Ermənistan ilk növbədə özünün törətdiyi terror aktlarını etiraf etməlidir

Bakı:

19 °C

82 %

3 m/s

Əlaqə

AZ RU EN

Ana səhifə / Siyasət / Ermənistan ilk növbədə özünün törətdiyi terror aktlarını etiraf etməlidir

Ermənistan ilk növbədə özünün törətdiyi terror aktlarını etiraf etməlidir

04.03.2015 [10:00]

Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev Ermənistanın xarici işlər naziri Edvard Nalbandyanın BMT-nin İnsan Hüquqları Şurasının iclasında çıxışına münasibət bildirib.
Hikmət Hacıyev deyib ki, BMT tribunasından çıxış edərək beynəlxalq birliyi terrorizm və digər təhdidlərlə mübarizəyə səsləyən Ermənistan xarici işlər naziri, ilk növbədə, bu sahədə öz ölkəsinin “təcrübəsi və nümunəsi”ni göstərməlidir.
Ermənistan xarici işlər nazirinin ölkəsinin siyasi və hərbi rəhbərliyinin iştirakı ilə törədilmiş Xocalı soyqırımını və buna görə Ermənistanın daşıdığı məsuliyyəti etiraf etməsi üçün BMT İnsan Hüquqları Şurası ən münasib məkanlardan biridir. Xocalıda Ermənistan tərəfindən BMT İnsan Hüquqları Şurasında baxılmalı olan müharibə cinayətləri, insanlıq əleyhinə cinayət və soyqırımı əməlləri törədilib.
Yaxın Şərqdə terror təhlükəsindən danışan Ermənistan xarici işlər naziri digər terrorçu qruplarla bərabər elə bu regionda təşəkkül tapan və genişmiqyaslı terror əməlləri həyata keçirən, Ermənistan müstəqillik qazandıqdan sonra isə Ermənistan xüsusi xidmət orqanlarının tərkibinə inteqrasiya olunan ASALA və digər erməni terror təşkilatlarının da rolunu vurğulamalı idi. Ermənistanın xüsusi xidmət orqanlarının bilavasitə iştirakı ilə Azərbaycanda 30-dan artıq terror aktı törədilib. Monte Melkonyan başda olmaqla erməni terrorçuları Ermənistanda milli qəhrəman səviyyəsinə qaldırılıb və onların “qəhrəmanlığı” orta məktəb dərsliyinə də daxil edilib.
İclasda çıxış edərək “etnik təmizləmənin ardınca həyata keçirilən mədəniyyət abidələrinin dağıdılması insan yaddaşının silinməsi və min illərlə yaşı olan sivilizasiyanın məhv edilməsi cəhdləridir” deyən Ermənistan xarici işlər naziri yəqin ki, işğal altında olan Azərbaycan ərazilərində Ermənistan tərəfindən törədilmiş vəhşilikləri nəzərdə tutur. Çünki Ermənistan xarici işlər nazirinin dedikləri ilə bu ölkə tərəfindən işğal olunmuş Azərbaycan torpaqlarında və Ermənistan ərazisində Azərbaycan xalqına aid olan maddi-mədəniyyət abidələrinə və dini irsə qarşı həyata keçirilmiş soyqırımı tamamilə üst-üstə düşür.
Beynəlxalq humanitar hüququn məskəni olan Cenevrədə BMT İnsan Hüquqları Şurasında çıxış edən Ermənistan xarici işlər naziri ATƏT-in Minsk qrupunun həmsədrlərinin təklifinə uyğun olaraq, münaqişə nəticəsində əsir və itkin düşmüş şəxslər barədə məlumat mübadiləsinə ölkəsinin maneə yaratmasına da aydınlıq gətirməli idi.
Ermənistanın da həmmüəllifi olduğu BMT Baş Assambleyasının “İtkin düşmüş şəxslər” adlı 2014-cü il 18 dekabr tarixli qətnaməsi münaqişə tərəfləri olan dövlətləri itkin düşmüş şəxslər barədə məlumatı bölüşməyə, qurbanlara yardım etməyə, onların yerinin və ya qalıqlarının müəyyən edilməsində kömək göstərməyə çağırır. Ermənistanın Azərbaycana qarşı təcavüzü nəticəsində 4000-dən artıq azərbaycanlı itkin düşmüş hesab olunur və onların taleyinə görə Ermənistan məsuliyyət daşıyır. Cenevrə konvensiyaları əsasında da bu barədə məlumatın verilməsini təmin etmək üçün Ermənistanın beynəlxalq hüquqi öhdəliyi var.
Müasir məhkəmə-tibb elmləri və xüsusilə, DNT analizinin tətbiqi kütləvi şəkildə öldürülən və Ermənistan ərazisində və işğal olunmuş ərazilərdə kütləvi məzarlıqlarda basdırılan şəxslərin kimliyinin müəyyən edilməsinə və nəticə etibarilə, itkin düşmüş şəxslərin taleyinə aydınlıq gətirilməsinə xidmət etmiş olardı.

Paylaş:

Baxılıb: 576 dəfə