G7 Rusiyaya hansı sürprizi hazırlayır?

Bakı:

24 °C

57 %

2 m/s

Əlaqə

AZ RU EN

Ana səhifə / Siyasət / G7 Rusiyaya hansı sürprizi hazırlayır?

G7 Rusiyaya hansı sürprizi hazırlayır?

06.04.2022 [10:20]

XİN başçılarının Brüssel görüşləri müharibənin istiqamətini dəyişə bilər

P. İSMAYILOV

Böyük dövlətlər yenidən bir masa arxasına toplanır. Belə ki, G7 xarici işlər nazirləri aprelin 7-də Brüsseldə bir araya gələcəklər. Bununla bağlı Yaponiya Xarici İşlər Nazirliyinin yaydığı bəyanatda deyilir ki, G7 ölkələrinin xarici siyasət idarəsinin rəhbərləri əvvəlcə Brüsseldə ayrı-ayrılıqda danışıqlar aparacaqlar. Bu danışıqlar Şimali Atlantika (NATO) alyansına üzv dövlətlərin xarici işlər nazirlərinin həmin günə planlaşdırılan iclasından əvvəl baş tutacaq. Hər iki görüşdə Yaponiya xarici işlər naziri Yoşimasa Hayaşi də iştirak edəcək. Hayaşi ilk dəfədir ki, NATO ölkələrinin xarici işlər orqanları rəhbərlərinin görüşünə məhz alyansın xüsusi dəvəti ilə qatılır. “Yaponiya ilə NATO ölkələri arasında təkcə Ukraynadakı vəziyyət baxımından deyil, həm də azad və açıq Hind-Sakit okean regionu konsepsiyasının həyata keçirilməsinə yönəlmiş əməkdaşlığın gücləndirilməsi planlaşdırılır”, - bəyanatda vurğulanır.

G7-nin və buna paralel olaraq NATO-nun eyni gündə toplantı keçirməsi müttəfiq ölkələrin ciddi qərarlar verəcəyini söyləməyə imkan verir. Bəs bu qərarlar hansı müstəvini əhatə edəcək? NATO yeni silahlandırma və ya hərbi aktivləşmə mərhələsinə qədəm qoyacaqmı? Yaponiyanın bu görüşlərdəki iştirakı Rusiyaya qarşı “şərq cəbhəsini” açacaqmı?

Bununla bağlı fikirlərini “Yeni Azərbaycan”a bölüşən politoloq İlqar Vəlizadə bildirib ki, hər iki toplantının əsas müzakirə predmeti Ukraynada davam edən müharibə və onun fəsadlarıdır. Bundan başqa, toplantıda Rusiyaya tətbiq olunan iqtisadi sanksiyalar, yeni dönəmdə iqtisadi münasibətlərin formalaşdırılması yolları da müzakirə ediləcək. Eyni gündə NATO ölkələrinin xarici siyasət idarələrinin rəhbərlərinin toplantısının keçirilməsi hərbi müstəvidə də bir sıra yenilikləri şərtləndirə bilər: “İnanıram ki, Ukraynaya hərbi dəstək məsələsi hələ də aktuallığını qoruyur. Ukraynada, xüsusilə Buçada baş verənlər, kütləvi insan tələfatı ilə bağlı hadisələr müzakirə olunacaq. Qeyd edim ki, artıq məsələ BMT müstəvisinə də çıxarılıb və orada da müzakirələr aparılacaq”.

İ.Vəlizadənin fikrincə, müharibənin miqyası dəyişməyəcək. Yəni, hələlik NATO-nun müharibəyə qoşulma ehtimalı yoxdur. “Polşa, Baltikyani ölkələr, Rumıniya hərbi cəhətdən tam hazırlıqlı vəziyyətdədirlər. Hələlik ölkələr arasında söz dueli gedir. Onlar Rusiyaya qarşı tam hazırlıqlı vəziyyətdə olduqlarını desələr də, indiki halda prosesə daxil olmalarına imkan verməzlər. Rusiya isə hərbi fəallığını daha çox Ukraynanın şərq və cənub istiqamətinə yönəltməkdədir. Bu mənada artıq müharibənin yeni mərhələsinin astanasındayıq. Yəqin ki, bu məsələ də xarici işlər nazirlərinin hər iki toplantısında müzakirə predmeti olacaq”, -deyən politoloq Yaponiya XİN rəhbərinin NATO toplantısına qatılmasının zərurətinə də toxunub. Onun sözlərinə görə, buna səbəb ölkələrin sinxron şəkildə addım atmasının təmin edilməsidir: “Yaponiya siyasi cəhətdən NATO-nu, ən əsası isə müttəfiqi olan Böyük Britaniyanın bütün qərarlarını dəstəkləyir. Hazırki mərhələdə isə bu dəstək həm də hərbi müstəvidə sinxronlaşdırılacaq. Hələlik Rusiyaya qarşı Şərq cəbhəsinin açılmasını real saymıram. Sadəcə Rusiyanı bu qorxu altında saxlamaq strategiyası həyata keçirilir”.

Paylaş:

Baxılıb: 644 dəfə