Hər qız bir ümiddir!

Bakı:

23 °C

71 %

12 m/s

Əlaqə

AZ RU EN

Ana səhifə / Sosial / Hər qız bir ümiddir!

Hər qız bir ümiddir!

11.10.2025 [08:27]

Onlara verilən sevgi cəmiyyətin inkişafı deməkdir...

Elmin və mədəniyyətin işığıyla aydınlanan bütün ailələrdə qız övladına qarşı xüsusi sevgi olur. Həmin ailələrdə qız uşağı ailənin başqa fərdləri ilə bərabər hüquq və azadlıqlara sahibdir. Həyatımızda bir neçə vacib və məsuliyyətli vəzifələr var. Bu vəzifələr sırasında valideynlik öndə gəlir. Həyatla bağlı çox şeyi özümüzdən əvvəl yaşayan insanlardan öyrənir, görüb-götürürük. Bu səbəbdən ağlı, qabiliyyəti ilə dünyada tanınan dahilər, yazıçılar və sənətkarlardan bir neçəsinin qızlarına olan münasibəti, etimadı, onlara yazdıqları məktublar maraq doğurur. Məsələn psixoanaliz elminin banisi Ziqmund Freyd qızı Lieserlə yazdığı məktubda deyirdi: “Əzizim, Lieserl, ən çox güvəndiyin insanlardan pislik gördüyün üçün üzülməyin sənin zəif olduğunu göstərmir. Fizikanın qanunlarına görə, arxanı söykədiyin nəsnə bir anda yox olarsa, sən də o tərəfə doğru yıxılarsan. Yəni ki, bunun gücsüzlüklə heç bir əlaqəsi yoxdur”.

“Böhranın ön cəbhəsindəki qızlar”

Bu gün Beynəlxalq Qızlar Günü kimi qeyd edilir. BMT Baş Assambleyasının qərarı ilə oktyabrın 11-i Beynəlxalq Qızlar Günü kimi təsis edilib. Bu günün qeyd olunmasında əsas məqsəd diqqəti qızların hüquqlarının müdafiəsinə, oğlan və qızlar arasında gender bərabərliyinin təmin olunmasına, müxtəlif növ ayrı-seçkilikdən və baxımsızlıqdan əziyyət çəkən qızlara yönəltməkdir. Beynəlxalq Qızlar Gününün builki devizi isə “Böhranın ön cəbhəsindəki qızlar” adlanır.

Qızlar həyatlarının hər bir yaş mərhələsində təhlükəsizlik, təhsil və sağlamlıq hüququna malik olmalıdırlar. Yetkinlik dövründə hər bir dəstəyi alan qızlar gələcəkdə kadr, sahibkar, siyasi lider ola bilmək üçün öz potensiallarını daha yaxşı həyata keçirə və dünyaya daha yaxşı töhfələr verə bilərlər.

Hazırda dünyada 1 milyarda qədər gənc yaşayır ki, onlardan da 600 milyonu yetkinlik yaşında olan qızlardır. Onlar gələcəyimizin qurulmasında böyük potensiala malikdir. Son 15 ildə dünya ictimaiyyəti qızların həyatının yaxşılaşdırılmasında əhəmiyyətli irəliləyiş əldə edib. Lakin müasir dövrümüzdə hələ də elə ölkələr var ki, orada qızlara, qadınlara qarşı fərqli yanaşmalar, ayrı-seçkilik mövcuddur.

Hər 3 qızdan biri 18 yaşına çatmamış ərə gedir

Beynəlxalq ekspertlər bildirirlər ki, dünyada gedən bir sıra proseslər qızların həyatında silinməz izlər qoyur: Onlar məktəbdən yayındırılır, erkən yaşda ərə verilir, insan alverinə məruz qalırlar. Dünyada orta hesabla 20-24 yaş arasında olan hər üç qadından biri 18 yaşına çatmamış ərə gedir. Bu cür qızların üçdə biri 15 yaşına çatmamış nikaha daxil olur. Uşaq nikahı əsas insan haqlarının pozulması deməkdir və qızların həyatının bütün aspektlərinə mənfi təsir göstərir. Erkən nikahlar qızları uşaqlıq çağından məhrum edir. Onları zorla təhsildən əl çəkməyə məcbur edirlər. Bu cür qızların imkanları son dərəcə məhdudlaşdırılır, lakin zorakılığa məruz qalmaq və yoldan çıxarılma halları bir neçə dəfə yüksəkdir.

Qız övladına sevgi göstərmək sadəcə onları hər hansı bir gələcəyə hazırlamaq deyil, eyni zamanda, onlara müstəqil düşüncə, özlərinə inam və həyatda yer tapmaq üçün lazım olan bütün təcrübələri verməkdir. Bu, həm də qadınların cəmiyyətdəki rolunun inkişafını stimullaşdıran bir yanaşmadır. Ailələr qızlarını gələcəyin tədqiqatçıları, müəllimləri, iş qadınları olaraq yetişdirməkdən heç vaxt çəkinməməlidirlər. Çünki bir qadının gücü, bütün cəmiyyətin gücüdür!

Yeganə BAYRAMOVA

Paylaş:

Baxılıb: 633 dəfə