“Milli şura”nın antimilli çağırışı...

Bakı:

27 °C

44 %

4 m/s

Əlaqə

AZ RU EN

Ana səhifə / Siyasət / “Milli şura”nın antimilli çağırışı...

“Milli şura”nın antimilli çağırışı...

27.05.2022 [10:22]

Nə məqsədlə və niyə məhz indi?!

Onların mina xəritələrinin Azərbaycana verilməsi, erməni vandalizmi və digər məsələlərlə əlaqədar beynəlxalq birliyə müraciət etmələrinə heç vaxt şahid olmamışıq.

Nurlan QƏLƏNDƏRLİ

İndi çoxəsrlik dövlətçilik tariximizin Zəfər mərhələsidir. Hərb meydanında qazanılmış tarixi Qələbənin strateji prosesə çevrilməsi, ictimai, siyasi və diplomatik müstəvidə möhkəmləndirilməsi üçün məqsədyönlü addımlar atılır. Konkret olaraq:

- Böyük Qayıdışın zamanında və yüksək səviyyədə təmin olunması üçün sistemli işlər görülür;

- Cənubi Qafqazda etimad quruculuğu istiqamətində prinsipial mövqe sərgilənir və strateji fəaliyyət həyata keçirilir: Ermənistanla sülh müqaviləsinin imzalanması diqqət mərkəzindədir, danışıqlar aparılır - təmaslar davam edir;

- Həm region ölkələri, həm də bölgədənkənar dövlətlərlə dostluq və tərəfdaşlıq münasibətləri gücləndirilir, yeni əməkdaşlıq platformalarının yaradılması fəal müzakirə olunur və s.

Bütün bunlar, ABŞ Prezidenti Cozef Baydenin dövlətimizin başçısı İlham Əliyevə göndərdiyi məktubda qeyd edildiyi kimi, “tarixin mühüm anı”nda baş verir.

İndi həm də kritik və həssas zamandır. Çünki:

- Regionda Azərbaycanın fəal iştirakı ilə və bilavasitə geosiyasi iradəsi əsasında yeni nizam yaranır. Bakı proseslərin mərkəzindədir;

- Beynəlxalq ictimaiyyət Cənubi Qafqazda sülh və etimad quruculuğu prosesinə şahidlik edir. Bir neçə gün əvvəl Brüsseldə Prezident İlham Əliyevin, Şarl Mişelin və Nikol Paşinyanın görüşü zamanı müzakirə olunan məsələlər prosesin yeni mərhələyə qədəm qoyduğunu təsdiqləyir. Artıq sərhədlərin delimitasiyası ilə əlaqədar komissiyalar formalaşdırılıb və görüş baş tutub. Bu, irəliləyiş deməkdir - sülhə doğru qəti addımlar atılır;

- Digər tərəfdən, Zəngəzur dəhlizi ilə əlaqədar razlaşma əldə edilib ki, bu da yeni tarixi-strateji prosesin başlanğıcıdır.

Belə taleyüklü məqamda milli həmrəylik, siyasi birlik nümayiş etdirmək, dövlətin maraqlarını qorumaq zəruridir. Siyasi mənsubiyyətindən asılı olmayaraq, hər bir şəxsin vətəndaşlıq borcudur. Amma...

Yenə də məhdud maraqlarının, siyasi ambisiyalarının əsirinə çevrilərək mühüm (və kritik) anlarda öz ampluasında olanlar var. Söhbət bir həsir, bir də məmmədnəsirdən ibarət olan, sıralarında 3-5 nəfəri birləşdirən “milli şura”dan gedir.

Yayılan məlumata görə, “milli şura” adlı konyuktur dərnək beynəlxalq birliyi insan haqları mövzusunda rəsmi Bakıya qarşı daha tələbkar olmağa çağırıb. Maraqlıdır, bu çağırış indiki məqamda niyə edilib və belə bir müraciətə nə lüzum var?

Təbii ki, bu siyasi dəstənin tarixi proseslərin cərəyan etdiyi hazırkı mərhələdə aldıqları qrant, qonorar qarşılığında belə bir addım atması təsadüfi deyil. İlk növbədə, Azərbaycanın postmüharibə dövründə əldə etdiyi nəticə və nailiyyətlərdən diqqəti yayındırmaq üçün belə bir çağırış edilir. İkincisi, bu, beynəlxalq ictimai rəydə ölkəmizin imicini korlamaq cəhdidir.

Hədəf Azərbaycandır!

Mənzərə paradoksal olsa da, reallığı əks etdirir. Sülh prosesində irəliləyişə nail olunması iki qüvvəni xüsusilə narahat edir: erməni lobbi və diaspor təşkilatları; Ermənistandakı revanşistlər. Üçüncü tərəf isə “beşinci kolon” funksiyasını yerinə yetirən “milli şura” kimi düşmən xislətli - mənfur fitrətlilərdir. Bəs onlar kimdən revanş götürmək niyyətindədirlər? Azərbaycan xalqından və dövlətindən?!

Bu gün beynəlxalq birliyə çağırış edən “milli şura”nın nümayəndələri - özünü “siyasi ağsaqqal” obrazında görən Cəmil Həsənli, “siyasi ofsayd” vəziyyətinə düşərək proseslərdən kənarda qalmış Əli Kərimli, radikal düşərgənin “siyasi afroditası” (və ya primadonnası) qiyafəsinə bürünmüş Gültəkin Hacıbəyli kimiləri... “həftə səkkiz, mən doqquz” xaricdən idarə olunan “youtube” kanallarında zühur edərək pafoslu çıxışlarla gündəmə gəlirlər. Halbuki onların mina xəritələrinin Azərbaycana verilməsi, erməni vandalizmi və digər məsələlərlə əlaqədar beynəlxalq birliyə müraciət etmələrinə heç vaxt şahid olmamışıq. Axı bu da insan hüquqları məsələsidir. Guya bilmirlər? Yaxşı bilirlər!

Yaxşı xatırlayırıq, illər öncə həmin qruplaşma Rusiya Prezidenti Vladimir Putinə məktub ünvanlamışdı. Məktubun məzmunu anti-Azərbaycan xarakterli idi, dövlətimiz hədəf seçilmişdi. Bu gün Rusiya Prezidentinin ünvanına “diktator”, “hüquq və azadlıqları boğan” kimi ifadələr səsləndirən Əli Kərimli və “ansambl yoldaşları” 2013-cü ildə yazdıqları məktubda Vladimir Putini “demokratik və hüquqi dövlət qurucusu” adlandırırdılar. Maraqlıdır, bir ölkənin başçısına necə olur ki, gah “diktator”, gah “demokrat” deyə müraciət olunur. Bu sevgi və nifrət haradan qaynaqlanır? Reallıq dəyişib? Xeyr, hər şey olduğu kimi və yerindədir: dəyişən, sadəcə olaraq, siyasi buqələmunların rəngidir. Və bir də dəyişməyən var: o da “milli şura” adlı yığıncaqda cəmləşənlərin xisləti - fitrəti və vərdişləridir.

Göründüyü kimi, bu, “milli şura”nın birinci və sonuncu cəhdi deyil. Heç təəccüblü də deyil!

Paylaş:

Baxılıb: 621 dəfə