X Bakı Yay Enerji Məktəbi başa çatıb

Bakı:

25 °C

65 %

7 m/s

Əlaqə

AZ RU EN

Ana səhifə / Sosial / X Bakı Yay Enerji Məktəbi başa çatıb

X Bakı Yay Enerji Məktəbi başa çatıb

23.07.2016 [10:17]

İyulun 22-də “ADA” Universitetinin Xəzər Enerji və Ətraf Mühit Mərkəzinin təşkil etdiyi X Bakı Yay Enerji Məktəbinin bağlanışına həsr olunan tədbir keçirilib.
AZƏRTAC xəbər verir ki, Azərbaycan Respublikası Dövlət Neft Şirkətinin (SOCAR), BP, ExxonMobil şirkətlərinin dəstəyi ilə keçirilən bu təlim proqramına 17 ölkədən 46 dinləyici qatılıb. Təlim müddətində onlar Azərbaycanın və Xəzəryanı dövlətlərin enerji siyasəti barədə məlumatlandırılıblar. Mühazirələri yüksək səviyyəli rəsmilər və nüfuzlu təhlilçilərdən ibarət ekspertlər qrupu oxuyub. Proqram, həmçinin enerji sahəsində fundamental anlayışlar və terminlər, hüquqi baza, neft və qaz hasilatının Xəzəryanı bölgənin beynəlxalq münasibətlərinə, eləcə də ətraf mühitə təsiri, təbii resursların səmərəli idarə edilməsi kimi vacib mövzuları əhatə edib. İştirakçılar əldə etdikləri bilikləri interaktiv məşğələlərdə sınayıblar.
Tədbirdə çıxış edən “ADA” Universitetinin rektoru, professor Hafiz Paşayev belə bir layihənin həyata keçirilməsinin vacibliyini qeyd edib. Rəhbərlik etdiyi ali təhsil ocağının fəaliyyətindən danışan rektor Bakı Yay Enerji Məktəbinin “ADA” Universitetinin həyata keçirdiyi ilk təlim proqramlarından biri olduğunu söyləyib. Vurğulayıb ki, bu layihə iştirakçılara Azərbaycanda enerji sahəsinin müxtəlif istiqamətləri, habelə ümumilikdə müvafiq sektorun xüsusiyyətləri barədə biliklər aşılayıb.
Xarici işlər naziri Elmar Məmmədyarov tədbirdə mühazirə ilə çıxış edərək ölkəmizdə uğurla həyata keçirilən enerji siyasətinin müxtəlif aspektlərinə toxunub. Nazir regionda reallaşdırılan enerji layihələrində Azərbaycanın aparıcı rolunu qeyd edib.
Tədbir iştirakçılarını maraqlandıran suallara cavab verən nazir Ermənistan-Azərbaycan, Dağlıq Qarabağ münaqişəsi, problemin həlli istiqamətində aparılan danışıqlar prosesinin hazırkı vəziyyəti ilə bağlı məqamlara da toxunub.
“ADA” Universitetinin hər yay keçirdiyi Bakı Yay Enerji Məktəbinin məzunlarının sayını 54 ölkədən 500 nəfərə çatacaq. Proqramın məqsədi Azərbaycanın qlobal səhnədəki mövqeyini vurğulamaq, bölgənin enerji sənayesi ilə bağlı zəngin biliklərə malik mütəxəssislərin sayını artırmaqdır.
Sonda X Bakı Yay Enerji Məktəbinin məzunlarına sertifikatlar təqdim olunub.
Qeyd edək ki, Yay Enerji Məktəbi çərçivəsində iştirakçılar Səngəçal neft terminalı, “Təmiz Şəhər” ASC-nin tullantıların yandırılması və çeşidlənməsi zavodlarında olub, Milli Azərbaycan Tarixi Muzeyi, Nobel qardaşlarının ev-muzeyi, “İçərişəhər” Dövlət Tarix-Memarlıq Qoruğuna ekskursiya edərək Azərbaycanın neft tarixi ilə tanış olublar.

Paylaş:

Baxılıb: 714 dəfə