təşkilatlarıdır. Gənclərin pis vərdişlərdən yayındırılması, erkən nikahların qarşısının alması, onlar arasında fiziki və mənəvi sağlamlıqla bağlı təbliğat işləri aparılmalıdır.
Gənclərin sağlamlıq məsələlərinə xüsusi önəm verilməsinin zəruriliyini diqqətə çatdıran natiqlər qeyd ediblər ki, onların sağlamlığını, müxtəlif mənfi hallardan qorunmasını təmin etmək cəmiyyətin əsas vəzifələrindən biridir. Ölkəmizdə sağlam nəslin formalaşması istiqamətində müxtəlif proqramlar həyata keçirilib. Çünki sağlam nəslin formalaşması gələcəyimizin uğuru deməkdir.
Gənclər təşkilatları və özəl şirkətlər gənclərin sağlamlıqlarının qorunması istiqamətində birgə fəaliyyət göstərməlidir.
Forum çərçivəsində gənclərin narkomaniya, QİÇS və digər zərərli vərdişlərdən profilaktikasının yolları müzakirə olunub, müvafiq təqdimatlar keçirilib, gənclər praktiki biliklərdən faydalanıblar.
Tədbirdə Almaniya, Avstriya, Azərbaycan, Rusiya, Böyük Britaniya, Xorvatiya, Estoniya və Ukraynadan dəvət olunmuş tibb mütəxəssislərinin, professorların cinsi və reproduktiv sağlamlığa dair elmin son nailiyyətləri, sağlam həyat tərzinin təbliği, gənclər arasında tibbi maarifləndirmənin aparılması mövzularında çıxışları olub.

Paylaş:

Baxılıb: 680 dəfə