Sonun başlanğıcı, yaxud Paşinyanın “demokratiya” imitasiyasının fiaskosu

Bakı:

23 °C

64 %

0 m/s

Əlaqə

AZ RU EN

Ana səhifə / Siyasət / Sonun başlanğıcı, yaxud Paşinyanın “demokratiya” imitasiyasının fiaskosu

Sonun başlanğıcı, yaxud Paşinyanın “demokratiya” imitasiyasının fiaskosu

13.11.2020 [22:56]

Məğlub Ermənistanın baş naziri qurduğu diktatura rejimini qorumaq üçün kütləvi repressiyalara start verib

Məlum olduğu kimi, 44 günlük müharibədə sarsıdıcı məğlubiyyətə uğramış işğalçı Ermənistanda hakimiyyət böhranı baş verir. Paşinyan hökumətinin istefası tələbi ilə kütləvi etiraz aksiyaları davam edir. Bu etirazların qarşısını almaq üçün baş nazir Nikol Paşinyan onu ittiham edən bütün müxalifət liderlərini və mitinq iştirakçılarını həbs etdirir. Bu da Ermənistan hakimiyyətinin iç üzünü bir daha ortaya qoyur. Bir sözlə, baş nazir Nikol Paşinyan artıq qurduğu diktatura rejiminin demokratikliyinə dair imitasiya imkanlarını da itirib.

İkili standartların növbəti nümunəsi və ya Qərb niyə susqundur?

Yeri gəlmişkən, burada maraqlı məqamlardan biri də odur ki, əgər bu gün işğalçı Ermənistanda baş verənlər Azərbaycanda olsaydı, indi Qərb ölkələrində bəyanat verməyən insan hüquqlarını müdafiə edən heç bir təşkilat qalmamışdı. Amma Ermənistanda müxalifətin əzilməsi və sıradan çıxarılması Qərbdə qəribə bir susqunluqla qarşılanır. Bu zaman müşahidə edilən ikili standartlar, ədalətsizlik, selektiv münasibət haqlı olaraq suallar yaradır. Ən azı ona görə ki, feyk məlumatlar əsasında guya Azərbaycanda bir nəfərin sülh tələbinə görə həbsi barədə Azərbaycan Prezidenti İlham Əliyevə sual verənlər bu gün Ermənistandakı kütləvi həbslər, təqiblər qarşısında heç nə baş verməmiş kimi davranırlar.

Digər tərəfdən, Ermənistandan işğal etdiyi torpaqları geri qaytarmağı tələb etdiyi üçün illərdir Azərbaycan Prezidentinə qarşı xarici mediada hədyanlar yazanların, onu sifariş edənlərin əsl simaları bu gün ortadadır. Onlar işğalçı Ermənistanın xilası üçün açıq şəkildə, utanc hissi duymadan əllərindən gələni edirlər. Belə ki, Bərdə, Gəncə şəhərlərində və Azərbaycanın digər yaşayış məntəqələrində mülki insanlara qarşı Ermənistanın müharibə cinayətlərindən bəhs etmək əvəzinə, Azərbaycana və onun dövlət başçısına qarşı uydurmalarını davam etdirirlər. Bu gün bir sıra Qərb ölkələrinin, o cümlədən Fransanın, Kanadanın Ermənistana dəstək bəyanatları bu ölkələrin hakim dairələrinin həqiqi simalarını və mahiyyətini aydın əks etdirir.

Qeyd edək ki, hakimiyyətdə olduğu cəmi 2 il ərzində “korrupsiyaya qarşı mübarizə” adı altında siyasi rəqibləri ilə haqq-hesab çürütməyə başlayan, keçmiş prezidentlərdən birini həbs etdirən, digərinə qarşı cinayət işi açdıran, aparıcı müxalifət partiyasının sədri, deputat Q.Çarukyanı həbs etdirən Paşinyanın bu davranışı yenə Qərb dairələrini narahat etməyib. Bu cəzasızlıq Paşinyanın daha böyük cinayətlərə rəvac verməsinə yol açıb və onların sırasına hərbi cinayətləri də əlavə edib - Azərbaycana qarşı müharibəyə başlayıb.

Siyasi qarşıdurma şiddətlənir, ziddiyyətlər dərinləşir

Yeri gəlmişkən, Paşinyanın antidemokratik addımları müharibə zamanı da davam edib. Rusiyalı jurnalist Oleq Kaşin Qarabağda və Ermənistanda baş verən hadisələr haqqında həqiqəti yazdığı üçün akkreditasiyası ləğv olunub və ölkədən çıxarılıb. Ancaq beynəlxalq jurnalist təşkilatları Paşinyanın bu əməli qarşısında yenə də susublar.

Ən nəhayət, müharibədə sarsıdıcı məğlubiyyətə uğramış Paşinyan iqtidarı ölkə daxilində baş qaldıran narazılıq və xalq qəzəbini söndürmək üçün amansız repressiyalara başlayıb. Belə ki, Paşinyanın istefası tələbi ilə keçirilən kütləvi aksiyalarda müxalifət liderləri saxlanılıb. Müxalifət partiyalarının hökumətin fəaliyyəti ilə bağlı tənqidləri cəmiyyətə “milli xəyanət” kimi təqdim olunur.

Beləliklə, Ermənistanda Paşinyan rejiminin qurduğu diktatura artıq iflasa uğrayır. Bunu labüdləşdirən isə Paşinyanın ölkəsini fəlakətə məhkum etmiş bir şəxs kimi onu ittiham edən bütün müxalifət nümayəndələrini həbsə atdırmaqla, onlara təzyiq və təhdidlər göstərməyə çalışmaqla bir daha antidemokratik simasını ortaya qoymasıdır. Müşahidəçilərin fikrincə, bu gün regionda baş vermiş müharibə və dağıntılara görə yalnız Paşinyan yox, onu hakimiyyətə gətirən, bütün cinayətlərinə göz yuman Qərb dairələri və təşkilatları da məsuliyyət daşıyırlar.

Qaşqay ZİYƏDDİNOĞLU

Paylaş:

Baxılıb: 622 dəfə