Türkiyə İraqın şimalında antiterror əməliyyatına başladı

Bakı:

22 °C

88 %

5 m/s

Əlaqə

AZ RU EN

Ana səhifə / Siyasət / Türkiyə İraqın şimalında antiterror əməliyyatına başladı

Türkiyə İraqın şimalında antiterror əməliyyatına başladı

18.04.2022 [14:54]

"Pəncə - Kilit" adlanan əməliyyatlarda hava hücümü və xüsusi təyinatlı qüvvələr iştirak edir

Türkiyənin Milli Müdafiə Nazirliyi İraqın şimalında yeni əməliyyata başlayıb. "Pəncə - Kilit" adlanan əməliyyatlara İraqın şimalındakı terror yuvalarını məhv etmək üçün start verilib. Əvvəlcə PUA və helikopterlərlə havadan zərbələr endirilib, daha sonra xüsusi təyinatlı komandoların iştirakı ilə quru əməliyyatı həyata keçirilib. "Pəncə-Kilit" əməliyyatında Metina, Zap və Avaşin-Basyan bölgələrində əvvəlcədən müəyyən edilmiş hədəflərə ard-arda zərbələr endirilib. Milli Müdafiə naziri Hulusi Akar isə əməliyyat mərkəzində baş verənləri izləyib. Nazir Akar əməliyyatla bağlı açıqlamasında bildirib ki, planlaşdırılan hədəflərin hamısı ələ keçirilib və çoxlu terrorçu zərərsizləşdirilib. Bundan başqa, nazirlik əməliyyatdan görüntülər də paylaşıb.

Əməliyyat başlanan andan Türkiyənin Milli Müdafiə naziri Hulusi Akar Baş Qərargah rəisi, ordu generalı Yaşar Gülər, Quru Qoşunları komandanı general Musa Avsever və Hərbi Dəniz Qüvvələri komandanı admiral Adnan Özbal Hərbi Hava Qüvvələri Komandanlığının Qərargahında olublar. Hərbi Hava Qüvvələri Komandanı General Həsən Küçükakyüz tərəfindən qarşılanan nazir Akar, onu müşayiət edən TSK Komandanlıq nümayəndələri ilə Hərbi Hava Qüvvələri Komandanlığının Əməliyyat Mərkəzində hücum əməliyyatını müşahidə edib. Daha sonra Əməliyyat Mərkəzi ilə video-telekonfrans görüşü keçirən nazir Akar baş verənlərlə bağlı son məlumatları açıqlayıb. Keçirilən əməliyyatın sərhəd təhlükəsizliyinin təmini ilə bağlı olduğunu diqqətə çatdıran H.Akar bildirib ki, planlaşdırma mərhələsindən bu yana Baş Qərargah rəisi ilə ətraflı araşdırma aparıb: "Hazırda planlaşdırılan hədəflərin hamısı ələ keçirilib və çoxlu terrorçu zərərsizləşdirilib. Uzun hazırlıq və koordinasiyadan sonra dünən axşam saatlarından etibarən əməliyyata start verdik. Sığınacaqlar, bunkerlər, mağaralar, tunellər, terrorçulara aid olduğu müəyyən edilmiş silah-sursat anbarları aşkar edilib, onların qərargah adlanan yerləri hava əməliyyatları və atəş dəstəyi ilə böyük müvəffəqiyyətlə məhv edilib. Qəhrəman komandolarımız və "bordo berelilər" ATAK helikopterləri, PUA-ların dəstəyi ilə hava hücumu və qurudan sızaraq bölgəyə giriblər və təyin olunan hədəfləri ələ keçiriblər. Çoxlu sayda terrorçu zərərsizləşdirilib. Axtarış-skanlama fəaliyyətlərimiz davam edir və yaxın saatlarda və günlərdə sayın artacağını gözləyirik".

Nazir Akar bildirib ki, antiterror əməliyyatları əvvəlki əzmlə davam etdirilir. O xüsusi vurğulayıb ki, bu əməliyyatlar İraqın ərazi bütövlüyünə və suveren hüquqlarına hörmət çərçivəsində həyata keçirilir. "Bizim yeganə hədəfimiz terrorçulardır. Əsas məqsədimiz ölkəmizə və sərhədlərimizə hücum etməyə cəhd göstərən terrorçuların zərərsizləşdirilməsidir. Bu əməliyyatın planlaşdırılması və icrası zamanı mülki əhalinin, ətraf mühitin, mədəni və dini abidələrin zərər görməməsi üçün maksimum həssaslıq nümayiş etdirilib. Əməliyyatda bu məsələyə xüsusi diqqətli və həssaslıq göstərilir. Türk əsgərinin nəfəsi terrorçuların kürəyindədir. Terror yuvalarının ən qısa zamanda aradan qaldırılması üçün son terrorçu zərərsizləşdirilənə qədər fəaliyyətlərimiz qətiyyətlə davam edəcək", -deyən H.Akar "Pəncə - Kilit" əməliyyatı çərçivəsində həyata keçirilən hava hücumuna qatılan pilotlarla radio vasitəsilə müraciət edib. Nazir Akar pilotlara uğurlar diləgəyib: "Fəaliyyətinizi böyük qürur və məmnuniyyətlə yaxından izləyirik. Qarşıya qoyulan vəzifələr yerinə yetirilib. Hərbi Hava Qüvvələrimizin şanlı tarixinə yazılan bu fəaliyyətiniz həmişə qürurla xatırlanacaq".

Qeyd edək ki, Türkiyə Milli Müdafiə Nazirliyi İraqda keçirilən əməliyyatla bağlı açıqlama da yayıb: "Türkiyə Silahlı Qüvvələrinin həyata keçirdiyi uğurlu əməliyyatlar nəticəsində ağır itkilər verən PKK/KCK terror təşkilatının İraqın şimalında bəzi bölgələrdə mövcudluğunu davam etdirdiyi, sığınacaqları bərpa etməyə davam etdiyi müəyyən edilib. PKK/KCK və digər terror ünsürlərini zərərsizləşdirmək, İraqın şimalından xalqımıza və təhlükəsizlik qüvvələrimizə qarşı törədilən terror aktlarını aradan qaldırmaq və sərhəd təhlükəsizliyimizi təmin etmək məqsədilə; Birləşmiş Millətlər Təşkilatı Nizamnaməsinin 51-ci maddəsindən irəli gələn özünümüdafiə hüquqlarımıza uyğun olaraq, İraqın şimalındakı (Metina, Zap və Avasin-Basyan bölgələri adlanan) terror hədəflərinə qarşı “Pəncə – Kilid" əməliyyatı başladılıb. Əməliyyatdan əvvəl PKK/KCK təşkilatına aid sığınacaqlar, bunkerlər, mağaralar, tunellər, sursat anbarları və sözdə qərargahlardan ibarət hədəflər hava əməliyyatları ilə atəşə tutulub. Bölgədə yerləşən Fırtına, MLRA və digər artilleriya birləşmələrinin təyin etdiyi hədəflər şiddətli atəşə tutulub və dəqiqliklə vurulub. Hava qüvvələrimiz, atəşə dəstək maşınları, ATAK helikopterləri, İHA və SİHA-ların (PUA) dəstəyi ilə Komando və Xüsusi Təyinatlı qüvvələrimiz qurudan sızaraq və hava hücumu əməliyyatları ilə bölgəyə girib. Türkiyə Silahlı Qüvvələri son terrorçu zərərsizləşdirilənə qədər ölkəmizin və millətimizin təhlükəsizliyi üçün terrora qarşı mübarizəni qətiyyət və əzmlə davam etdirəcək".

Pərviz SADAYOĞLU

Paylaş:

Baxılıb: 863 dəfə

Xəbər lenti

Hamısına bax