Beynəlxalq konfransın iştirakçıları Bakıdakı 3 saylı “ASAN xidmət” mərkəzindən zəngin təəssüratlarla ayrılıblar

Bakı:

25 °C

46 %

8 m/s

AZ RU EN

Ana səhifə / Sosial / Beynəlxalq konfransın iştirakçıları Bakıdakı 3 saylı “ASAN xidmət” mərkəzindən zəngin təəssüratlarla ayrılıblar

Beynəlxalq konfransın iştirakçıları Bakıdakı 3 saylı “ASAN xidmət” mərkəzindən zəngin təəssüratlarla ayrılıblar

02.07.2014 [10:03]

Bakıda keçirilən “Korrupsiyaya qarşı mübarizə: Beynəlxalq standartlar və milli təcrübələr” mövzusunda yüksək səviyyəli beynəlxalq konfransın iştirakçıları iyulun 1-də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Bakıdakı 3 saylı “ASAN xidmət” mərkəzinin fəaliyyəti ilə tanış olublar.
AzərTAc xəbər verir ki, Dövlət Agentliyinin direktoru İnam Kərimov qonaqları “ASAN xidmət”in fəaliyyəti barədə məlumatlandırıb. Bildirilib ki, Azərbaycanda dövlət qurumlarının fəaliyyətində informasiya-kommunikasiya texnologiyalarının tətbiqi istiqamətində müvafiq hüquqi baza formalaşdırılıb, əksər dövlət orqanlarında əhaliyə elektron xidmətlərin göstərilməsi təmin edilib. Bu xidmətlər mümkün korrupsiya hallarını aradan qaldırır və vətəndaşları dövlət xidmətlərinə yaxınlaşdırır. Azərbaycan Prezidenti İlham Əliyev 2012-ci il iyulun 13-də bu sahədə daha mühüm islahata imza atıb. Prezidentin Fərmanı ilə “ASAN xidmət” mərkəzləri yaradılıb. Qeyd edilib ki, 3 saylı “ASAN xidmət” mərkəzi ötən il sentyabrın 17-də Azərbaycan Respublikasının Prezidenti İlham Əliyevin iştirakı ilə açılıb.
Məlumat verilib ki, “ASAN xidmət” mərkəzinin fəaliyyətinin məqsədi dövlət orqanlarının hüquqi xidmətlərinin göstərilməsində vətəndaşların razı salınması, şəffaflığın təmin edilməsi, korrupsiya hallarının tam aradan qaldırılması, müasir texnologiyaların, “bir qapı” prinsipinin tətbiq olunması, dövlət qulluqçusu-vətəndaş münasibətlərində yeni düşüncə tərzinin - “dövlət qulluqçusunun vəzifəsi vətəndaşın hüququnu təmin etməkdir” yanaşmasının formalaşdırılmasıdır. “ASAN xidmət” mərkəzinin əsas prinsipləri operativlik, şəffaflıq, nəzakətlilik, məsuliyyət, etik davranış qaydalarına nəzarət və rahatlıqdır. Bununla yanaşı, Vətəndaşlara Xidmət və Sosial İnnovasiyalar üzrə Dövlət Agentliyi və onun tabeliyində olan “ASAN xidmət” mərkəzləri öz fəaliyyətini yüksək standartlara uyğun quran və inkişaf etdirən dövlət orqanı qismində “Vahid məkan” prinsipinə əsaslanan qurumlardandır.
Diqqətə çatdırılıb ki, “ASAN xidmət” mərkəzlərində 10 dövlət orqanı tərəfindən 30 növ xidmət göstərilir. Eyni zamanda, mərkəzlərdə 28 növ funksional yardımçı xidmətlər təşkil edilib. Bütün bunlar dövlət qulluqçusu-vətəndaş münasibətlərində yeni yanaşmanın formalaşmasında Azərbaycan dövlətinin həyata keçirdiyi siyasətin mühüm tərkib hissəsidir.
“ASAN xidmət” təcrübəsinin özünəməxsus hüquqi strukturu bir çox beynəlxalq tərəfdaşlar və ekspertlər tərəfindən yüksək qiymətləndirilir və bu təcrübə Azərbaycan modeli kimi xüsusi təqdim olunur. Odur ki, “ASAN xidmət”in təkcə Azərbaycanda deyil, uğurlu model olaraq digər ölkələrdə də tətbiqi təşviq edilməkdədir. Bu istiqamət müxtəlif beynəlxalq tərəfdaşlarla, o cümlədən Avropa İttifaqı ilə aparılan əməkdaşlığın əsas prinsiplərindən birini təşkil edir. Geniş marağın nəticəsidir ki, “ASAN xidmət” İSO 9001:2008 standartı üzrə keyfiyyətin idarə olunması ilə bağlı beynəlxalq dərəcəli sertifikata layiq görülüb.
Qonaqlara özünəxidmət köşkləri, “ASAN ödəniş” sistemləri barədə məlumat verilib. Bildirilib ki, məmur və vətəndaş arasında təmas və dialoqun minimallaşdırılmasında özünəxidmət köşkləri mühüm rol oynayacaq. Bunun üçün köşklər biometrik məlumatların götürülməsi, ödənişlərin nağd və plastik kartlar vasitəsilə aparılması imkanı ilə təmin ediləcək. Bu il fevralın 11-də dövlətimizin başçısının imzaladığı Fərmana əsasən “ASAN ödəniş” sisteminin hazırlanması üzrə planlı işlər görülüb. Bu sistem vətəndaş ilə dövlət orqanı əməkdaşı arasında birbaşa təması istisna edir, şəffaflığı və operativliyi təmin edir, korrupsiya və digər mənfi halların qarşısını alır.
Konfrans iştirakçıları Azərbaycan brendi olan bu nadir təcrübə ilə tanışlıqdan məmnunluqlarını bildirib, “ASAN xidmət” mərkəzindən zəngin təəssüratla ayrılıblar.

Paylaş:

Baxılıb: 1161 dəfə