Azərbaycan dövlətinin irəli sürdüyü qlobal təşəbbüslər beynəlxalq birlik tərəfindən dəstəklənir

Bakı:

27 °C

50 %

13 m/s

Əlaqə

AZ RU EN

Ana səhifə / Siyasət / Azərbaycan dövlətinin irəli sürdüyü qlobal təşəbbüslər beynəlxalq birlik tərəfindən dəstəklənir

Azərbaycan dövlətinin irəli sürdüyü qlobal təşəbbüslər beynəlxalq birlik tərəfindən dəstəklənir

27.05.2021 [09:33]

Ekspertlərin fikrincə, 28 May - Respublika Günü münasibətilə Azərbaycan Prezidentinə ünvanlanan məktublarda yer alan fikirlər bir daha ölkəmizin müasir beynəlxalq münasibətlər sistemindəki mühüm rolundan xəbər verir
Cənubi Qafqaz regionunun lider dövləti olan Azərbaycan son illərdə apardığı uğurlu xarici siyasət kursu nəticəsində istər aparıcı beynəlxalq təşkilatlarla, istərsə də böyük dövlətlərlə mühüm əməkdaşlıq əlaqələri yaradıb. Təsadüfi deyil ki, bu gün dünyada sülhün və təhlükəsizliyin təmini istiqamətində gedən proseslərdə yer alan, eləcə də COVID-19 pandemiyasına qarşı qlobal mübarizənin təşkilində əsaslı rol oynayan Azərbaycan işğalçı Ermənistan istisna olmaqla bütün dövlətlər tərəfindən yaxın tərəfdaş qismində qəbul olunur. Bu faktı 28 May - Respublika Günü münasibətilə Azərbaycan Prezidentinə ünvanlanan məktublarda yer alan fikirlər də təsdiqləyir. Ekspertlərin fikrincə, 28 May - Respublika Günü münasibətilə Azərbaycan Prezidentinə ünvanlanan məktublarda əks olunan fikirlər bir daha ölkəmizin beynəlxalq münasibətlər sistemindəki mühüm rolundan xəbər verir.
Məsələ ilə bağlı fikirlərini bölüşən Milli Məclisin deputatı Vüqar İskəndərov bildirib ki, Azərbaycan dövləti Qoşulmama Hərəkatının sədri qismində istər COVID-19 pandemiyasına qarşı qlobal mübarizənin təşkilində, istərsə də vaksinasiya ilə bağlı ortaya çıxan problemlərin həllində əhəmiyyətli rolunu ortaya qoyub. Millət vəkili deyib ki, şəxsən Prezident İlham Əliyevin qlobal pandemiya şəraitində irəli sürdüyü bir sıra təşəbbüslər bütün dünyada böyük rəğbətlə qarşılanıb: “Sonrakı mərhələdə cənab Prezidentimizin vaksinlərin ədalətli bölünməsi məsələsində tutduğu mövqe Azərbaycanın dünyada bərabərliyin tərəfdarı olduğunu bir daha sübuta yetirdi. Fikrimcə, dünya dövlətlərinin liderlərinin 28 May - Respublika Günü münasibətilə dövlətimizin başçısına ünvanladıqları məktublarda Azərbaycanın qlobal pandemiyaya qarşı beynəlxalq həmrəyliyin gücləndirilməsinə yönələn təşəbbüslərinin yüksək dəyərləndirilməsi də bu uğurlu fəaliyyətə əsaslanır. Almaniya Federativ Respublikasının Prezidenti Frank-Valter Ştaynmayerin öz məktubunda “bizi, həmçinin dünyada COVID-19 pandemiyasına qarşı mübarizədə birgə səylərimiz birləşdirir” kimi fikir işlətməsi, Çin Xalq Respublikasının Sədri Si Cinpin Azərbaycan Prezidentinə ünvanladığı təbrik məktubunda COVID-19 pandemiyasına qarşı birgə mübarizədə əldə olunan nəzərəçarpacaq nəticələrdən bəhs etməsi bunun bariz sübutudur”.
“Xalq cəbhəsi” qəzetinin baş redaktoru Elçin Mirzəbəyli də dünya liderlərinin Azərbaycan Prezidenti İlham Əliyevə 28 May - Respublika Günü münasibətilə ünvanladıqları təbriklərində Azərbaycanın regional proseslərdə oynadığı rolun bütün mənzərəsini görməyin mümkün olduğunu dilə gətirib. Onun sözlərinə görə, 30 illik tarixi olan bir dövlət üçün qısa müddət ərzində belə bir mövqe qazanmaq şübhəsiz ki, çox çətindir. Onun fikrincə, bu uğurlara Azərbaycan Respublikasının Prezidenti İlham Əliyevin siyasəti və qlobal proseslərdə oynadığı rol nəticəsində nail olunub: “ABŞ prezidenti Co Bayden tərəfindən Azərbaycanın NATO ilə əməkdaşlığı, ölkəmizin bu sahədə həyata keçirdiyi siyasət və beynəlxalq missiyaya verdiyi dəstək qeyd olunur. Çin Xalq Respublikasının sədri Si Cipenin məktubunda isə Azərbaycanın “Bir kəmər və bir yol” layihəsində iştirakı və nəqliyyat dəhlizlərinin reallaşdırılmasında oynadığı rol xüsusi olaraq qeyd edilir. Bu da Prezident İlham Əliyevin yürütdüyü siyasətin nə qədər çoxşaxəli olduğunu və beynəlxalq münasibətlər sisteminin bütün istiqamətləri üzrə Azərbaycanın rolunu bir daha təsdiqləyir. Bu baxımdan düşünürəm ki, həmin məktublar həm də Azərbaycanın qlobal proseslərdə oynadığı rola verilən qiymətdir. Bu, ölkəmizin mövqeyinin və Azərbaycan Prezidentinin nüfuzunun ifadə olunmasıdır”.
Pərviz SADAYOĞLU

Paylaş:

Baxılıb: 717 dəfə