Tahir Kərimli: Ali Baş Komandanın torpaqlarımızın azad edilməsi yönündə yürütdüyü siyasətin uğurla nəticələnəcəyinə inanıram

Bakı:

27 °C

65 %

10 m/s

AZ RU EN

Ana səhifə / Siyasət / Tahir Kərimli: Ali Baş Komandanın torpaqlarımızın azad edilməsi yönündə yürütdüyü siyasətin uğurla nəticələnəcəyinə inanıram

Tahir Kərimli: Ali Baş Komandanın torpaqlarımızın azad edilməsi yönündə yürütdüyü siyasətin uğurla nəticələnəcəyinə inanıram

17.10.2020 [07:53]

“Azərbaycanda fəaliyyət göstərən 50 siyasi partiya rəhbərlərinin iştirakı ilə oktyabrın 3-də “Milli həmrəylik - siyasi dialoqun nəticəsi” adlı videokonfrans formatında keçirilən görüşün böyük əhəmiyyəti var”. Bu fikirləri Vəhdət Partiyasının sədri, millət vəkili Tahir Kərimli deyib.

T.Kərimli xatırladıb ki, bir neçə gün əvvəl 50 siyasi partiya birgə bəyanat qəbul edərək ölkə Prezidenti, Ali Baş Komandan İlham Əliyevə və Silahlı Qüvvələrimizə dəstək nümayiş etdirdi. Onun sözlərinə görə, “Milli həmrəylik - siyasi dialoqun nəticəsi” adlı videokonfrans formatında keçirilən görüşdə də bu dəstək bir daha ifadə olundu: “Görüşdə partiya rəhbərləri birmənalı şəkildə Azərbaycanın ərazi bütövlüyünün bərpa olunması istiqamətində dövlət başçısının atdığı addımları təqdir etdiklərini bildirdilər. Biz bu məsələdə reallığı, həqiqətləri dünya ictimaiyyətinə çatdırmaq üçün üzərimizə düşən vəzifələri lazımi səviyyədə yerinə yetirməyə çalışacağıq. Bütövlükdə, Azərbaycan Ordusu tərəfindən işğalçılara layiqli cavab verilməsi, bir sıra yaşayış məntəqələrinin, strateji yüksəkliklərin azad olunması ölkədə fəaliyyət göstərən əksər siyasi partiyalar kimi, Vəhdət Partiyasının üzvlərini də sevindirir. Mən bir Azərbaycan vətəndaşı kimi Ali Baş Komandanın torpaqlarımızın azad edilməsi yönündə yürütdüyü siyasətin uğurla nəticələnəcəyinə inanıram. Prezident İlham Əliyevin qətiyyətli mövqeyi xalqımızda böyük ruh yüksəkliyi yaradıb. Hər kəsin diqqəti bu gün Qarabağdadır”.

Partiya sədri hazırkı vəziyyətdə cəmiyyətimiz, o cümlədən siyasi partiyaların təmsilçiləri tərəfindən milli həmrəylik nümayiş etdirməyin vacibliyini vurğulayıb: “Əksər siyasi partiyalar, cəmiyyətimizin bütün təmsilçiləri torpaqlarımızın azad edilməsi uğrunda mübarizədə Ali Baş Komandanın əmrinə hazırdır. Bu yöndə bütün xalqımızın vahid mövqeyi və ruh yüksəkliyi mövcuddur. Bu gün bizim partiyamızın üzvləri dünyada yaşayan soydaşlarımızla əlaqə saxlayır, onlara Qarabağ həqiqətlərini, haqq işimizi çatdırırlar. Soydaşlarımız da həmin ölkələrin ictimaiyyətini məlumatlandırırlar”.

T.Kərimli hesab edir ki, siyasi partiyaların mövqeyi həm milli həmrəylik, həm də siyasi birlik nümunəsidir. Vətənin bütövlüyü üçün bu birlik olduqca vacibdir. Onun fikrincə, heç bir siyasi partiya bu prosesdən kənarda qalmamalıdır.

N.BAYRAMLI

Paylaş:

Baxılıb: 403 dəfə