Avropa Parlamentinin bəzi deputatları Azərbaycanla bağlı qərəzli qətnaməni kəskin tənqid ediblər

Bakı:

25 °C

69 %

10 m/s

Əlaqə

AZ RU EN

Ana səhifə / Siyasət / Avropa Parlamentinin bəzi deputatları Azərbaycanla bağlı qərəzli qətnaməni kəskin tənqid ediblər

Avropa Parlamentinin bəzi deputatları Azərbaycanla bağlı qərəzli qətnaməni kəskin tənqid ediblər

30.09.2015 [09:53]

Avropa ölkələrində geniş oxucu kütləsinə malik “European Business Review” jurnalının elektron səhifəsində Avropa Parlamentinin Azərbaycana qarşı qəbul etdiyi qərəzli qətnamə ilə bağlı məqalə yerləşdirilib.
AZƏRTAC xəbər verir ki, məqalədə Avropa Parlamentinin qətnamənin əleyhinə çıxan bəzi deputatlarının fikirləri yer alıb.
Məqalənin müəllifi Martin Banks bu qətnamənin qəbulu ilə əlaqədar Azərbaycanda atılan müvafiq addımlar barədə məlumat verir. O bildirir ki, Azərbaycanın bu məsələdə mövqeyi Avropa Parlamentinin müxtəlif siyasi partiyalardan olan bir çox deputatları tərəfindən dəstəklənir. Onlardan biri - Avropa Xalq Partiyasının rumıniyalı deputatı xanım Ramona Manesku deyib ki, Avropa İttifaqı və Azərbaycan birlikdə işləməyə davam etməlidirlər. Deputat əlavə edib ki, bu əməkdaşlıq nəinki enerji sektoru, həmçinin insan hüquqları kontekstində qarşılıqlı faydalıdır. O, Azərbaycanın bir sıra beynəlxalq sazişlərə qoşulduğunu qeyd edib, bu ölkənin rəhbər tutduğu demokratik dəyərləri yüksək qiymətləndirib: “Mən inanıram ki, Azərbaycanla dialoqun qorunması və əməkdaşlığın genişlənməsi Avropa İttifaqının tutmalı olduğu yeganə yoldur”.
Digər partiyaları təmsil edən deputatlar da qətnaməni tənqid ediblər. Onlardan biri - Avropa Millətlər və Azadlıq Qrupunun üzvü Canluka Buananno qətnamənin qəbulundan tamamilə narazı qaldığını bildirib.
“Lega Nord” partiyasının üzvü deyib ki, Avropa Azərbaycanla dialoq apararaq çıxış yolunu tapmalıdır. Düzgün xarici siyasət məhz bu cür həyata keçirilməlidir.
Avropa Xalq Partiyasının digər üzvü irlandiyalı Şon Kelli isə deyib: “Azərbaycanla danışıqları dayandırmaq təklifi ağılsızlıqdır, çünki biz bunu etsək və digər dövlətlərə qarşı da bu addımı atsaq, onda biz heç kimlə heç nəyi müzakirə etməyəcəyik”.
“Avropalı Mühafizəkarlar və İslahatçılar” qrupunun aparıcı üzvü, britaniyalı deputat Sacad Karim bildirib, Dağlıq Qarabağ məsələsində irəliləyişin əldə olunmamasına görə Azərbaycan çox narahatdır. Bu ölkə hiss edir ki, beynəlxalq ictimaiyyət müharibədən sonra xüsusilə qaçqın və məcburi köçkünlər kontekstində Azərbaycanın üzləşdiyi çətinliklərə əhəmiyyət vermir. Həqiqətdir ki, beynəlxalq ictimaiyyət hələ də bu münaqişənin həlli üçün yetərli dərəcədə fəal deyil.
Avropa Xalq Partiyasının xarici işlər üzrə əlaqələndiricisi Kristian Dan Preda təmsil etdiyi partiyanın qətnaməyə qarşı çıxmasının səbəbini belə izah edib: “Avropa Xalq Partiyası qətnaməyə qol çəkmək və lehinə səs verməkdən ona görə imtina etdi ki, qətnamənin mətni olduqca radikaldır və heç bir müsbət effekt gətirmək iqtidarında deyil. Biz bu yolla, həmçinin Yaşıllar partiyasının strategiyasına qarşı çıxmış olduq, çünki onlar xarici əlaqələr komitəsindən yan keçərək birbaşa plenar iclasda Avropa İttifaqı-Azərbaycan münasibətlərinə, o cümlədən insan hüquqları ilə bağlı dialoq və maliyyə məsələlərinə dair qərarın çıxarılmasında israr edirdilər. Sənədin əleyhinə səs verməklə biz qətnamə mətnində əksini tapan radikal yanaşmaya etirazımızı bildirir, eləcə də insan hüquqlarının ən effektiv təşviqinin məhz dialoq vasitəsilə həyata keçirildiyini nəzərə alan daha real və ağıllı yanaşmaya çağırış edirik”.
Deputat xatırladıb ki, Azərbaycan parlamenti qətnamənin qəbuluna cavab olaraq ölkənin Şərq Tərəfdaşlığı çərçivəsində parlamentlərarası forum qismində fəaliyyət göstərən Avronest Parlament Assambleyasındakı üzvlüyünün dayandırılması haqqında qərar qəbul edib. “Beləliklə, biz bu qətnamə nəticəsində Azərbaycanla kommunikasiya kanallarından birini itirdik”, - deyə o əlavə edib.

Paylaş:

Baxılıb: 652 dəfə