Bakıda “Qızların fiziki sağlamlığı: Gələcək nəsillərin inkişafı” mövzusunda konfrans təşkil olunub

Bakı:

12 °C

82 %

2 m/s

AZ RU EN

Ana səhifə / Sosial / Bakıda “Qızların fiziki sağlamlığı: Gələcək nəsillərin inkişafı” mövzusunda konfrans təşkil olunub

Bakıda “Qızların fiziki sağlamlığı: Gələcək nəsillərin inkişafı” mövzusunda konfrans təşkil olunub

20.05.2017 [08:13]

Mayın 19-da Ailə, Qadın və Uşaq Problemləri üzrə Dövlət Komitəsi və Gənclər və İdman Nazirliyinin birgə təşkilatçılığı ilə IV İslam Həmrəyliyi Oyunları çərçivəsində “Qızların fiziki sağlamlığı: Gələcək nəsillərin inkişafı” mövzusunda konfrans keçirilib.
AZƏRTAC xəbər verir ki, konfransda Ailə, Qadın və Uşaq Problemləri üzrə Dövlət Komitəsinin sədri Hicran Hüseynova çıxış edərək bu gün Azərbaycanın dünyada idman ölkəsi kimi tanındığını söyləyib. Bildirib ki, Azərbaycan Prezidenti İlham Əliyevin və Birinci vitse-prezident Mehriban Əliyevanın apardıqları uğurlu islahatların nəticəsi olaraq beynəlxalq idman tədbirlərində gənclərimizin nailiyyətləri gündən-günə artır. Qadın idmançıların sayının artması ölkə rəhbərliyi tərəfindən onlara göstərilən xüsusi diqqət və qayğının nəticəsidir.
Hicran Hüseynova qeyd edib ki, ölkəmizin qadın idmançılarının beynəlxalq səviyyədə yüksək nəticələr əldə etməsi çox fərəhləndiricidir. Amma müxtəlif səbəblərdən qadın və qızlarımızın fiziki fəallığı kişilərə nisbətən azdır. Halbuki onların bədən tərbiyəsi və idmanla məşğul olması həm də ona görə vacibdir ki, sağlam qadın sağlam nəsil deməkdir. Bu baxımdan peşəkar idmanla yanaşı, bütövlükdə idmanın kütləviləşməsi məsələsi qarşımızda duran vəzifələrdəndir. Qızlarımızın idmana cəlb olunmasının əsas əngəllərindən biri hələ də cəmiyyətdə olan stereotiplərdir.
“Ümid edirəm ki, dövlətimizin 2015-ci ildə Avropa Oyunları, 2017-ci ildə İslam Həmrəyliyi Oyunları kimi möhtəşəm idman tədbirlərinin ölkəmizdə keçirilməsinə yaratdığı şəraitdən həm yerli, həm də beynəlxalq idman təşkilatları səmərəli şəkildə istifadə edəcəklər. İslam Həmrəyliyi Oyunlarında iştirak edən, medallar qazanan müsəlman qızlar öz ölkələrində olan qızlar üçün yeni bir yol açırlar. Biz bütün idmançılarımızla, xüsusilə qadın idmançılarımızla fəxr edirik. Onlara gələcək idman yarışlarında uğurlar arzulayırıq”, - deyə komitə sədri vurğulayıb.
Gənclər və idman naziri Azad Rəhimov deyib ki, Azərbaycan qadını öz zəkası, müdrikliyi, sədaqəti, qəhrəmanlığı, yüksək analıq keyfiyyəti ilə hər zaman xalqımızın adını uca tutub. Azərbaycan qadınları ictimai-siyasi proseslərdə fəal olublar. Onların arasından görkəmli dövlət, elm, mədəniyyət, ictimai-siyasi xadimlər yetişib. Respublikamız müstəqilliyini bərpa etdikdən sonra qadınların cəmiyyətdə rolu daha da yüksəlib və fəaliyyətləri genişlənib. Ümummilli liderimiz Heydər Əliyev qadınların cəmiyyətdə rolu ilə bağlı siyasətin səmərəli şəkildə həyata keçirilməsinə, onların dövlət quruculuğunda, elm, mədəniyyət, təhsil, səhiyyə, idman və s. sahələrdə geniş təmsil olunmalarına müstəsna əhəmiyyət verib. Elm və incəsənət sahəsində olduğu kimi, bədən tərbiyəsi və idman sahəsində də Azərbaycan qadınları çətin və mürəkkəb yol keçiblər. Qarşıya çıxan maneələri aradan qaldırmaq və bədən tərbiyəsi ilə məşğul olmaq hüququ qazanmaq üçün Azərbaycan qadınlarından böyük qüvvə, iradə və fədakarlıq tələb olunub.
Nazir azərbaycanlı qadın idmançıların mötəbər idman turnirlərində qazandıqları nailiyyətlər barədə məlumat verib. O deyib ki, bu gün də qadınlarımız Azərbaycanı idman sahəsində geniş təbliğ edərək yüksək nailiyyətlər əldə edirlər. IV İslam Həmrəyliyi Oyunlarında əldə olunan nailiyyətlər buna sübutdur.
Konfransda çıxış edən İslam Həmrəyliyi İdman Federasiyasının baş katibi Faysal Əl Nasser deyib ki, IV İslam Həmrəyliyi Oyunlarının Azərbaycanda keçirilməsi çox gözəl imkandır. Biz bu imkandan istifadə etməklə Avropaya qadınların qazandığı uğurları göstərməliyik. İslamiadada qadın idmançılar əla nəticələr göstərirlər. Çoxlu sayda gənc oğlan və qız İslam Həmrəyliyi Oyunlarında könüllü qismində iştirak edir. Bu Azərbaycanda idmana olan marağın göstəricisidir. Baş katib Bakıda bu qədər pozitiv könüllülərlə qarşılaşmasından məmnunluğunu bildirib.
Gənclər və İdman Nazirliyinin idman şöbəsinin müdiri, Olimpiya çempionu Fərid Mansurov, Azərbaycan Dövlət Bədən Tərbiyəsi və İdman Akademiyasının rektorun müşaviri Şəmsiyyə Mustafayeva, “Sağlam Həyat Naminə” İctimai Birliyinin sədri Sədaqət Hüseynova, Olimpiya çempionu Zemfira Meftahətdinova çıxış edərək Azərbaycan qadınlarının hər zaman öz istedadları, işgüzarlıqları, yüksək keyfiyyətləri ilə fərqləndiklərini qeyd edib, onların idmanda da uğurlar qazanmalarının sevindirici olduğunu vurğulayıblar. Bildirilib ki, Prezident İlham Əliyev Azərbaycan qadınlarının bütün sahələrdə, o cümlədən idmanda nailiyyətlərinin artırılmasına davamlı diqqət və qayğı göstərir və bunun nəticələri göz qabağındadır.
Konfransda qızların idmana cəlb edilməsi, onlar arasında idmana marağın yüksəldilməsi, bölgələrdə qadınlar arasında keçirilən idman yarışlarının sayının artırılması, bu istiqamətdə qarşıda duran vəzifələr barədə müzakirələr aparılıb.

Paylaş:

Baxılıb: 564 dəfə