Nikolun Strasburq novellası...

Bakı:

12 °C

87 %

4 m/s

Əlaqə

AZ RU EN

Ana səhifə / Siyasət / Nikolun Strasburq novellası...

Nikolun Strasburq novellası...

19.10.2023 [10:48]

Avroparlament tribunası Ermənistanın “doğma tribunasına” çevrilib

Oktyabrın əvvəlində Azərbaycana qarşı qərəzli və əsassız “qətnamə” qəbul etməsinin ardından Avropa Parlamenti Ermənistan üçün “doğma tribunaya” çevrilib. Bunun nəticəsidir ki, iki gün öncə Ermənistanın baş naziri Nikol Paşinyan Avroparlamentdə çıxışına məhz “təşəkkürlə” başlayıb. Öz “nitqində” ölkəsini “sülhpərvər”, “təhlükəsizlik uğrunda çalışan dövlət” kimi təqdim etməyə çalışsa da, ilk cəhddə özünü ifşa edib - Paşinyan növbəti manipulyasiyalar üçün “zəmin formalaşdırılmasına” çalışır. Başqa sözlə desək, sülh uğrunda “çalışan” dövlətin bu qədər yalan və qərəzli mövqe sərgiləməsi bir-birinə uyğun gəlmir.

“Beynəlxalq ictimaiyyət”, yoxsa Fransa “müdaxiləsi”...

Nikol Paşinyan Cənubi Qafqazın sülhə böyük ehtiyac duyduğunu irəli sürüb. Bu mesaj artıq illərdir ki, Azərbəycan tərəfindən səsləndirilir və Ermənistan konstruktiv mövqeyə dəvət olunur. Erməni baş nazir beynəlxalq ictimaiyyəti, Avropa İttifaqı və regionun digər ölkələrini davamlı sülhün reallığa çevirilməsi üçün dəstək verməyə çağırıb. Əslində bu mövqe Ermənistanın yeni “kələyi” də sayıla bilər. “Beynəlxalq ictimaiyyət” fikrini özünə şamil edən Fransanın bu “çağırışdan” pay çıxarmayacağını indidən söyləmək çətindir. Adətən, Ermənistanın “məsləhət yeri” olan bu ölkənin indi də “beynəlxalq ictimaiyyətin nümayəndəsi” adı altında sülhə qarşı iş aparmayacağını istisna etmək olmaz - onsuz da vasitəçi məlumdur, tərəflər məlumdur. Artıq iki ilə yaxındır ki, davam edən Brüssel formatı çərçivəsində gedən danışıqların konturları da məlumdur. Azərbaycanın yaratdığı ədalət mənzərəsi, irəli sürülən təkliflər birmənalı şəkildə sülhün bərqərarını təmin edir. Ermənistan bunun üçün “zəhmət çəkib” hansısa “beynəlxalq ictimaiyyət” axtarmamalıdır...

Müttəfiqlərdən “narazılıq” və ya KTMT “ağrısı”...

Ermənistanın baş naziri öz çıxışında maraqlı bir məqama da toxunub - o, ölkəsinin müttəfiqlərindən “narazılıq” edib. Bu giley-güzarın arxasında nələrin dayandığı heç kimə sirr deyil. Erməni baş nazir hərbi müttəfiq olduğu KTMT ölkələrinin gücündən uzun müddət Azərbaycana qarşı istifadə etmək arzusunu və hətta tələbini irəli sürürdü. Ötən ilin payızında İrəvanda baş tutan KTMT-nin Zirvə toplantısında bu məsələyə birdəfəlik son nöqtə qoyuldu - Rusiya da daxil olmaqla KTMT üzvü olan dövlətlər Azərbaycanın Qarabağla bağlı addımlarına heç kimin qarışa bilməyəcəyini açıq şəkildə Paşinyana bildirdilər. Qeyd edildi ki, bu, Azərbaycanın daxili işidir. Eyni zamanda, Paşinyanın “hərbi monitorinq qrupu” arzusu da ürəyində qaldı və KTMT buna da “qol qoymadı”. Bu isə nəticə etibarı ilə Paşinyanı müttəfiqlərindən narazı saldı.

Erməni baş nazirin indiki halda müttəfiqlərini Avropa Parlamentindəki çıxışı zamanı “hədəfə alması” da bəzi mətləblərdən xəbər verir. Bu, KTMT ilə bir növ “rəqabət” halında olan zərbə mesaj da sayıla bilər. Ermənistan bu yolla özünü yenidən Qərbə “təklif edir”. “Oyuncaq ölkə” statusundan birmənalı şəkildə qurtula bilməyən Ermənistan bu yolla yeni “çətir altına” keçmək istəyini açıq şəkildə dilə gətirir.

Paşinyanın “etnik təmizləmə” yalanı...

Qeyd edək ki, Paşinyan Avropa Parlamentindəki çıxışı zamanı yenə də erməni xislətindən, erməni xəstəliyindən əl çəkə bilməyib - dünya birliyini yeni yalanları ilə aldatmağa çalışan ermənilər Azərbaycana qarşı qərəzli iddialarını davam etdirirlər. Erməni baş nazir də çıxışında antiterror tədbirlərindən sonra Qarabağı öz xoşu ilə tərk edən və öz arzuları ilə Ermənistana keçən Qarabağın erməni sakinlərinə münasibətdə “etnik təmizləmə” aparıldığını iddia edib. Bu, sülh və əməkdaşlıq “arzusunu” irəli sürən Ermənistanın qeyri-səmimiliyinin bariz sübutudur. Azərbaycanın bölgədə “etnik təmizləmə” həyata keçirmək istiqamətində addımlar atdığı barədə Ermənistan tərəfinin iddiası olduqca yanlış və təhlükəlidir. Azərbaycanlılara qarşı kütləvi qırğınlar və deportasiyalar həyata keçirən Ermənistandan fərqli olaraq, Azərbaycan heç zaman erməni sakinlərə qarşı etnik təmizləmə siyasəti həyata keçirməyib. Əksinə, lokal antiterror tədbirlərindən sonra erməni sakinlərin reinteqrasiyası ilə bağlı proqram bəyan olunub, onlara qalıb yaşamağa davam etmək təklif edilib. Bu insanlar sadəcə özləri Ermənistana keçməyi seçiblər ki, bu, Azərbaycanın tələbi sayıla bilməz...

Paşinyanın bu ayın əvvəlində Avroparlamentin qərəzli “qətnaməsinə” görə “sağ ol” deməsi isə, erməni lobbisinin üzdə sülh, arxa planda isə yeni kampaniyalar axtarışında olmalarını sübuta yetirir.

P.SADAYOĞLU

Paylaş:

Baxılıb: 470 dəfə