Azərbaycan-Vyetnam münasibətlərinin çoxşaxəli və qarşılıqlı faydaları

Bakı:

28 °C

54 %

10 m/s

Əlaqə

AZ RU EN

Ana səhifə / YAP xəbərləri / Azərbaycan-Vyetnam münasibətlərinin çoxşaxəli və qarşılıqlı faydaları

Azərbaycan-Vyetnam münasibətlərinin çoxşaxəli və qarşılıqlı faydaları

16.05.2025 [10:55]

Ziya Paşayev,

YAP İmişli rayon təşkilatının məsləhətçisi

7 may 2025-ci il tarixində Azərbaycan Respublikasına rəsmi səfər edən Vyetnam Sosialist Respublikasının Kommunist Partiyasının Mərkəzi Komitəsinin Baş katibi To Lamın səfəri iki ölkə arasında münasibətlərin dərinləşməsi baxımından mühüm bir mərhələ kimi yadda qaldı. Səfər çərçivəsində Prezident İlham Əliyevlə keçirilən görüş və mətbuata verilən birgə bəyanat, Azərbaycan–Vyetnam əməkdaşlığının müxtəlif sahələrdə genişlənməsi üçün yeni imkanlar yaratdı.
Azərbaycan və Vyetnam arasında diplomatik münasibətlər 1992-ci ildə qurulsa da, bu dostluğun tarixi daha da qədim dövrlərə dayanır. Xüsusilə sovet dövründə minlərlə vyetnamlı gəncin Azərbaycanda ali təhsil alması, bu ölkədə Azərbaycan xalqına qarşı xüsusi simpatiyanın formalaşmasına səbəb olub. Hazırda həmin məzunların bir çoxu Vyetnamda yüksək dövlət vəzifələrində çalışır və ölkələrimiz arasında körpü rolunu oynayırlar. Bu təməl üzərində inşa edilən müasir diplomatik münasibətlər getdikcə güclənir və yeni məzmunla zənginləşir.

Prezident İlham Əliyev birgə bəyanatda bildirdi ki, bu səfər təkcə siyasi dialoqun yox, həm də konkret əməkdaşlıq istiqamətlərinin inkişafına xidmət edəcək. Bu fikir, tərəflərin sadəcə protokol xarakterli görüşlərdən kənara çıxaraq, real iqtisadi və texnoloji layihələr üzərində işləməyə qərarlı olduqlarını göstərir.

Azərbaycan və Vyetnam arasında iqtisadi əməkdaşlıq, xüsusilə enerji və nəqliyyat sahəsində perspektivlidir. Prezident İlham Əliyev bu kontekstdə vurğuladı ki, bərpaolunan enerji növləri ilə bağlı fikir mübadiləsi aparılıb. Azərbaycan artıq Cənubi Qafqazda yaşıl enerji sahəsində liderlik etməkdədir və bu təcrübəni Vyetnamla bölüşmək hazırdır. Həmçinin Azərbaycan–Vyetnam arasında ticarət dövriyyəsinin artırılması üçün nəqliyyat dəhlizləri üzrə əməkdaşlıq potensialı böyükdür. Xəzər və Cənub–Şərqi Asiyanı birləşdirə biləcək logistik imkanlar qarşılıqlı maraq doğurur.

Prezident Əliyevin çıxışında xüsusi diqqət çəkən məqamlardan biri müdafiə sənayesi sahəsində əməkdaşlığın perspektivlərinə dair fikirlər oldu: “Müdafiə sənayesi sahəsində çox böyük perspektivlər var.” Bu, Azərbaycanın yüksək texnologiyalara əsaslanan hərbi sənaye kompleksi ilə Vyetnamın bu sahəyə artan marağı arasında qarşılıqlı faydalı əməkdaşlığın mümkün olduğunu göstərir. Bu da iki ölkə arasında strateji tərəfdaşlıq münasibətlərinin formalaşmasına xidmət edə bilər.
Azərbaycan və Vyetnam xalqları arasında mədəni və təhsil mübadilələrinin gücləndirilməsi istiqamətində də əhəmiyyətli addımlar atılmaqdadır. Heydər Əliyev Fondunun Vyetnamın Ha Giang əyalətində inşa etdiyi ibtidai məktəb bu sahədəki fəaliyyətin bariz nümunəsidir.

Azərbaycan və Vyetnamın BMT, Qoşulmama Hərəkatı və digər beynəlxalq qurumlarda oxşar mövqedən çıxış etməsi, qlobal ədalətin və suverenliyə hörmət prinsipinin müdafiəsində iki ölkənin ortaq maraqlara malik olduğunu göstərir. COP29 çərçivəsində əməkdaşlıq da bu baxımdan mühüm əhəmiyyət daşıyır.

To Lamın Azərbaycana rəsmi səfəri, sadəcə bir diplomatik jest deyil, strateji mahiyyətə malik hadisədir. Prezident İlham Əliyevin səfərlə bağlı verdiyi bəyanatlar, Azərbaycan–Vyetnam münasibətlərinin gələcək onilliklər üçün də möhkəm əsaslar üzərində qurulacağını göstərir. İkitərəfli əməkdaşlıq iqtisadiyyatdan tutmuş mədəniyyətə, müdafiədən təhsilə qədər geniş spektri əhatə edir və bu da onu Qafqaz və Cənub-Şərqi Asiya regionları arasında nümunəvi tərəfdaşlığa çevirir.

Paylaş:

Baxılıb: 412 dəfə