Musa Quliyev: Terror bizim əzmimizi qıra bilməz

Bakı:

26 °C

57 %

9 m/s

Əlaqə

AZ RU EN

Ana səhifə / Siyasət / Musa Quliyev: Terror bizim əzmimizi qıra bilməz

Musa Quliyev: Terror bizim əzmimizi qıra bilməz

09.06.2021 [09:36]

“Keçən həftə xalqımız erməni terrorunun növbəti ağrı-acısını yaşadı. Kəlbəcər rayonu ərazisində tank əleyhinə minaya düşən avtobusda 3 soydaşımız həlak oldu, yaralılarımız var. Şəhidlərimizə Allahdan rəhmət diləyir, yaralılarımıza tezliklə sağalmalarını arzu edirəm. Bu hadisə bütün xalqımızı hiddətləndirmişdir. Beynəlxalq təşkilatların susqunluğu və fəaliyyətsizliyi bizi narahat edir”. Bu fikirləri Milli Məclisin Əmək və sosial siyasət komitəsinin sədri, YAP İdarə Heyətinin üzvü Musa Quliyev deyib.
Musa Quliyev bildirib ki, minaların xəritələrinin verilməsi qeyd-şərtsiz təmin edilməlidir. Təxribatçı hərəkətlərin dayandırılması, davamlı sülhün təmin olunması üçün Ermənistana beynəlxalq səviyyədə təsir göstərilməlidir. Onun sözlərinə görə, iki dəyərli jurnalistimiz öz vəzifələrini yerinə yetirərkən terrora məruz qalıblar: “Azərbaycanın bütün söz və qələm adamları dünya ictimaiyyətinin diqqətini bu mina terroruna cəlb etməli, minalarla bağlı beynəlxalq qanunlara uyğun olaraq, Ermənistanın cəzalandırılması üçün petisiya təşkil olunmalıdır. Ölkəmizdəki bir çox siyasi partiya və ictimai təşkilatların bu yöndə fəaliyyəti təqdir olunmalıdır. Amma nə yazıq ki, antimilli şura və “Müsavat” Partiyası deyilən qurum bu faciədə də xəyanət mövqeyində dayandılar. Bu xəyanətkar ünsürlərin Arif Hacılı adlı bir üzvü sosial şəbəkədə öz səhifəsində Kəlbəcər terrorunda ermənilərə məsuliyyət tanımır, dolayısı ilə onlara haqq qazandırır, mina terrorunun məsuliyyətini Azərbaycan rəhbərliyinin üzərinə qoymağa cəhd edir. Belə adamların siyasi həyasızlığına, nadanlığına, nankorluğuna hiddətlənməyə bilmirsən. Bu sözləri 1993-cü ilin aprelində Kəlbəcər kimi alınmaz bir qalanı erməniyə təhvil verən hakimiyyətin təmsilçisi yazır. Özü də 4 iyun tarixində! O tarixdə ki, onlar 28 il əvvəl Azərbaycanda vətəndaş müharibəsi başlatmışdılar. Məhz Kəlbəcərdə partlayan minanın məsuliyyəti ermənilərlə yanaşı, Kəlbəcərin işğalına şərait yaradan AXC-“Müsavat” hakimiyyətinin üzərindədir!”.
YAP İdarə Heyətinin üzvü qeyd edib ki, bu gün Azərbaycan dövləti həmişəkindən daha güclüdür, inamlıdır, belə terrorlar və xəyanətlər bizim iradəmizi sarsıda bilməz: “Hər kəs əmin ola bilər ki, torpaqlarımızın üstünü düşməndən təmizləyən Ali Baş Komandan cənab İlham Əliyev torpaqlarımızın altının da düşmən minalarından təmizlənməsinə nail olacaq, sabahkı nəsillərə daha zəngin, daha güvənli Azərbaycan bəxş edəcəkdir!”.

Paylaş:

Baxılıb: 636 dəfə