Azərbaycan ilə Türkiyə arasındakı dostluq və qardaşlıq əlaqələri sarsılmaz təməl üzərində qurulub

Bakı:

18 °C

82 %

3 m/s

AZ RU EN

Ana səhifə / Siyasət / Azərbaycan ilə Türkiyə arasındakı dostluq və qardaşlıq əlaqələri sarsılmaz təməl üzərində qurulub

Azərbaycan ilə Türkiyə arasındakı dostluq və qardaşlıq əlaqələri sarsılmaz təməl üzərində qurulub

18.01.2018 [10:11]

Yanvarın 17-də Milli Məclisin Beynəlxalq münasibətlər və parlamentlərarası əlaqələr komitəsinin üzvləri ölkəmizdə səfərdə olan Türkiyə Böyük Millət Məclisinin Xarici əlaqələr komitəsinin rəhbəri Volkan Bozkırın başçılıq etdiyi nümayəndə heyəti ilə görüşüblər.
AZƏRTAC xəbər verir ki, komitənin sədri Səməd Seyidov Azərbaycan ilə Türkiyə arasındakı qardaşlıq və dostluq əlaqələrinin sarsılmaz təməl üzərində qurulduğunu, münasibətlərimizin hər zaman başqa dövlətlərə nümunə olduğunu söyləyib. Qeyd olunub ki, qardaş ölkələrimiz eyni istiqamətdə, eyni dəyərlər uğrunda fəaliyyət göstərir, bundan sonra da bu, belə davam edəcək. Komitə sədri Ulu öndər Heydər Əliyevin “Bir millət, iki dövlət” kəlamını xatırladaraq, Azərbaycanın hər zaman bu fəlsəfə ilə yaşadığını vurğulayıb.
Bildirilib ki, Türkiyə Böyük Millət Məclisinin nümayəndə heyətinin ölkəmizə bu səfəri böyük əhəmiyyət daşıyır. Üç gündən sonra Azərbaycan tarixinin ən qanlı hadisələrindən biri - 20 Yanvar faciəsinin 28-ci ildönümü qeyd ediləcək. Bu qanlı faciə Azərbaycan tarixinin şərəf səhifəsidir. Eyni zamanda, 2018-ci il Azərbaycan üçün mühüm tarixi əhəmiyyət kəsb edən məqamlarla zəngindir. Belə ki, bu il Azərbaycan Xalq Cümhuriyyətinin yaranmasının 100 illiyi qeyd olunacaq. Səməd Seyidov türk həmkarlarının səfərini bu əlamətdar hadisə ilə bağlı mənəvi dəstək kimi dəyərləndirib.
Türkiyə Böyük Millət Məclisinin Xarici əlaqələr komitəsinin rəhbəri Volkan Bozkır Azərbaycana səfərindən məmnunluq duyduqlarını ifadə edib. O bildirib ki, 2018-ci ildə ilk səfər üçün məxsusi olaraq qardaş Azərbaycanı seçiblər. Çünki Azərbaycan üçün önəmli olan hər şey Türkiyə üçün də eyni əhəmiyyəti daşıyır. Qonaq görüşə gəlməzdən əvvəl Şəhidlər xiyabanını ziyarət etdiyini, Azərbaycanın bu qanlı faciədə qurban verdiyi yüzlərlə igid oğul və qızlarının xatirəsini ehtiramla yad etdiyini vurğulayıb. Bildirib ki, dünyada Azərbaycan və Türkiyə qədər şəhid verən üçüncü ölkə yoxdur. Xalqlarımızın azadlığı, müstəqilliyi yolunda canlarını fəda edən şəhidlərimizin xatirəsi unudulmayacaq.
Söhbət zamanı Azərbaycan və Türkiyə arasında qarşılıqlı maraq doğuran məsələlər, Ermənistan-Azərbaycan, Dağlıq Qarabağ münaqişəsi barədə geniş fikir mübadiləsi aparılıb. Problemin həllində Azərbaycanın ədalətli mövqeyini dəstəklədiyinə görə Türkiyə dövlətinə minnətdarlıq ifadə edilib.

Paylaş:

Baxılıb: 625 dəfə